އެޑީކޭ ހޮސްޕިޓަލުގެ "އެމްޕްލޯއީ ޕާފޯމަންސް އެވޯޑްސް" ނައިޓްގައި އެ ހޮސްޕިޓަލުގެ 150 އެއްހާ މުވައްޒަފުންގެ އަގުވަޒަންކޮށް އެވޯޑު ދީފި އެވެ.
ގިޔާސުއްދީން ސްކޫލްގައި ރޭ ބޭއްވި ހަފުލާގައި އޭޑީކޭގެ 2022 ވަނަ އަހަރުގެ އެންމެ ރަނގަޅު މުވައްޒަފަކަށް ހޮވުނީ، އެ ހޮސްޕިޓަލުގެ ކްލިނިކަލް ސަޕޯޓް ސާވިސްގެ ކޯޑިނޭޓަރު ސީމާ މުހައްމަދެވެ. މީގެ 14 އަހަރު ކުރިން 2009 ވަނަ އަހަރު އެ ކުންފުންޏާ ގުޅުނު ސިމާ އަށް، އެވޯޑަކާއި 15،000ރ. ގެ ފައިސާގެ އިނާމާއި ކެންޔާގެ ވައިލްޑް ލައިފް ސަފާރީ ދަތުރެއް ދިނެވެ.
ހަ ދާއިރާއަކުން 150 އެއްހާ މުވައްޒަފުން ވަނަތަކަށް ހޮވުނުއިރު، އޭގެ ތެރޭގައި ވަރަށް ހާއްސަ 11 އެވޯޑެއް ހިމެނެ އެވެ. އެއީ އެމްޕްލޯއީ އޮފް ދަ އިޔާގެ އިތުރުން ގޯލްޑް އަދި ސިލްވާ ޕާފޯމަންސް އެވޯޑެވެ. ގޯލްޑް އެވޯޑު ލިބުނު ފަސް ފަރާތަށް 10،000ރ. ގެ ފައިސާގެ އިނާމަކާއި ސިލްވާ އެވޯޑް ލިބުނު ފަސް ފަރާތަށް 7،500ރ. ގެ ފައިސާގެ އިނާމު އޭޑީކޭ އިން ދިނެވެ.
އެގާރަ ވަނަ ފަހަރަށް ބޭއްވި އެމްޕްލޯއީ ޕާފޯމަންސް އެވޯޑްސް ނައިޓުގައި ހާޒިރީ އެންމެ ރަނގަޅު މުވައްޒަފުންނާއި ގިނަ ދުވަހު ހިދުމަތްކުރި މުވައްޒަފުންނަށް ވެސް އިނާމު ދީފައިވެ އެވެ.
ހަފްލާގައި ވާހަކަ ދައްކަވަމުން އޭޑީކޭގެ މެނޭޖިން ޑިރެކްޓަރު އަހުމަދު އަފްއާލް ވިދާޅުވީ ކުރިއަށް އޮތް ތަނުގައި ކޮންމެ އަހަރަކު ހާޒިރީން 100 ޕަސެންޓް ހޯދާ މުވައްޒަފުންނަށް ފަސް ދުވަހުގެ އިތުރު ޗުއްޓީއެއް މުސާރައާއެކު ދިނުމަށް ބޯޑުން ނިންމާފައިވާ ކަމަށެވެ.
އޭޑީކޭއަކީ ރާއްޖޭގެ އެންމެ ފުރަތަމަ އަމިއްލަ ހޮސްޕިޓަލެވެ. މެޑިކްލިނިކް ގެ ނަމުގައި 1987 ފެށި ހިދުމަށް 1992 ވަނަ އަހަރު އޭޑީކޭ މެޑިކްލަ ސެންޓާ އަށް ބަދަލުކޮށް، އޭޑީކޭ ހޮސްޕިޓަލުގެ ނަމުގައި ހިދުމަތް ދޭންފެށީ 1996 ވަނަ އަހަރު އެވެ.
