އާ ސަރުކާރަށް މަސް ދުވަސް ވެގެން ދިޔައިރު ވެސް މިނިސްޓްރީތަކުގެ މެންޑޭޓު ފާސްކުރަން ރައްޔިތުންގެ މަޖިލީހަށް ފޮނުވާފައި ނެތްކަން އެނގިއްޖެ އެވެ.
ގާނޫނުއަސާސީގެ 116 ވަނަ މާއްދާގެ ހ. އިން ރައީސުލްޖުމްހޫރިއްޔާއަށް ލިބިދޭ އިހުތިޔާރުގެ ދަށުން އުފައްދާފައިވާ ވުޒާރާތަކާއި، އެ ވުޒާރާތަކުގެ މަސައްކަތުގެ ދާއިރާތައް ފާސްކުރަން ރައްޔިތުންގެ މަޖިލީހަށް ފޮނުވަންޖެހެ އެވެ.
titledesc
ނޮވެމްބަރު 17 ވަނަ ދުވަހު ރައީސުލްޖުމްހޫރިޔާގެ މަގާމާ ހަވާލުވެވަޑައިގެންނެވި ޑރ. މުހައްމަދު މުއިއްޒުގެ ސަރުކާރުގައި ބަންޑާރަ ނައިބުގެ އޮފީހާއެކު ޖުމުލަ 22 މިނިސްޓްރީއެއް ހިމެނެ އެވެ.
މިނިސްޓްރީތައް އެކުލަވާލައި މަސައްކަތުގެ ދާއިރާތައް މަޖިލީހުން ފާސްކުރުމަށް ފަހު، ގެންނަ ކޮންމެ ބަދަލެއް ވެސް މަޖިލީހުން ފާސްކުރަންޖެހެ އެވެ.
މެންޑޭޓު ފާސްކުރަ ނުފޮނުވާ މައްސަލައިގައި ރައްޔިތުންގެ މަޖިލީހާއި ރައީސް އޮފީހުގެ ވެސް ބަހެއް ނުބުނެ އެވެ.
ނަމަވެސް، މައުލޫމާތު އެނގިވަޑައިގަންނަވާ ބައެއް ބޭފުޅުން "އަދަދު" ނޫހަށް ކަށަވަރުކޮށް ދެއްވި ގޮތުގައި މިނިސްޓްރީތަކުގެ މެންޑޭޓު ފާސްކުރަން އަދި މަޖިލީހަށް ނުފޮނުވަ އެވެ.
މެންޑޭޓު ފާސްކުރަން ހުށަނާޅައި ގިނަ ދުވަސްތަކެއް ވެގެން ގޮސްފައި ވާއިރު، މިިނިސްޓަރުންނަށް ރުހުން ދިނުމާމެދު ގޮތެއް ނިންމުން މިއަދު ބާއްވާ މަޖިލީހުގެ ޖަލްސާއަށް ވަނީ ތާވަލުކޮށްފަ އެވެ.
ސަރުކާރުގެ މިނިސްޓްރީތަކުގެ މެންޑޭޓު ފާސްކުރަން ނުފޮނުވައި އޮތްއިރު މިއަދު ބާއްވާ ރައްޔިތުންގެ މަޖިލީހުގެ ޖަލްސާއަކީ މިދައުރުގެ ފަހު ޖަލްސާ އެވެ. އާންމު އުސޫލުން މަޖިލީހުގެ ޖަލްސާތައް އާ ދައުރަކާއެކު ފަށާނީ އަންނަ އަހަރުގެ ފެބްރުއަރީ މަހު އެވެ.
