ނިމިދިޔަ ސަރުކާރުން ރާއްޖޭގައި ތިބި އިންޑިއާ ސިފައިންގެ އަދަދު އޮތީ އޮޅުން ބޮޅުން ކޮށްފައި ކަަމަށާއި އެ އޮޅުންތައް ފިލުވަން ވަގުތު ނަގާނެ ކަމަށް ސަރުކާރުން ބުނެފި އެވެ.
ސަރުކާރުން ފުރަތަމަ ރާއްޖޭގައި އިންޑިއާގެ 77 ސިފައިން ތިބި ކަމަށް އިއުލާނުކުރި ނަމަވެސް މިހާރު ވަނީ އެ ނަމްބަރަކީ ސީދާ އަދަދުކަން ކަށަވަރު ނުވާ ކަމަށް ބުނެފަ އެވެ. އެގޮތުން ރައީސް ޑރ. މުހައްމަދު މުއިއްޒު ވަނީ ސިފައިންގެ އަދަދު އެކި ލިޔެކިޔުންތަކުގައި އެކި ވަރަށް ހުރި ކަމަށް ވިދާޅުވެފަ އެވެ. އެގޮތުން 77 އާއި 89 އަކާ ދެމެދުގެ އަދަދުތަކެއް ފެންނަ ކަމަށް ވިދާޅުވި އެވެ.
ރާއްޖޭގައި ތިބޭ އިންޑިއާ ސިފައިންނާ ބެހޭ ގޮތުން "އަދަދު" އަށް މައުލޫމާތު ދެއްވި އިންޑިއާގެ އިސް އޮފިޝަލަކު ވިދާޅުވީ ސަރުކާރުން އެ ބުނާ އިތުރުވާ ސިފައިންނަކީ ސެނަހިޔާގައި މަސައްކަތް ކުރާ އެ ގައުމުގެ މިލިޓަރީ ނުވަ ޑޮކްޓަރުން ކަމަށެވެ. އެއާއެކު ޖުމްލަ ސިފައިންގެ އަދަދު 86 އަށް އަރާނެ އެވެ.
މިކަމާ ގުޅިގެން ސުވާލުކުރުމުން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ވިދާޅުވީ، އިންޑިއާ ސިފައިން ރާއްޖޭގައި ތިބި ވަރެއް ބެލުމުގެ މަސައްކަތް އަދިވެސް ދަނީ ކުރިއަށް ކަމަށާއި އެ ފަރާތްތަކުން ރާއްޖޭގައި ތިބި ހުރިހާތަނަކާއި، ތިބި ޕްރޮފެޝަން ތަކަކީ ކޮބައިތޯ ސަރުކާރުގެ ކަމާއިބެހޭ އިދާރާތަކުން ދެނެގަންނާނެ ކަމަށެވެ.
"ކަމާއިބޭ އިދާރާތަކުން ތަފުސީލުތައް ހާމަކުރައްވާނެ، ވެރިކަމިގެ ފުރަތަމަ ދުވަހުން ފެށިގެން އެކަން އެދަނީ ކުރަމުން، އޮޅުން ބޮޅުން އަރުވާފަ އޮތް ކަމެއްވީމަ އޮޅުން ފިލުވަން ވަގުތު ނަގާނެ"
މީގެއިތުރުން ހަލީލު ވިދާޅުވީ ސަރުކާރުގެ ފުރަތަމަ ދުވަހު އިއުލާނުކުރީ އެ ދުވަހާ ހަމައަށް ޔަގީންވި އަދަދު ކަމަށެވެ. އަދި އިތުރަށް ދިރާސާކޮށް އިތުރަށް މައުލޫމާތު އެއްކުރަމުންދާ ކަމަށްވެސް ތަކުރާރުކޮށް ވިދާޅުވި އެވެ.
ރާއްޖޭގައި ތިބި އިންޑިއާ ސިފައިން ބޭރު ކުރުމަކީ މިހާރު ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެ ވައުދާ އެއްގޮތަށް އެމަނިކުފާނު ވަނީ އިންޑިއާގެ އާތު ސައިންސެސް މިނިސްޓަރު، ކިރެން ރިޖިޖޫގެ އަރިހުގައި ރާއްޖޭގައި ތިބި އިންޑިއާ ސިފައިން ގައުމުން ބޭލުމަށް އެދިފަ އެވެ.
އަދި ކޮޕް28 ގެ ހަވާސާގައި އިންޑިއާގެ ބޮޑުވަޒީރު ނަރެންދުރަ މޯދީއާ އެކު ބޭއްވި ބައްދަލުވުމުގައި، އިންޑިއާ އިން އެ ގައުމުގެ ސިފައިން އަނބުރާ ގެންދިއުމަށް އެއްބަަސްވި ކަމަށް ރައީސް ވިދާޅުވި އެވެ. ނަމަވެސް, އެކަމާ ގުޅިގެން ނޫސްވެރިން ސުވާލުތައް ކުރިމަތިވުމުން ރައީސް އިތުރު ތަފުސީލެއް ނުދެއްވަ އެވެ.
އިންޑިއާގެ ނޫސްތަކުން، އެ ގައުމުގެ އޮފިޝަލުންނާ ހަވާލާދީ ބުނެފައިވާ ގޮތުން މިހާތަނަށް ދެ ގައުމުން މިފަދަ އެއްބަސްވުމަކަށް އާދެވިފައެއް ނުވެ އެވެ.
