މެލޭޝިއާގައި ހުންނަވާ ރާއްޖޭގެ ޑެޕިއުޓީ ހައި ކޮމިޝަނަރު މަރިޔަމް މިޒްނާ ޝަރީފު, އެ މަގާމުގައި ބެހެއްޓުމަށް މި ސަރުކާރުން ނިންމައިފި އެވެ.
ސެޕްޓެމްބަރު މަހުގައި ބޭއްވި ރިޔާސީ އިންތިހާބު މިހާރުގެ ރައީސް ޑރ. މުހައްމަދު މުއިއްޒު ކާމިޔާބު ކުރެއްވުމާއެކު، ދިވެހި ހައި ކޮމިޝަންތަކާއި އެމްބަސީތަކުގެ ސިޔާސީ މަގާމުތަކުގައި ތިއްބެވި ބޭފުޅުން ނޮވެމްބަރު 18 ގެ ކުރިން ރާއްޖެ ވަޑައިގަތުމަށް ފޮރިން މިނިސްޓްރީން އޭރު އެނގި އެވެ. އަދި ޑިސެމްބަރުގެ ނިޔަލަށް އެ ބޭފުޅުންގެ ޑިޕްލޮމެޓިކް ޕާސްޕޯޓު ކެންސަލު ވާނެ ކަމަށް ވެސް އޮތީ އަންގައިފަ އެވެ.
އެގޮތަށް އެންގީ އިންތިގާލީ އޮފީހުން ވެސް ބޭނުން ވެގެންނެވެ. އެ އެންގުމާއެކު، ދިވެހި މިޝަންތަކުގައި ތިއްބެވި ބައެއް ބޭފުޅުން މަގާމުގެ މުއްދަތު އިތުރުކޮށް ދެއްވުމަށް އާ ސަރުކާރަށް ހުށަހެޅުއްވި އެވެ.
ނަމަވެސް، ކުރީގެ ސަރުކާރުން އައްޔަނުކޮށްފައިވާ ބޭފުޅުންގެ ތެރެއިން، މިޝަންތަކުގައި އަދިވެސް ތިއްބެވީ ކޮން ބައެެއް ކަމެއް ނުވަތަ އަލުން މަގާމަށް އައްޔަން ކުރެއްވީ ކޮން ބައެއް ކަމެއް ސަރުކާރުން ހާމައެއް ނުކުރެ އެވެ.
މިޒްނާގެ ވަޒީފާ ދަމަހައްޓަން ފޮރިން މިނިސްޓްރީން މި މަހު 20 ގައި ނިންމައި ލިޔުން ފޮނުވާފައި ވާއިރު، މިޒްނާގެ ބައްޕަ، ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފު ވަނީ އިއްޔެ އެމްޑީޕީން ވަކިވެވަޑައިގެންފަ އެވެ.
މިޒްނާގެ މަގާމުގެ މުއްދަތު އިތުރުކޮށް ދިންކަން ފޮރިން މިނިސްޓްރީގެ އޮފިޝަލަކު ވެސް ކަށަވަރުކޮށް ދެއްވި އެވެ. އޭނާގެ މަގާމު އިތުރުކޮށްފައި ވަނީ އަންނަ އަހަރުގެ މާޗު މަހުގެ ނިޔަލަށެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ހައި ކޮމިޝަންތަކުގެ މަގާމުތަކުގައި ސިޔާސީ ފަރާތްތަކުގެ އާއިލީ މެންބަރުން ތިއްބެވުމުން، އޭރު އިދިކޮޅުގައި ތިއްބެވި (މިހާރު ސަރުކާރުގައި ތިއްބެވި ފަރާތްތަކުން) ފާޑު ކިޔާފައިވެ އެވެ.
