ޕީޕީއެމްގެ ފުރަތަމަ ވެރިކަމުގައި ފޮރިން މިނިސްޓަރުގެ މަގާމު އަދާކުރެއްވި ދުންޔާ މައުމޫން، ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ޕީއެންސީގެ ޓިކެޓުގައި ވާދަކުރެއްވުމަށް ފޯމު ހުށަހަޅުއްވައފި އެވެ.
ހުޅުމާލެ ދެކުނު ދާއިރާގެ ޕީއެންސީ ޕްރައިމަރީގައި ވާދަކުރައްވާނެކަން ދުންޔާ އިއުލާނުކުރެއްވީ އޭނާގެ އެކްސް އެކައުންޓުން ކުރެއްވި ޕޯސްޓެއްގަ އެވެ.
އެ ޕޯސްޓުގައި ލިޔުއްވާފައިވަނީ ހުޅުމާލެ ދެކުނުގެ ރައްޔިތުންނަށް އޭނާގެ ފުރިހަމަ ހިދުމަތް ލިބޭނެ ކަމަށެވެ. އަދި އެ ފަރާތްތަކުގެ ފުރިހަމަ ތާއީދަށް އެދިލައްވާފައިވެ އެވެ.
ރާއްޖޭގައި 30 އަހަރު ވެރިކަން ކުރެއްވި މައުމޫން އަބްދުލްގައްޔޫމްގެ ދަރިކަނބަލުން ދުންޔާ، ނިމިގެން ދިޔަ ރިޔާސީ އިންތިހާބުގެ ފުރަތަމަ ބުރާ ހަމައަށް އުޅުއްވީ އެމްއެންޕީގަ އެވެ. ނަމަވެސް ދެ ވަނަ ބުރުގައި ޕީއެންސީގެ ކެންޑިޑޭޓު، އަދި މިހާރުގެ ރައީސް ޑރ. މުހައްމަދު މުއިއްޒަށް ތާއިދު ކުރެއްވި އެވެ.
ކުރީގެ ރައީސް އަބްދުﷲ ޔާމީނަށް ބޮޑުބޭބެ ވިދާޅުވާ ދުންޔާ ކުރިން ފާހަގަވެފައި ވަނީ ސިޔާސީ ކަންކަމުގައި ޔާމީނާއެކު ހުންނެވި ބޭފުޅެއްގެ ގޮތުގަ އެވެ. ޔާމީންގެ ވެރިކަމުގައި ބައްޕާފުޅު ޖަލަށް ލުމުން ވެސް ދުންޔާ އާއި މިހާރުގެ ޑިފެންސް މިނިސްޓަރު ޣައްސާނު މައުމޫނު އެކަމާ ދެކޮޅަށް ތެދުވެވަޑައިގެން އަޑުއުފުލައި، މުޒާހަރާތަކުގައި ބައިވެރިވެވަޑައިގެންފައި ނުވެފަ އެވެ.
