ފެނަކަ ކޯޕަރޭޝަން ހިންގުމުގައި ބޮޑެތި ގޯސްތަކެއް ހަދާފައި އެބަހުރި ކަމަށާއި ކުންފުނިން "އިން ހައުސް" ކޮށް ހިންގި ގިނަ ޕްރޮޖެކްޓްތަކުން ލިބުނީ ގެއްލުން ކަމަށް ކުންފުނީގެ އާ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވެއްޖެ އެވެ.
"އަދަދު" އަށް ދެއްވި ހާއްސަ އިންޓަވިއުއެއްގައި މުއާޒު ވިދާޅުވީ އޭނާ ފެނަކައާ ހަވާލުވެވަޑައިގެންނެވި އިރު ކުންފުނީގެ ދަރަނި ހަތަރު ބިލިއަން ރުފިޔާއަށް އަރާފައިވާ ކަމަށާއި ފެނަކަ ހިންގަމުން އައިސްފައިވަނީ ކުންފުންޏެއް ހިންގަންޖެހޭ އެންމެ ބެސްޓް ޕްރެކްޓިސް އެއްގައި ނޫން ކަމަށެވެ.
އެގޮތުން, ޕްރޮކިއުމަންޓުން ފެށިގެން ގޮސް މުވައްޒަފުން ނެގުމާއި މެނޭޖުކުރުމުގެ އިތުރުން ޕެޓީކޭޝް މެނޭޖުކުރުމާއިި ދަރަނި ދެއްކުން ފަދަ މާލީ ކަންތައްތަކުގައި ވެސް ބޮޑެތި ގޯސްތަކެއް ހަދާފައި ހުރިކަން ފާހަގަކުރެވިފައިވާ ކަމަށް އޭނާ ވިދާޅުވި އެވެ.
"ހުރިހާ ރަށެއްވެސް އެއް ހާލަތެއްގަ އޮތީ، ޕްރޮޖެކްޓްތަކަށް ކޮންޓްރެކްޓް އެހާ ބައިވަރު ސްޓާފުން ނަގާފައިވާއިރު ހިނގަންޖެހޭ ސްޕީޑުގަ ޕްރޮޖެކްޓުތައް ނުހިނގާ. އަދި ޕްރޮޖެކްޓުތަކަށް ގެންދެވުނު މެޓީރިއަލްތައް ގެންގޮސްފައި ހުރީ އެކަށީގެންވާ މިންވަރަށްތޯ ބެލިފައެއް ނެތް. ޕެޓީކޭޝް ފޮނުވުމުގައިވެސް ހަމަޖެހޭ އުސޫލެއްގެ ދަށުންނެއް ނޫން ކަންތައް ކޮށްފައި ހުރީ. ޕެޓީ ކޭޝް ބޭނުންކުރުން ރަނގަޅަށް ބެލެހެއްޓިފައެއްވެސް ނެތް،" މުއާޒު ވިދާޅުވި އެވެ.
ސަރުކާރުގެ ކުންފުނިތަކުގެ ތެރެއިން އެންމެ މުވައްޒަފުން ގިނައީ ފެނަކަ ކޯޕަރޭޝަންގަ އެވެ. މި އަހަރުގެ ނޮވެމްބަރާ ހަމަޔަށް އެކުންފުނީގައި 8،108 މުވައްޒަފުން ތިއްބެވެ. އޭގެ ތެރެއިން 2،199 މުވައްޒަފުންނަކީ ޕްރޮޖެކްޓްތައް ނެގި ކޮންޓްރެކްޓް މުވައްޒަފުން ކަމަށް ކުންފުނީގެ ކުރީގެ އެމްޑީ އަހުމަދު ސައީދުވެސް ވަނީ ވިދާޅުވެފަ އެވެ.
