ރާއްޖޭގައި އިންޑިއާ ސިފައިން ތިބޭ ތިބުމާ ގުޅުގައި، މުޅިން އާ ތުހުމަތެއް ރައްޔިތުންގެ މަޖިލީހުގެ ތުލުސްދޫ ދާއިރާގެ ޕީއެންސީ މެންބަރު އިބްރާހީމް ނަސީމު ކުރައްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ބާރަށު ދާއިރާގެ އެމްޑީޕީ މެންބަރު އަހުމަދު އަބްދުﷲ ހުށަހެޅުއްވީ ރާއްޖޭގައި ތިބި އިންޑިއާ ސިފައިން އަނބުރާ ގެންދަން އެ ގައުމުން އެއްބަސްވެފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވުމުން، އެކަމުގެ އެއްބަސްވުން ހާމަކުރަން ގޮވައިލައި ކުއްލި މައްސަލައެކެވެ.
އެ ބަހުސްގައި ޕީއެންސީ މެންބަރު ނަސީމު ވިދާޅުވީ ކުއްލި މައްސަލަ ހުށަހެޅުއްވީ ސަރުކާރުން އިއްޔެ ނިންމި މުހިއްމު ނިންމުންތައް "އެމްޑީޕީއަށް ހަޖަމް ނުވެގެން" ކަަމަށެވެ. ނުރުހުން ފާޅުކުރައްވައި އޭނާ ވިދާޅުވީ ރާއްޖޭގައި ތިބި އިންޑިއާ ސިފައިންގެ ލިޔެކިޔުންތައް ރަނގަޅަށް ނެތް ކަމަށެވެ.
"އިންޑިއާ ސިފައިން ނުވަތަ އެހެން ގައުމެއްގެ ސިފައިން ރާއްޖޭގައި ތިބޭ މިންވަރު މި ސަރުކާރުން ހާމަކުރާނެ. ހާމަ ނުކުރެވިގެން އުޅެނީ ޑޮކިއުމަންޓްތައް ހަމައަށް ނެތީމާ. މުއައްސަސާތަކުން މައުލޫމާތު ދެއްވަނީ އެކި އަދަދު. އަދި އެއްވެސް ލިޔުމަކާ ނުލައި ވެސް ބައެއް ބޭބޭފުޅުން ތިބިކަމަށް ވޭ،" ނަސީމު ވިދާޅުވި އެވެ.
މަޖިލީހުގެ ޕީއެންސީ މެންބަރަކު މި މޭރުމުން ވާހަކަ ދެއްކެވިއިރު ރައީސް މުއިއްޒު އިއްޔެ ވިދާޅުވީ ރާއްޖޭގައި ތިބި އިންޑިއާ ސިފައިންގެ ސީދާ އަދަދު ސާފުކޮށް ވިދާޅުވާން އަދިވެސް އެނގިވަޑައިނުގަންނަވާ ކަމަށެވެ.
އިންޑިއާ ސިފައިން ރާއްޖެއިން ބޭލުމަކީ އެމަނިކުފާނުގެ ރިޔާސީ އެންމެ ބޮޑު ވައުދެވެ. މުޅި ކެމްޕޭން ބިނާ ކުރެއްވީ އެކަމުގެ މައްޗަށެވެ. އިއްޔެ ބޭއްވި ކެބިނެޓު ބައްދަލުވުމުގެ ނިންމުންތައް ހާމަކުރަން ބޭއްވި ނޫސްވެރިންގެ ބައްދަލުވުމުގައި އެންމެ ގިނަައިން އަމާޒުވީ ވެސް އިންޑިއާ ސިފައިންގެ އަދަދާ ގުޅޭ ސުވާލެވެ.
އެންމެ ފުރަތަމަ އެކަމާ ގުޅޭ ގޮތުން ޖަވާބު ދެއްވަން ދެކޮޅު ހެއްދެވުމަށް ފަހު، ތަކުރާރުކޮށް އެ ސުވާލު އަމާޒުވުމާ ގުޅިގެން ރައީސް މުއިއްޒު ވަނީ އެކަމާ ގުޅޭ ކަންކަން ކުރުމަށް ފޮރިން މިނިސްޓްރީ އާއި ޑިފެންސް މިނިސްޓްރީ އަދި ރައީސް އޮފީސް ހިމެނޭ ކޮމިޓީއަކުން ހިނގަމުންދާކަން ހާމަކުރައްވާފަ އެވެ.
"ލިބުނު ލިޔުންތަކުން އެކި ފަހަރު އެކި އަދަދު ހުރީ އައިސްފައި, 77 އިން 89 އަށް އެބަދޭ, އެވެސް ސާފެއް ނޫން. އަދިވެސް ހުރިހާ މައުލޫމާތެއް ސާފެއް ނޫން. އެއަށްވުރެ އިތުރު ވެސް ވެދާނެ," އިއްޔެގެ ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވި އެވެ.
ރައީސް މުއިއްޒު ސަރުކާރާ ހަވާލުވެވަޑައިގަތުމަށް ފަހު ސަރުކާރުން ބުނީ ރާއްޖޭގައި ތިބީ 77 ސިފައިން ކަމަށެވެ.
