ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކެބިނެޓުގައި ހިމެނިވަޑައިގަންނަވާ 22 ވަޒީރުންނަށް ވެސް ރުހުން ދޭން ފެންނަ ކަމަށް ރައްޔިތުންގެ މަޖިލީހުގެ ކަމާ ބެހޭ ކޮމިޓީން މިއަދު ފާސްކޮށްފި އެވެ.
ހުރިހާ ވަޒީރުންނަށް ވެސް ރުހުން ދޭން ފެންނަ ކަމަށް ފާސް ކުރީ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި މިއަދު ނެގި ވޯޓަކުންނެވެ.
ވަޒީރުންނަށް ރުހުން ދޭން ފެންނަ ކަމަށް ރައްޔިތުންގެ މަޖިލީހުގެ ތަޅުމުގައި އަހާނީ ވަކިވަކިންނެވެ. އެ މައްސަލަ އަދި ތާވަލެއް ނުކުރެ އެވެ.
ވަޒީރުންނަށް ރުހުން ދިނުމުގެ މައްސަލަ އެ ކޮމިޓީން ކުރިން ނިންމައި ތަޅުމަށް ފޮނުވި ނަމަވެސް، ރިޔާސަތުން ނިންމީ ކޮމިޓީން ރިޕޯޓު ފާސްކޮށްފައި އޮތީ މަޖިލީހުގެ ގަވައިދާ އެއްގޮތަށް ނޫން ކަމަށެވެ. އެހެންވެ، މި މަހުގެ 18 ވަނަ ދުވަހު އެ މައްސަލަ އަނބުރާ ކޮމިޓީއަށް ފޮނުވީ އެވެ.
އެ ރިޕޯޓު އޭރު އަނބުރާ ފޮނުވައިލީ ރައީސް މުއިއްޒު އުފެއްދެވި ވުޒާރާތަކުގެ މެންޑޭޓު ގާނޫނު އަސާސީގެ 116 ވަނަ މާއްދާއާ އެއްގޮތަށް މަޖިލީހުން ފާސްކުރަން ފޮނުވާފައި ނެތުމުންނެވެ. މަޖިލީހުގެ ރިޔާސަތުން އެގޮތަށް ނިންމުމާއެކު، ވުޒާރާތަކުގެ މެންޑޭޓު ފާސްކުރަން މަޖިލީހަށް ފޮނުވި އެވެ.
