ރައީސް ޑރ. މުހައްމަދު މުއިއްޒު އެކުލަވާލެއްވި އާ ވަޒީރުންގެ މަޖިލީހަށް އައްޔަންކުރެއްވި 22 ވަޒީރުންގެ ޝަރުތު ހަމަވާ ކަމަށް ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ ނިންމައިފި އެވެ.
މިއަދު ބޭއްވި ކޮމިޓީގެ ބައްދަލުވުމުގައި ފާސްކޮށްފައިވަނީ 22 ވަޒީރުންގެ ޝަރުތު ހަމަވާ ކަމަށް އެއް ރިޕޯޓެއް އެކުލަވާލައި، މަޖިލީހުގެ ތަޅުމުގައި ވަކިވަކިން ވޯޓަށް އެހުމަށެވެ. އެގޮތަށް ކޮމިޓީއަށް ހުށަހެޅުއްވީ އިހަވަންދޫ ދާއިރާގެ މެންބަރު މުހައްމަދު ޝިފާއު އެވެ. އެ ހުށަހެޅުން ފާސްވީ ކޮމިޓީ މެމްބަރުންގެ އިއްތިފާގުންނެވެ.
ވަޒީރުންގެ ޝަރުތު ހަމަވޭތޯ ކޮމިޓީން އެއްކުރި ލިޔުންތަކުން އެންމެ ބޮޑަށް ފާހަގަވީ ދެ ވަޒީރެއްގެ އަތުގެ އެހެން ގައުމެއްގެ ޕާސްޕޯޓު އޮތުމެވެ. ނަމަވެސް އެ ދެ ވަޒީރުންވެސް ވަނީ މަގާމާ ހަވާލުވުމުގެ ކުރިން އެ ގައުމުތަކުގެ ރައްޔިތުކަން ވަނީ ދޫކޮށްލާފަ އެވެ. އެކަން ޔަގީންކުރަން އެދުމުން ރައީސް އޮފީހުން ވަނީ މަޖިލީހަށް އެކަމާ ގުޅޭ ލިޔުންވެސް ހުށަހަޅާފަ އެވެ.
އާ ސަރުކާރުގެ ކެބިނެޓުގައި ހިމެނިވަޑައިގަންނަވާ ބޭފުޅުން:
- މިނިސްޓާ އޮފް ޑިފެންސް މުހައްމަދު ގައްސާން މައުމޫން
- މިނިސްޓާ އޮފް ފޮރިން އެފެއާޒް މޫސާ ޒަމީރު
- މިނިސްޓާ އޮފް ފިނޭންސް ޑރ. މުހައްމަދު ޝަފީގު
- އެޓާނީ ޖެނެރަލް އަހްމަދު އުޝާމް
- މިނިސްޓާ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން
- މިނިސްޓާ އޮފް އިކޮނޮމިކް ޑިވެލޮޕްމެންޓް އެންޑް ޓްރޭޑް މުހައްމަދު ސައީދު
- މިނިސްޓާ އޮފް އެޑިއުކޭޝަން ޑރ. އިސްމާއިލް ޝަފީއު
- މިނިސްޓާ އޮފް ޓޫރިޒަމް އިބްރާހިމް ފައިސަލް
- މިނިސްޓާ އޮފް ހައުސިން, ލޭންޑް އެންޑް އާބަން ޑިވެލޮޕްމެންޓު ޑރ. އަލީ ހައިދަރު
- މިނިސްޓާ އޮފް އިސްލާމިކް އެފެއާޒް ޑރ. މުހައްމަދު ޝަހީމް އަލީ ސައީދު
- މިނިސްޓާ އޮފް ހެލްތު ޑރ. އަބްދުالله ހަލީލް
- މިނިސްޓާ އޮފް ފިޝަރީޒް އެންޑް އޯޝަން ރިސޯސަސް އަހްމަދު ޝިޔާމް
- މިނިސްޓާ އޮފް ސިޓީސް, ލޯކަލް ގަވަމެންޓު އެންޑް ޕަބްލިކް ވޯކްސް އާދަމް ޝަރީފް އުމަރު
- މިނިސްޓާ އޮފް ޓްރާންސްޕޯޓް އެންޑް ސިވިލް އޭވިއޭޝަން މުހައްމަދު އަމީން
