އާ ސަރުކާރަށް 18 ދުވަސް ފާއިތުވި އިރުވެސް، ރާއްޖޭގައި ތިބި އިންޑިއާ ސިފައިންގެ އަދަދު ޔަގީންކަމާއެކު އެނގިވަޑައިނުގަންނަވާ ކަމަށް ވިދާޅުވުމުން، ރައްޔިތުންގެ މަޖިލީހުގެ އިދިކޮޅު ބައެއް މެމްބަރުން ރައީސް ޑރ. މުހައްމަދު މުއިއްޒަށް މިއަދު ފާޑުވިދާޅުވެއްޖެ އެވެ.
ރައީސް އިއްޔެ ބޭއްވި ނޫސްވެރިންގެ ބައްދަލުވުމުގައި ނޫސްވެރިން ތަކުރާރުކޮށް ސުވާލުކުރީ އިންޑިއާ ސިފައިންގެ ސީދާ އަދަދު އެނގިވަޑައިގަންނަވާތޯ އެވެ. އެހެންނަމަވެސް، އެ އަދަދު ޔަގީންކަމާއެކު ވިދާޅުވާން ރައީސަށް އެނގިވަޑައިނުގެންނެވި އެވެ. މިއަދު ބޭއްވި މަޖިލީހުގެ ޖަލްސާގައި ވާހަކަ ދައްކަވަމުން އިދިކޮޅު މެމްބަރުންް ވަނީ އެކަމަށް ފާޑުވިދާޅުވެފަ އެވެ.
"އެ އަދަދު އެއަށްވުރެ ވެސް އިތުރު ވެދާނެކަމަށް ގަބޫލު ކުރިން، އެހެންނަމަވެސް، ވެރިކަން ބަދަލު ވެގެން 20 ދުވަސް ވެގެން ދިޔައިރު ރާއްޖޭގެ ރައީސް ވިދާޅުވަނީ 89 ސިފައިންނޭ މިހާރު ތިބީ، ހަތިޔާރު އޮތުމާއި ނެތުން މުހިންމެއް ނޫނޭ، އެކި ވުޒާރާތަކުން ދެއްވަނީ އެކި އަދަދޭ، އެހެންވީމަ އަދަދު ސާފު ނުވެގެނޭ މިއުޅެނީ،" އިއްޔެ ރައީސް ދެއްކެވި ވާހަކައަށް އިޝާރާތްކުރައްވައި ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވި އެވެ.
ވެރިކަމާ ހަވާލުވުމަށްފަހު، ރާއްޖޭގައި ތިބީ 77 ސިފައިން ކަމަށް މީގެ ކުރިން ސަރުކާރުން ހާމަ ކޮށްފައިވެ އެވެ. ނަމަވެސް ރައީސް އިއްޔެ ވިދާޅުވީ ކުރިން ސަރުކާރުން ހާމަކުރި އަދަދަށްވުރެ އިންޑިއާ ސިފައިން އިތުރުވުން އެކަށީގެންވާ ކަމަށެވެ.
މިއަދު މަޖިލީހުގައި ވާހަކަ ދައްކަވަމުން ޒިޔާދު ވިދާޅުވީ، ބިރުވެރިކަމަކީ 77 އިން 89 އަށް 15 ދުވަސް ތެރޭ ސިފައިންގެ އަދަދު އިތުރުވެގެން ދިޔުމެވެ. މި އަދަދު އިތުރުވަނީ ކިހިނެއްތޯ ބެލުން މުހިންމު ކަމަށް ވެސް ޒިޔާދު ވިދާޅުވި އެވެ. ޑިފެންސް މިނިސްޓަރު ގައްސާން މައުމޫންއާ މިއަދު ކުރަން ޖެހޭ އެންމެ މުހިންމު ސުވާލަކީ އެއީ ކަމަށް ޒިޔާދު ވިދާޅުވި އެވެ.
"ޑޮކްޓަރުންނާއި ނަރުހުންނާ ލައިގެން ވެސް އެބޭފުޅުން އެ ވިދާޅުވާ އަދަދު ހަމައެއް ނުވޭ،" ޒިޔާދު ވިދާޅުވި އެވެ.
އޭގެ އިތުރުން، އިންޑިއާ ސިފައިން ތިބި އަދަދު ނޭނގޭތީ ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް ވެސް ވަނީ މިއަދުގެ ޖަލްސާގައި ސަރުކާރަށް ފާޑުވިދާޅުވެފަ އެވެ.
"18 ދުވަސް ފަހުން ތިބީ ކިހާ އަދަދެއްތޯ ބަލަން ސުވާލުކުރީމަ މި ބުނަނީ އަދި ބަލާލަންށޭ ޖެހޭނީ، ހަތިޔާރު އެޅި ސިފައިން ހޯދާ ވާހަކަ މި ދައްކަނީ. ހޮރުތަކުގައި ތިބި މީދާތަކެއް ހޯދާ ވާހަކައެއް ނޫން،" ޝަހީމް ވިދާޅުވި އެވެ.
ރާއްޖެ އާއި އިންޑިއާ ސަރުކާރާމެދު ވެފައިވާ އެއްބަސްވުންތައް ހާމަކޮށްފައިނުވާތީ ވެސް ޝަހީމް ވަނީ ސަރުކާރަށް ފާޑުވިދާޅުވެފަ އެވެ.
"ކޮޕް ސަމިޓަށް ވަޑައިގެން އިންޑިޔާ ސިފައިން ފޮނުވާލުމަށް އެވީ އެއްބަސްވުން ހާމަ ކުރާށޭ، ރާއްޖޭގެ މިލްކުވެރިކަމާއި އިސްތިގްލާލާއި މިނިވަންކަން ގެއްލޭ ފަދަ ގޮތަށް ކުރީ ސަރުކާރުން ވެފައިވާ ކަމަށް އެ ބުނާ އެއްބަސްވުންތައް ހާމަ ކުރާށޭ، އެ މާއްދާތައް ވެސް ހާމަ ކުރާށޭ،" ޝަހީމް ވިދާޅުވި އެވެ.
ވެރިކަމުގެ ފުރަތަމަ ދުވަހު ވެސް، އިންޑިޔާ ސިފައިން ރާއްޖެއިން ފޮނުވާލުމުގެ މަސައްކަތް ފައްޓަވާނެ ކަމަށް ރައީސް މުއިއްޒު ވިދާޅުވެފައިވެ އެވެ. ރާއްޖޭގައި އެތައް ހާސް އިންޑިޔާ ސިފައިން ތިބި ކަމަށް އަލްޖަޒީރާއަށް ދެއްވި އިންޓަވިއުއެއްގައި ވެސް ރައީސް ވިދާޅުވި އެވެ.
