ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ވައިސް ޗީފް އޮފް ޑިފެންސް ފޯސްގެ މަގާމަށް ބްރިގޭޑިއާ ޖެނެރަލް އިބްރާހިމް ހިލްމީ މިއަދު އައްޔަނު ކުރައްވައިފި އެވެ.
ބްރިގޭޑިއާ ޖެނެރަލް ހިލްމީ މީގެ ކުރިން ހުންނެވީ ކޯސްޓު ގާޑުގެ ކޮމާންޑަންޓުގެ މަގާމުގަ އެވެ. ހިލްމީ ސިފައިންގެ ވަޒީފާއަށް ވެންނެވީ އޭޕްރީލް 25، 1988، ގަ އެވެ.
ބްރިގޭޑިއަރ ޖެނެރަލް ހިލްމީ ވަނީ ޑިފެންސް އިންސްޓިޓިއުޓް ފޯ ޓްރެއިނިން އެންޑް އެޑިއުކޭޝަންގެ ކޮމާންޑިން އޮފިސަރުކަމާއި ޕްލޭންސް، ޕޮލިސީ އެންޑް ރިސޯސް މެނޭޖްމަންޓުގެ ޕްރިންސިޕަލް ޑައިރެކްޓަރުކަމާއި ޑިޕާޓްމަންޓް އޮފް އިންޓަނޭޝަނަލް ޑިފެންސް ކޯޕަރޭޝަން އެންޑް ޕޮލިސީގެ ޕްރިންސިޕަލް ޑައިރެކްޓަރުގެ މަގާމު އަދާ ކުރައްވައިފަ އެވެ.
އޭގެ އިތުރުން، އޭވިއޭޝަން ސެކިއުރިޓީ ކޮމާންޑުގެ ކޮމާންޑަރކަމާއި ސެންޓްރަލް އޭރިއާ ކޮމާންޑުގެ ކޮމާންޑަރުގެ މަގާމުގައި ވެސް ހުންނެވި އެވެ.
ވައިސް ޗީފް އޮފް ޑިފެންސް ފޯސްގެ މަގާމަށް ހިލްމީ އައްޔަނު ކުރުމުގެ އިތުރުން ސިފައިންގެ ސަދަން އޭރިއާ ކޮމާންޑުގެ ކޮމާންޑަންޓުގެ މަގާމަށް މިއަދު ކާނަލް މުހައްމަދު ޖަމްޝާދު ވަނީ އައްޔަނުކޮށްފަ އެވެ.
ސިފައިންގެ ބައެއް މަގާމުތަކަށް މިއަދު ބަދަލު ގެނައިއިރު، ދިގު މުއްދަތަކު ހިދުމަތް ކުރެއްވުމަށްފަހު ދެ މޭޖާ ޖެނެރެލަކު އިއްޔެ ވަނީ ރިޓަޔާ ކުރައްވައިފަ އެވެ. އެއީ މޭޖާ ޖެނެރަލް ހާމިދު ޝަފީގު އާއި މޭޖާ ޖެނެރަލް ވައިސް ވަހީދެވެ.
ހާމިދު ޝަފީގު ސިފައިންގެއިން ރިޓަޔާ ކުރެއްވުމުން ރަައީސް މުއިއްޒު ވަނީ އޭނާ ނެޝަނަލް ސެކިއުރިޓީ އެޑްވައިޒަރަކަށް އައްޔަނު ކުރައްވައިފަ އެވެ.
