އަންނަ މާޗު މަހުން ފެށިގެން އެއާ އެމްބިއުލާންސްގެ ހިދުމަތް ފެށުމަށް ނިންމައިފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހިމް ވިދާޅުވީ އިއްޔެގެ ވަޒީރުންގެ މަޖިލީހަށް ހެލްތު މިނިސްޓްރީން ހުށަހެޅީ ރާއްޖެއަށް އެއާ އެމްބިއުލާންސް ތައާރަފްކުރުމާށާއި، އެކަމަށް ބޭނުންވާ ވަސީލަތްތައް ހޯދުމަށް ކަމަށެވެ.
"އެގޮތުން ދެ އެއާ އެމްބިއުލާންސެއް އެއާ މޯލްޑިވްސްއާ ގުޅިގެން އަޅުގަނޑުމެން ކުރިން ދެންނެވިހެން މާޗު އެއްވަނަ ދުވަހުން ފެށިގެން މިނިސްޓްރީ އޮފް ހެލްތާއި އެއާ މޯލްޑިވްސް [މޯލްޑިވިއަން]އާ ގުޅިގެން ފަށާނެ." ނާޒިމް ވިދާޅުވި އެވެ.
ނާޒިމް ވިދާޅުވީ މި ހިދުމަތް ދެމުން އަންނާނީ މިހާރުވެސް އެމަޖެންސީ ހިދުމަތް ދިނުމަށް މިނިސްޓްރީ އޮފް ހެލްތުގައި އެއާ އެމްބިއުލަންސް ހިންގަން އުފައްދާފައިވާ ޑިޕާޓްމެންޓުގެ ދަށުން ކަމަށެވެ. މިއީ ކުރީ ސަރުކާރުން މި ހިދުމަތް ފެށުމުގެ ގޮތުން އުފައްދާފައިވާ ޑިޕާޓުމަންޓެކެވެ.
ސަރުކާރުން މިކަން ކުރަން ރާވާފައިވާ ގޮތާ މެދު "އަދަދު"ން ސުވާލުކުރުމުން ނާޒިމް ވިދާޅުވީ އެކަމަށް ފަންޑުކުރާނެ ގޮތެއް ނިންމާފައި ނުވީ ނަމަވެސް، އަމިއްލަ ފަރާތްތަކަށް ވެސް އެ ފުރުސަތު އެބައޮތް ކަމަށާއި އެއްވެސް އެހެން ގޮތެއް ނުވެއްޖެ ނަމަ ސަރުކާރުން ހަރަދުކޮށްގެން ވިޔަސް އެކަން ކުރަން ތައްޔާރަށް އޮތް ކަމަށެވެ.
އެގޮތުން ގެންނަ ފްލައިޓުތައް ހުންނާނީ ސްޓްރެޗަރު ހަރުކޮށް، ބަލި މީހުން އުފުލާ ވަގުތު ދޭން ބޭނުންވާ ފަރުވާ ދެވޭ ގޮތަށް ކަމަށް ނާޒިމް ވިދާޅުވި އެވެ. މި ހިދުމަތް ފަށާ ގޮތަށް ހަމަޖެހިފައި ވަނީ ދެ ފްލައިޓޫންނެވެ. އަދި މި ފްލައިޓުތައް އޮޕަރޭޓު ކުރާނީ ގައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަނުންނެވެ.
ރާއްޖޭގައި އެއާ އެމްބިއުލާންސްގެ ހިދުމަތް ތައާރަފްކުރުމަކީ ރައީސުލްޖުހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
އެގޮތުން ކެމްޕެއިންގެ ތެރެއިން އެމަނިކުފާނު ދ. ކުޑަހުވަދޫގައި ވިދާޅުވީ ރަށްރަށުގެ ބަލި މީހުން އުފުލުމުގައި މިހާރު ކުރިމަތިވާ ދަތިތައް ހައްލުކުރުމުގެ ގޮތުން ބަލި މީހުން އުފުލަން ހާއްސަ މަތިންދާބޯޓެއް ތައާރަފުކުރާނެ ކަމަށެވެ. ރައީސް އެ ދުވަހު ވިދާޅުވީ ސީޕްލޭންތަކުގައި ފުރޮޅު ހަރުކޮށް އެއާ އެމްބިއުލަންސް ހިދުމަތް ފަށާނެ ކަމަށެވެ.
މިހާރު ރާއްޖޭގައި ތިބޭ ބަލި މީހުން މާލެ ގެނައުމަށް އާންމުކޮށް ބޭނުންކުރަމުން އަންނަނީ އިންޑިއާ ސަރުކާރުން އެމްއެންޑީއެފްއަށް ހަދިޔާކޮށްފައިވާ ހެލިކޮޕްޓަރާއި، ޑޯނިއާ މަތިންދާބޯޓުތަކެވެ. ނަމަވެސް ގިނަ ފަހަރު ބަލި މީހުން އުފުލަން ޖެހެނީ ބޮޑު އަގުގައި މޯލްޑިވިއަންގެ ފްލައިޓުތައް ޗާޓަރުކޮށްގެންނެވެ.