- މިނިސްޓާ އޮފް ހަޔާ އެޑިއުކޭޝަން, ލޭބާ އެންޑް ސްކިލްސް ޑިވެލޮޕްމެންޓް ޑރ. މަރިޔަމް މާރިޔާ
- މިނިސްޓާ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ ޑރ. އަބްދުالله މުއްތޮލިބު
- މިނިސްޓާ އޮފް އެގްރިކަލްޗާ އެންޑް އެނިމަލް ވެލްފެއާ ޑރ. އައިޝަތު ރަމީލާ
- މިނިސްޓާ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑރ. އައިޝަތު ޝިހާމް
- މިނިސްޓާ އޮފް ކްލައިމެޓް ޗޭންޖު, އެންވަޔަރަމަންޓު އެންޑް އެނާޖީ ތޯރިގު އިބްރާހިމް
- މިނިސްޓާ އޮފް ދިވެހި ލޭންޖުއޭޖް, ކަލްޗާ އެންޑް ހެރިޓޭޖު އާދަމް ނަސީރު އިބްރާހިމް
- މިނިސްޓާ އޮފް ޔޫތު އެމްޕަވާމަންޓު, އިންފޮމޭޝަން އެންޑް އާޓްސް އިބްރާހިމް ވަހީދު (އަސްވާޑު)
- މިނިސްޓާ އޮފް ސްޕޯޓްސް, ފިޓްނެސް އެންޑް ރެކްރިއޭޝަން ޑރ. އަބްދުالله ރާފިއު
މިއީ މިހާތަނަށް ރާއްޖޭގައި އެކުލަވައިލި އެންމެ ގިނަ މިނިސްޓަރުން އެކުލެވޭ ކެބިނެޓެވެ. މި ކެބިނެޓުގައި ހިމެނޭ އަންހެން މިނިސްޓަރުންގެ އަދަދަކީ ތިނެކެވެ.
ރައީސް މުއިއްޒު އެކުލަވާލި މި ކެބިނެޓުގައި ހިމެނޭ ބައެއް ވަޒީރުންނަށް ރުހުން ނުދިނުމަށް އިދިކޮޅު އެމްޑީޕީއިން ދަނީ މަޝްވަރާކުރަމުންނެވެ. އެ ޕާޓީއަށް މަޖިލީހުގެ 56 މެންބަރުންގެ މެޖޯރިޓީއެއް އޮވެ އެވެ. ބައެއް ވަޒީރުންނަށް ރުހުން ނުދިނުމަށް އޭގެ ތެރެއިން ބައެއް މެންބަރުން މަޖިލީހުގެ ޖަލްސާތަކުގައި ވެސް ވަނީ ގޮވާލާފަ އެވެ.
ނަމަވެސް ރައްދުދެއްވަމުން ރައީސް މުއިއްޒު ވިދާޅުވީ، ވަޒީރުންނަށް ރުހުން ނުދިނުމަށް އިދިކޮޅު ޕާޓީއަކުން ނިންމާނީ ރުހުން ނުދޭވަރުގެ ކަންކަން ދިމާ ވުމުން ކަމަށެވެ.
"އެއީ ޒިންމާދާރު ވުމެއް ނޫން، ކެބިނެޓަށް ރުހުން ނުދޭ ވަރު ކަމެއްތޯ ދުނިޔޭގެ އެހެން ގައުމުތަކުގެ މިންގަނޑުން ވެސް ވިސްނާލަން ޖެހޭނެ. ރުހުން ނުދޭނީ ރުހުން ނުދޭ ވަރު ކަންކަން ވީމަ. އަޅުގަނޑު ހިތުން ވަރަށް ޒިންމާދާރު ވާނެ ރާއްޖޭގެ ސިޔާސީ ޕާޓީތައް. އަޅުގަނޑަށް ޔަގީން ވަރަށް ޒިންމާދާރު އިދިކޮޅު ޕާޓީއެއް އޮންނާނީ،" މިދިޔަ ހަފުތާ ބޭއްވި ނޫސްވެރިންގެ ބައްދަލުވުމެއްގައި ރައީސް ވިދާޅުވި އެވެ.
