ސަރުކާރު ހިއްސާވާ ބައެއްް ކުންފުނިތަކުގެ ނޮން އެކްޒެކެޓިވް ޑިރެކްޓަރުންގެ ގޮތުގައި 17 ބޭފުޅަކު އައްޔަން ކޮށްފި އެވެ.
ޕްރައިވަޓައިޒޭޝަން އެންޑް ކޯޕަރޭޝަން ބޯޑް (ޕީސީބީ)ން ވަނީ ސަރުކާރުގެ 11 ކުންފުންޏެއްގެ ބޯޑަށް ގެނައި ބަދަލުތައް އާންމުކޮށްފަ އެވެ. އެ ކުންފުނި ތަކުގެ ތެރޭގައި ހިމެނެނީ އެމްޕީއެލް، އެމްއޭސީއެލް، ސްޓެލްކޯ، އެމްޓީސީސީ، ފެނަކަ، އެމްއައިޓީޑީސީ، އާސަންދަ ކުންފުނި، ފަހި ދިރިއުޅުން ކޯޕަރޭޝަން، އެމްޓީޑީސީ، އެމްޑަބްލިއުއެސްސީ އަދި ރީޖަނަލް އެއާޕޯޓްސް ކުންފުންޏެވެ.
އެ ކުންފުނި ތަކަށް 17 ނޮން އެކްޒެކެޓިވް ޑިރެކްޓަރުން އައްޔަންކޮށްފައިވާއިރު، ކުންފުނިތަކުގެ ބޯޑުގައި ކުރިން ތިއްބެވި 18 ޑިރެކްޓަރަކު ވަނީ މަގާމުން ވަކިކޮށްފަ އެވެ.
ކުންފުނިތަކަށް އައްޔަންކުރި ނޮން އެކްޒެކެޓިވް ޑިރެކްޓަރުން
- އެމްޓީސީސީ - އަލީ ނާއިލް (ހ. ފަށަން/މާލެ)
- އެމްއޭސީއެލް - ސަހަރު ވަހީދު (މ. ވެލާލުގެ/މާލެ)
- ސްޓެލްކޯ - މުހައްމަދު އާމިރު (ބޮޑުގެ/ތިމަރަފުށި)، އަހުމަދު ހާޝިމް (ފަސްމީރު/މާފަރު)
- އެމްޕީއެލް - އަހުމަދު އިލްޔާސް (މއ.ފެސިނޭޝަން/މާލެ)، އަހުމަދު ނިޔާޒު (ސޯސަންގެ/ކުރެންދޫ)، އަހުމަދު ފަހީމް (މިރުސްމާގެ/ގައްދޫ)
- ފެނަކަ - އަހުމަދު އީހާބު (ހ. އިރުދޮށުގެ/މާލެ)
- އެމްއައިޓީޑީސީ - މުހައްމަދު ޖަލީލު (މއ.ދަނބުގަސްދޮށުގެ/މާލެ)، އަހުމަދު އަމީން (ބޯގަންވިލާ/ގއ. ވިލިނގިލި)
- އާސަންދަ ކުންފުނި - އައިޝަތު ޖީނާ (ސީޕްރީޒް/ގުރައިދޫ)، އަހުމަދު ޝާކިރު (ފުނަމާގެ/ރަސްދޫ)
- ފަހި ދިރިއުޅުން ކޯޕަރޭޝަން - މަރްޔަމް ޒޫނާ (މަހުލަބުގެ/ސ.ހިތަދޫ)، މުހައްމަދު އިމްތިޝާލް އަހުމަދު (މއ.މަލުވިލާ އުތުރުބައި/މާލެ)
- އެމްޓީޑީސީ - ހުސައިން ހަނީފް (ބޮޑުގެ/ވަށަފަރު)
- އެމްޑަބްލިއުއެސްސީ - އައިޝަތު ރޫހީ (ހ.ރުކުމާގެ/މާލެ)
- ރީޖަނަލް އެއާޕޯޓްސް - މުހައްމަދު ޝަފީގް (ހުޅުމާލެ ފްލެޓް 05-1-127)
ނޮން އެގްޒެކެޓިވް ޑިރެކްޓަރުންނަކީ ކުންފުންޏެއްގެ އެކްޒެކެޓިވް ޓީމުގައި ނުހިމެނޭ މެމްބަރެކެވެ. މި ޑިރެކްޓަރަކީ އާންމުކޮށް ކުންފުނީގެ ހިންގުން ދުވަހުން ދުވަހަށް ބެލެހެއްޓުމުގައި ހަރަކާތްތެރިވާ ޑިރެކްޓަރުންނެއް ނޫނެވެ. ނަމަވެސް ޕޮލިސީ ކަނޑައެޅުމާއި ޕްލޭނިން ކަންތައްތަކުގައި އެ މެމްބަރުން ބައިވެރިވާނެ އެވެ.
މިފަދަ ޑިރެކްޓަރުންނަކީ ގާނޫނީ ގޮތުން މުވައްޒަފަކަށް ނުވާތީ އާންމުކޮށް މުސާރައެއް ގޮތުގައި ދޭނީ "ޑިރެކްޓަރުންގެ ފީ" އެކެވެ. އަދި އާންމުކޮށް މުވައްޒަފުންނަށް ލިބޭ އެހެން އެއްވެސް އިނާޔަތްތަކާއި، ޕެންޝަން ފައިސާއާއި، ބޯނަސްއެއް ނުލިބޭނެ އެވެ.
