ފުވައްމުލަކު ސިޓީއަށް މިއަދު ބޯކޮށް ވާރޭ ވެހި ބައެއް ގޭގެއަށް ފެން ވަދެ ގެއްލުންތަކެއް ވެއްޖެ އެވެ.
ފުވައްމުލަކު ޑެޕިއުޓީ މޭޔަރު މުހައްމަދު ފިކުރީ "އަދަދު" ނޫހަށް ވިދާޅުވީ ފެންބޮޑުވުމުގެ ސަބަބުން ބައެއް ގޭގެއަށް ގެއްލުން ލިބެމުންދާކަމުގެ ރިޕޯޓު ލިބިގެން ހާލަތު ދެނެގަތުމަށް އެ ގެތަކަށް ޒިޔާރަތްކޮށްފައިވާ ކަމަށެވެ. އެ ގޮތުން މިހާތަނަށް 15 ގެއަކަށް ފެން ވަދެ އެކިވަރުގެ ގެއްލުން ލިބިފައިވާ ކަމަށް އޭނާ ވިދާޅުވި އެވެ.
"ނަމަވެސް އެ ގެތަކުން މީހުން ބަދަލުކުރާ ވަރަކަށް ގެއްލުންތަކެއް ނުލިބޭ،" ފިކުރީ ވިދާޅުވި އެވެ.
އޭނާ ވިދާޅުވީ ސިޓީ ކައުންސިލާއި އެމްއެންޑީއެފް އަދި ރަށުގެ އިތުރު މުއައްސަސާތައް ގުޅިގެން ފެން ހިންދުމުގެ މަސައްކަތް ކުރަމުންދާ ކަމަށެވެ. އެ ސިޓީއަށް އެންމެ ބޯކޮށް ވާރޭ ވެހުނީ މިއަދު ހެނދުނު އެވެ.
މޫސުން ގޯސްވެ، ފުވައްމުލަކާއި އައްޑޫ ސިޓީއަށް މީޓިއޮރޮލިޖިކަލް ސާވިސް އިން މިދިޔަ ބުދަ ދުވަހު އޮރެންޖު އެލާޓެއް ވެސް ނެރުނެވެ. އަދި މިއަދު ޔެލޯ އެލާޓު ވެސް ނެރުނެވެ.
