އިންޑިއާ ސިފައިންގެ ހެލިކޮޕްޓަރު އޮޕަރޭޝަންތަކާއި ޑޯނިއާ މަތިންދާބޯޓުގެ އޮޕަރޭޝަންތައް ހުއްޓާލުމަށް މިހާތަނަށް ސަރުކާރުން އަންގާފައި ނުވާކަން ހާމަވެއްޖެ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިތާ ހަތަރު ހަފުތާ ފާއިތުވެގެންދާއިރު އެމަނިކުފާނުގެ އެންމެ މުހިންމު ވައުދު ކަމަށްވާ އިންޑިއާ ސިފައިން ރާއްޖޭން ބޭލުމަށް ކުރަމުންދާ މަސައްކަތްތަކާ ގުޅޭގޮތުން ސަރުކާރުން އެކަށީގެންވާ މައުލޫމާތުތަކެއް މިހާތަނަށް އާންމުކޮށްފައި ނުވެ އެވެ.
މިއަދު ރައީސް އޮފީހުގައި ސަރުކާރުގެ އިސް ތަރުޖަމާނު މުހައްމަދު ޝަހީބް ބޭއްވި ނޫސްވެރިންގެ ބައްދަލުވުމެއްގައި ވެސް "އަދަދު" އިން ވަނީ ސަރުކާރުން އެ އޮޕަރޭޝަންތައް ހުއްޓާލުމަށް އަންގާފައިވޭތޯ ސާފުކުރުމަށް ސުވާލު އަމާޒުކޮށްފަ އެވެ. އެ ސުވާލަށް އޭނާ ދެއްވީ ވަރަށް ކުރުކުރު ޖަވާބެކެވެ.
އަންގާފައި ނުވޭ
މީގައި އެބައުޅޭ އަދަދުތަކެއް ވޭރީވާ [ބަދަލުވާ]. މީގެ ލިޔެކިޔުންތަކާ އެއްޗެހި މުޅިން ފައިނަލްކޮށްގެންނޭ އަޅުގަނޑުމެންނަށް މީޑިއާއާ ހާމަކުރެވޭ އަދަދެއް ދެންނެވޭނީ. ސަރުކާރުގެ ކަމާގުޅޭ އިދާރާތަކުގެ މެދުގައި މި މައުލޫމާތުތައް ބަދަލު އެބަކުރޭ," ޝަހީބް ވިދާޅުވި އެވެ.
ރައީސް އޮފީހުން އެންމެފަހުން ހާމަކޮށްފައިވާ ގޮތުން އިންޑިއާގެ 89 ސިފައިން ރާއްޖޭގައި އެބަތިއްބެވެ. މި އަދަދު ރައީސް ޑރ. މުހައްމަދު މުއިއްޒު ވެސް ކުރިން ހާމަކުރެއްވި އެވެ.
ސަރުކާރުން އެންމެ ފުރަތަމަ އިއުލާނުކުރީ ރާއްޖޭގައި ތިބީ 77 ސިފައިން ކަމަށެވެ. އޭގެ ފަހުން އިންޑިއާގެ އިސް އޮފިޝަލަކު ވަނީ އެ އަދަދުގެ ތެރޭގައި ސެނަހިޔާގައި ތިއްބަވާ މިލިޓަރީ ޑޮކްޓަރުން ނުހިމެނޭ ކަމަށް ވިދާޅުވެފަ އެވެ. އަދި, އެ ނުވަ ޑޮކްޓަރުން ހިމެނުމުން އަދަދު އަރަނީ 86 އަށެވެ.
ރާއްޖޭގައި ތިބި އިންޑިއާ ސިފައިން ބޭރު ކުރުމަކީ މިހާރު ރައީސް ޑރ. މުހައްމަދު މުއިއްޒުގެ މުޅި ރިޔާސީ ކެމްޕޭން ބިނާވި އެމަނިކުފާނުގެ އެންމެ މުހިންމު ރިޔާސީ ވައުދެވެ.
ކޮޕް-28 ގެ ހަވާސާގައި އިންޑިއާގެ ބޮޑުވަޒީރު ނަރެންދުރަ މޯދީއާ އެކު ބޭއްވި ބައްދަލުވުމުގައި، އިންޑިއާ އިން އެ ގައުމުގެ ސިފައިން އަނބުރާ ގެންދިއުމަށް އެއްބަަސްވި ކަމަށް ރައީސް ވިދާޅުވި އެވެ. ނަމަވެސް, އެކަމާ ގުޅިގެން ނޫސްވެރިން ސުވާލުތައް ކުރިމަތިވުމުން ރައީސް އިތުރު ތަފުސީލެއް ނުދެއްވަ އެވެ.
އިންޑިއާގެ ނޫސްތަކުން، އެ ގައުމުގެ އޮފިޝަލުންނާ ހަވާލާދީ ބުނެފައިވާ ގޮތުން މިހާތަނަށް ދެ ގައުމުން މިފަދަ އެއްބަސްވުމަކަށް އާދެވިފައެއް ނުވެ އެވެ.
