ދިވެހިރާއްޖެއިން ނައްތާލާފައިވާ ފައިލޭރިއާ ބަލި، ރާއްޖެ އައި ބިދޭސީ މަސައްކަތްތެރިންތަކެއްގެ ގައިން ފެނިފައިވާތީ ރައްޔިތުންގެ މެދުގައި ވަރަށް ބޮޑަށް ކަންބޮޑުވުން އެބަ އޮތް ކަމަށާއި ނަމަވެސް އެ ބަލި ފެތުރިގެން ނުދާނެ ކަމުގެ ޔަގީންކަން އެބަ އޮތް ކަމަށާއި އެހެންވެ، ރައްޔިތުން ކަންބޮޑުނުވުމަށް ހެލްތު މިނިސްޓަރު ޑރ. އަބްދުﷲ ހަލީލު ވިދާޅެއްޖެ އެވެ.
ކާބޯތަކެތީގެ ރައްކާތެރިކަމާމެދު ހޭލުންތެރިކަން ފެތުރުމަށް މޯލްޑިވްސް ފުޑް އެންޑު ޑްރަގު އޮތޯރިޓީ އާއި ޑަބްލިޔޫއެޗްއޯ ގުޅިގެން "މުކައްބަ" ނަމުގައި ކުރިޔަށް ގެންދާ ކެމްޕޭނު ފެށުމަށް އިއްޔެ ބޭއްވި ރަސްމިއްޔާތުގައި މިނިސްޓަރު ހަލީލު ވިދާޅުވީ ފައިލޭރިއާ ފެތުރިގެން ގޮސްދާނެ ކަމާމެދު ކަންބޮޑުވާން ނުޖެހެނީ، މިހާތަނަށް ޓެސްޓުކުރި ދިވެއްސެއްގެ ހަށިގަނޑުން ބަލި ފެނިފައި ނެތުމާއި، އެ ބަލީގެ ޒާތާއި ބަލި ފެނުނަސް ފެތުރިގެން ދިޔަ ނުދީ ކޮންޓްރޯލް ކުރެވޭނެ ނިޒާމު ރޭވިފައި ހުރުމުން ކަމަށެވެ.
"ކަންބޮޑުނުވާށޭ އަޅުގަނޑު މި ދަންނަވަނީ އަޅުގަނޑުމެން ދިވެހިން ވެސް ޓެސްޓު ކޮށްފިން އެންމެ ބޮޑަށް މި ފެތުރިފައި އޮތް ކަމަށް ފާހަގަ ކުރެވޭ ރަށުގައި. އެއީ ކުޅުދުއްފުށީގައި، ކުޅުދުއްފުށީގައި 155 ދިވެހިން ޓެސްޓުކުރިއިރު އެއްވެސް ދިވެއްސަކު ޕްޒިޓިވެއް ނޫން. އޭގެ ނަތީޖާއިން އަޅުގަނޑުމެންނަށް މި ދައްކައި ދެނީ މި ބައްޔަކީ ރާއްޖެއަށް އިމްޕޯޓުވެފައިވާ ބައްޔެއްކަން،" ހަލީލު ވިދާޅުވި އެވެ.
މަދިރީގެ ޒަރިއްޔާއިން މި ބަލި ފެތުރުނަސް، މިއީ އެހާ ފަސޭހައިން އެކަކު ގައިން އަނެކެއްގެ ގަޔަށް ފެތުރޭ ބައްޔެއް ނޫން ކަމަށާއި، ބަލި ފެތުރެނީ، ބަލި އުފުލާ ކިއުލެކްސް މަދިރި އެތައް ފަހަރަކު ހަށިގަނޑުގައި ހެފުމުން ކަމަށް ހަލީލު ވިދާޅުވި އެވެ.
ބަލި ކޮންޓްރޯލްކުރުމަށްޓަކައި ނިޒާމު ފުރިހަމަ އަށް ރޭވިފައިވާ ކަމަށާއި ބަލި ދެނެގަތުމަށް ފަހު ބަލި މީހާއަށް ބޭސް ދޭންޖެހެނީ އެންމެ ފަހަރަކު ކަމަށް ހަލީލު ވިދާޅުވި އެވެ. އެއަށް ފަހު އެ މީހާގެ ފަރާތުން އެހެން މީހަކަށް ބަލި ފެތުރިގެން ނުދާނެ ކަމަށް އޭނާ ވިދާޅުވި އެވެ.
ފައިލޭރިއާ ދެނެގަތުމަށް ބޭނުންވާ ޓެސްޓު ކިޓާއި ފަރުވާ ދިނުމަށް ބޭސް ވެސް ރާއްޖޭގައި އެބަހުރި ކަމަށާއި އެ ތަކެތި އިތުރަށް ހޯދުމުގެ މަސައްކަތް ވެސް ކުރަމުން އަންނަ ކަމަށް ހަލީލު ވިދާޅުވި އެވެ.
ރާއްޖެއަށް އަންނަ ބިދޭސީ މަސައްކަތްތެރިންގެ ކިބައިން ރާއްޖެ އަށް ބަލިތައް އިމްޕޯޓުވުން ކޮންޓްރޯލްކުރުމުގެ ގޮތުން ކޮންމެ އަހަރަކު އެއްފަހަރު ހެލްތު ޗެކަޕް ހެދުން ލާޒިމުކޮށްފައިވާ ކަމަށާއި އަދި ހެލްތު ޗެކަޕް ހަދާއިރު ފައިލޭރިއާ އަށް ޓެސްޓުކުރުން ލާޒިމުކުރާނެ ކަމަށް ހަލީލުވި އެވެ.
މިހާރު ހަދާ ޓެސްޓުތަކުގެ އިތުރަށް އެހެން ބައެއް ޓެސްޓުތައް ވެސް ހެލްތު ޗެކަޕްގައި ލާޒިމުކުރަން މަސައްކަތް ކުރާ ކަމަށް އޭނާ ވިދާޅުވި އެވެ.
