ކުރީގެ ރައީސް އަބްދުﷲ ޔާމީނު މިނިވަން ކުރުމަށް މަގުތަކަށް ނުނިކުމެ ތިބީ މިހާރުގެ ސަރުކާރުން އެކަން ނުކުރަން ބުނެގެން ކަަމަށާއި ނުކުންނަން ޖެހިއްޖެ ނަމަ އެކަމަށް ތައްޔާރު ކަމަށް ޔާމީނުގެ އާ ޕާޓީން ބުނެފި އެވެ.
ޕީއެންއެފުން ރޭ ބޭއްވި ޖަލްސާގައި ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ވިދާޅުވީ ރައީސް ޔާމީނަށް މި ސަރުކާރުން އެއްވެސް ދުލެއް ނުދޭ ކަމަށާއި އެހެން ނަމަވެސް މަގާމުތަކުގައި ތިބީ ޕީޕީއެމްގެ ބޭފުޅުން ކަމަށެވެ. ސަރުކާރުން ޔާމީނަށް ދުލެއް ނުދެވިގެން އުޅެނީ ކީއްވެތޯ މަލީހު ސުވާލު އުފެއްދެވި އެވެ.
"ރައީސް ޔާމީނަކީ އެ ވިދާޅުވާ ކަހަަލަ މުޖުރިމެއް ނޫނޭ. މުޖުތަމައަށް ހުރި ބިރެއް ނޫނޭ. އެހެން ހުރިހާ ބޭފުޅުންނަށް މިނިވަންކަމުގައި [އުޅެވޭ]. ސިންގަޕޫރުގައި އައިސްކްރީމް ބޮނީ، ފައިވް ސްޓާ ހޮޓަލުގައި. ހަމަ އެކަނި ރައީސް ޔާމީނު ޖަލުގައި ހުންނަވަން ޖެހޭ ސަބަބެއް ނެތޭ،" މަލީހު ވިދާޅުވި އެވެ.
ޔާމީނު ވަގުތުން މިނިވަންކުރަން އޭނާ ސަރުކާރަށް ގޮވައިލެއްވި އެވެ.
"ވަގުތުން މިނިވަން ކުރާށޭ، ތިޔަ ބޭފުޅުން ވިދާޅުވެގެންނޭ އަަޅުގަނޑުމެން ގެއަށް ވަދެ މިތިބީ. ނިކުންނަން ޖެހިއްޖެއްޔާ މިހާރު ވެސް ނިކުންނާނަމޭ، މަގުމައްޗަށް ވެސް ނުކުންނަން ޖެހިއްޖެއްޔާ ނިކުންނާނަމޭ. ޖުމްހޫރީ މައިދާނަށް ވެސް ދާން ޖެހިއްޖެއްޔާ ދާނަމޭ،" މަލީހު ވިދާޅުވި އެވެ.
ވެރިކަން ކުރާ ޕީއެންސީ އާއި އެ ޕާޓީއާ އިއްތިހާދުވެފައިވާ ޕީޕީއެމްގެ ވެސް ލީޑަރަކީ ކުރިން ޔާމީނެވެ. އެ ދެ ޕާޓީން ރިޔާސީ ކެންޑިޑޭޓެއްގެ ގޮތުގައި ފުރަތަމަ ދެއްކީ ވެސް އެމަނިކުފާނެވެ. އެހެން ނަމަވެސް އެމަނިކުފާނަށް އިއްވާފައި އޮތް ޖަލު ހުކުމަކާ ހެދި އިންތިހާބުގައި ވާދަކުރުމުގެ ފުރުސަތު ލިބިވަޑައިނުގަތީ އެވެ.
ރައީސް ޑރ. މުހައްމަދު މުއިއްޒަށް ފުރުސަތު ލިބިވަޑައިގެންނެވީ އެހެންވެ އެވެ. އިންތިހާބު ކާމިޔާބުކުރެއްވިއްޖެ ނަމަ ޔާމީނު މިނިވަން ކުރައްވަން މުއިއްޒު ވައުދުވެވަޑައިގެންނެވި އެވެ.
ރައީސް މުއިއްޒުގެ ސަރުކާރު އުފެދުމާއެކު ޕީޕީއެމް/ޕީއެންސީގެ ލީޑަޝިޕާ ހިޔާލު ތަފާތުވެ، ޔާމީން ވަނީ އެ ދެ ޕާޓީ ދޫކުރައްވައިފަ އެެވެ. ދަރިކަލުން ޒެއިން އަބްދުﷲ ޔާމީނުގެ މަސްއޫލުވެރިކަމުގައި އާ ޕާޓީއެއް އުފައްދަވަން މަސައްކަތް ފެށްޓެވީ އެހިސާބުންނެވެ.
