ރައްޔިތުންގެ މަޖިލީހުގައި މިވަގުތު ސަރުކާރަށް ނިސްބަތް ނުވެ ތިއްބެވި މެމްބަރުންގެ ތެރެއިން މެމްްބަރުންތަކެއް މާދަމާ ރޭ، ވެރިކަން ކުރާ ޕީއެންސީ/ޕީޕީއެމް ކޯލިޝަނާ ގުޅޭނެކަން އެނގިއްޖެ އެވެ.
އެކި މަސްދަރުތަކުން "އަދަދު" ނޫހަށް އެނގިފައިވާ ގޮތުގައި މަޖިލީހުގެ 10 ވަރަކަށް މެމްބަރުން ޕީއެންސީއާ ގުޅުމަށް ވަނީ ނިންމަވާފަ އެވެ. އޭގެ ތެރޭގައި ގިނައީ މައި އިދިކޮޅު ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ގިނަ މެމްބަރުންނެވެ. އެމްޑީޕީގެ ބައެއް މެމްބަރުން މިހާރު ވަނީ ޕީއެންސީއަށް ސޮއި ވެސް ކޮށްފަ އެވެ.
މާދަމާ ރޭ ޕީއެންސީއާ ގުޅޭ މެމްބަރަކު އަދަދު ނޫހަށް ވިދާޅުވީ ޕީއެންސީއާ ގުޅިވަޑައިގަންނަވާ މެމްބަރުންގެ ތެރެއިން ބައެއް މެމްބަރުން ޖަލްސާއިން ފެނިވަޑައިނުގެންފާނެ ކަމަށެވެ. ނަމަވެސް އެ މެމްބަރުންގެ ނަންތައް އިއުލާނު ކުރުން އެކަށީގެންވާ ކަމަށް އޭނާ ވިދާޅުވި އެވެ.
ދަރުބާރުގޭގައި މާދަމާ ރޭ ބާއްވާ ޖަލްސާގެ ދައުވަތު އެ ކޯލިޝަނުން މިހާރު ފޮނުވާފައިވާއިރު މި ޖަލްސާގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ބައިވެރިވެވަޑައިގަންނަވާނެ އެވެ.
އިދިކޮޅު މެމްބަރުންތަކެއް ޕީއެންސީއާ މި ގުޅެނީ ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު އަޒުލުކުރުމާ ގުޅޭ މާއްދާތަކަށް ވަނީ ބަދަލު ގެނެސްފަ އެވެ.
ރައީސް އާއި ނައިބު ރައީސް މަގާމުން ވަކިކުރުމުގެ މަރުހަލާތައް ފަސޭހަ ކުރިއިރު، މަޖިލީހުގެ މެމްބަރުންގެ ޖުމުލަ އަދަދާއި އަޣުލަބިއްޔަތު ގުނުމާ ގުޅޭ ގޮތުން ވެސް ގަވާއިދަށް ބަދަލުތަކެއް ގެނެސްފައިވެ އެވެ. މަޖިލީހުގެ ގަވާއިދުގެ 49 ވަނަ މާއްދާއަށް ބަދަލުތަކެއް ގެނައީ، އާ ސަރުކާރާއެކު މަޖިލީހުގެ ހަތް މެމްބަރަކު ސަރުކާރުގެ މަގާމުތަކަށް ވަޑައިގަތުމަށްޓަކައި އިސްތިއުފާ ދެއްވުމާ ގުޅިގެން އެ ގޮނޑިތައް ހުސްވުމުންނެވެ.
ގަވާއިދަށް ކޮމިޓީން ގެނައި ބަދަލުގައި ބުނެފައިވަނީ މަޖިލީހުގެ ޖުމުލަ މެމްބަރުންނަކީ އެ ވަގުތެއްގައި މަޖިލީހުގައި ދެމިތިބި މެމްބަރުން ކަމަށެވެ. ރައްޔިތުންގެ މަޖިލީހުގެ އުމުރު ހަމަވުމުގެ ކުރިން އެއްވެސް ގޮނޑިއެއް ހުސްވެއްޖެ ނަމަ، އެ ދާއިރާއަށް އަލުން މެންބަރަކު އިންތިހާބު ކުރުމާ ހަމައަށް ޖުމުލަ މެމްބަރުން ގުނުމުގައި ގޮނޑި ހުސްވެފައިވާ ދާއިރާއެއް ނުގުނާނެ އެވެ. އެހެންވެ، ޖުމުލަ މެމްބަރުންގެ ގޮތުގައި 87 މެމްބަރުން ތިބި ކަމަށް ބެލުމުގެ ބަދަލުގައި ދެން ބަލާނީ 80 މެމްބަރުން ތިބި ކަމަށެވެ.
މި ބަދަލާއެކު މަޖިލީހުގައި ކަންކަން ފާސްކުރަން ކަނޑައަޅާފައިވާ އަޣުލަބިއްޔަތުގެ މިންވަރުތަކަށް ބަދަލު އަންނާނެ އެވެ. އެގޮތުން ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު އަޒުލުކުރަން ދެން ބޭނުން ވާނީ 54 މެމްބަރުންގެ ވޯޓެވެ. ކުރިން ނަމަ 58 މެމްބަރުންގެ ވޯޓު ބޭނުން ވާނެ އެވެ.
ރައީސް މުއިއްޒުއާ އެކު މިވަގުތު ތިއްބެވީ މަދު މެމްބަރުންތަކެކެވެ. މިފަހުން މަރަދޫ ދާއިރާގެ މެމްބަރު އިބްރާހިމް ޝަރީފް ވެސް ވަނީ އެމްޑީޕީން ވަކިވެވަޑައިގަނެފަ އެވެ. އެކަމާ ގުޅިގެން ވެސް މަޖިލީހުގެ އަދަދުތަކަށް ވަނީ ބަދަލުތަކެއް އައިސްފަ އެވެ.
މިހާރު މަޖިލީހުގައި ތިއްބެވި 80 މެމްބަރުންގެ ތެރެއިން ޕީޕީއެމްގައި ތިއްބެވީ ދެ މެމްބަރުންނެވެ. އަދި ޕީއެންސީގައި ވެސް ތިއްބެވީ ދެ މެމްބަރުންނެވެ.
