މަދިރީގެ ޒަރިއްޔާއިން ޖެހޭ ބަލިތައް ރާއްޖޭގައި ގިނަވަމުންދާތީ މަދިރި މަދުކުރުމަށް ގައުމީ ފެންވަރުގެ ހަރަކާތެއް ފަށަން އާބަންކޯ އިން ނިންމައިފި އެވެ.
"މަދިރިން ރައްކާ”ގެ ނަމުގައި ކުރިއަށްގެންދާ މި ހަރަކާތް ރަސްމީކޮށް އިފްތިތާހު ކުރުމަށް ހަމަޖެހިފައިވަނީ މާދަމާ ހެނދުނު 7:30 ގައި ހުޅުމާލެ ފޭސް އެކެއްގެ ރިވެލި ޕާކުގަ އެވެ. ހެލްތު މިނިސްޓްރީ އަދި ހެލްތު ޕޮރޮޓެކްޝަން އެޖެންސީ އާއި ގުޅިގެން ކުރިއަށްގެންދާ މި ހަރަކާތަކީ އާއްމުންނަށް ވެސް ބައިވެރިވެވޭ ގޮތަށް ކުރިއަށް ގެންދާ ހަރަކާތެކެވެ.
އާބަންކޯ އިން ބުނީ މި ހަރަކާތުގެ ދަށުން އެ ކުންފުނީގެ މުވައްޒަފުން އިސްނަގައިގެން ހުޅުމާލެ ސާފުކުރުމަށް ވެސް ހަމަޖެހިފައިވާ ކަމަށާއި އެ ހަރަކާތް ކުރިއަށްގެންދާނީ 15 ޓީމަކަށް ބަހާލެވިގެން ހުޅުމާލެ ފޭސް އެކެއް އަދި ފޭސް ދޭއް ގައި މީހުން ދިރިއުޅޭ ސަރަހައްދުތައް ވެސް ހިމެނޭ ގޮތަށް ކަމަށެވެ.
އަދި, މި ހަރަކާތުގެ ދަށުން ހުޅުމާލޭގެ އިތުރުން ގުޅީފަޅު އަދި ތިލަފުށީގައި ވެސް ސާފުކުރުމުގެ މަސައްކަތްތައް ކުރިއަށް ގެންދިއުމަށް ހަމަޖެހިފައިވާ ކަމަށް އެ ކުންފުނިން ބުންޏެވެ.
ފައިލޭރިއާ ފެތުރުން ކޮންޓްރޯލް ކުރުމުގެ ގިނަ މަސައްކަތްތަކެއް އާބަންކޯ އާއި ސަރުކާރުގެ ކަމާއިބެހޭ އިދާރާތަކާއި ގުޅިގެން ކުރަމުން އަންނަ ކަމަށާއި އެގޮތުން މި މަހުގެ ތެރޭގައި ހުޅުމާލޭގެ އެކި ސަރަހައްދުތަކުން 60 ޓަނުގެ ކުނި ނަގައި ސާފްކޮށްފައިވާ ކަމަށް ވެސް އާބަންކޯއިން މައުލޫމަތު ދިނެވެ.
އާބަންކޯ އިން ބުނީ ފައިލޭރިއާ ފެތުރުން ހުއްޓުވުމަށް މަސައްކަތް ކުރުމަށް ހާއްސަ ޓާސްކްފޯސް އެއްވެސް އެ ކުންފުނިން އެކުލަވާލާފައިވާ ކަމަށެވެ. އަދި, އާބަންކޯގެ އިންސްޕެކްޝަން ޓީމުން ހުޅުމާލޭގެ އެކި ސަރަހައްދުތައް ބަލާ މަދިރި އާލާވާ ފަދަ 200 އަށްވުރެ ގިން ތަންތަން ފާހަގަކޮށް، އެ ތަންތަނަށް ކެމިކަލް އެޅުމުގެ މަސައްކަތާއި ހުޅުމާލޭގެ އެކި ސަރަހައްދަށް މަދިރި ދުން ޖެހުމުގެ މަސައްކަތް ކުރިއަށް ގެންދާ ކަމަށާއި އޭގެ އިތުރުން މިކަމަށް ރައްޔިތުން ހޭލުންތެރިކުރުވުމުގެ ތަފާތު ހަރަތްތައްވެސް ކުރިއަށް ގެންދިއުމަށް ހަމަޖެހިފައިވާ ކަމަށް ބުންޏެވެ.
ވީހާވެސް ގިނަ ފަރާތްތަކުން މާދަމާގެ ސާފުކުރުމުގެ ހަރަކާތުގައި ބައިވެރިވުމަށް އާބަންކޯ އިން ވަނީ އެދިފަ އެވެ.