މުއާޒު ފާހަގަކުރެއްވި ގޮތުގައި ޕްރޮޖެކްޓުތަކާއި ނުބައްދަލު އަދަދުތަކަށް މުވައްޒަފުން ނަގައި ބޮޑު މުސާރަ ދެމުން ދިޔައިރު ޕްރޮޖެކްޓްތަކުގެ މަސައްކަތް ލަސްވުމުން ކުންފުންޏަށް ދިޔައީ އެތައް ގެއްލުމެއް ކުރިމަތި ވަމުންނެވެ. އަދި ރަށްރަށުގެ އިންޖީނުގެ ތަކާއި ފެންޕްލާންޓްތަކަށް ތަކެތި ފޮނުވާފައިވާއިރު އެތަންތަނުގައި ގާއުމުކޮށްފައި ހުންނަ މެޝިނަރީތަކާއި ނުވެސް ގުޅޭ ސްޕެއާތައް ގަނެފައި ފޮނުވާފައި ހުރިކަން އޭނާ ފާހަގަކުރެއްވި އެވެ.
"މިސާލަކަށް ފަސް މިލިއަނަށް ނޫނީ 10 މިލިއަނަށް ނަގާ ޕްރޮޖެކްޓެއް ވިއްޔާ އެ ޕްރޮޖެކްޓް ނިމޭއިރު އަރާ އިނގޭތޯ ފެނަކައިގެ (ހަރަދަށް) ގާތްގަނޑަކަށް އޭގެ އެތައް ގުނައެއް އިތުރަށް. އެއީ ސްޓާފް ކޮސްޓް، އެއީ މެޓީރިއަލް ކޮސްޓް. މިހުރިހާ ކަމެއް ނިމޭއިރު ގިނަ ޕްރޮޖެކްޓުތަކުން ހުންނަނީ ގެއްލުންވެފަ،" މުއާޒު ވިދާޅުވި އެވެ.
މުއާޒު ވިދާޅުވި ގޮތުގައި މަޝްރޫއުތަކުން އެގޮތައް ގެއްލުންވާންޖެހެނީ ފެނަކައިން އަމިއްލައަށް ކުންފުނީގެ މަޝްރޫއުތައް ހިންގާތީ އެވެ. އެހެންވެ އެފަދަ ކަންތައްތައް ހައްލުކޮށް ކުންފުނި ހިންގުމުގައި މިހާތަނަށް ހަދާފައިހުރި ގޯސްތައް ހައްލުކުރުމަށް ޕްލޭނެއް އެކުލަވާލައި އެއަށް މަސައްކަތްތަކެއް ކުރަމުންދާކަމަށް ވިދާޅުވި އެވެ.
އެގޮތުން, ފެނަކައިގެ އާމްދަނީ އިތުރުކޮށް ހަރަދު ކުޑަކުރުމަށް ޕްލޭންތަކެއް ހަދާފައިވާ ކަމަށާއި ފެނަކަ ރީސްޓްރަކްޗާ ކުރުމުގެ މަސައްކަތްތަކެއް މިހާރު ކުރަމުންދާ ކަމަށް މުއާޒު ވިދާޅުވި އެވެ. އަދި ކުރިއަށް އޮތް ތިންމަހެއް ހާ ދުވަސްތެރޭ ކުންފުނި ރީސްޓްރަކްޗާ ކުރުމުގެ މަސައްކަތް ނިންމާލެވޭނެ ކަމަށް ވެސް އޭނާ ވިދާޅުވި އެވެ.
ފެނަކައިގެ މަތިބަރުވާހަކަ އަކީ އާ ވާހަކައެއް ނޫނެވެ. ސިޔާސީ ޓޫލްއަކަަށް ކުންފުނި ބޭނުންކުރަމުން އައިކަމުގެ އެތައް ތުހުމަތެއް ކޮށްފައިވާއިރު ކުންފުނީގެ ދަރަނި އިންތިހާ އެވެ. އަދި ކުންފުނީގެ އެކި އެކި މަޝްރޫއުތަަކަށް ތަކެތި ސަޕްލައިކޮށްދިން އަމިއްލަ ވިޔަފާރިތަކަށް ފައިސާ ނުދޭ މައްސަލަވެސް އޭރު އޮތީ ބޮޑުވެފަ އެވެ.
