ފްލެޓާއި ގޯތި ލިބޭނެ ކަމަށް ކުރީގެ ސަރުކާރުން ގެޒެޓްކުރި ލިސްޓްތަކުގައި ހިމެނުނު މީހުންގެ ތެރެއިން މަކަރެއް ހަދަައިގެން ހިމެނުނު މީހަކު ފިޔަވައި އެއްވެސް މީހަކަށް ފްލެޓް ނުވަތަ ގޯތި ނުގެއްލޭނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު މިއަދު ދެއްވައިފި އެވެ.
ރިޔާސީ އިންތިހާބުގެ ކެމްޕެއިނުގައި ރައީސް މުއިއްޒު ވިދާޅުވީ އޭރު އޮތް ސަރުކާރުން ދީފައިވާ އެއްވެސް ފްލެޓެއް ނުވަތަ ގޯއްޗެއް އަތުނުލައްވާނެ ކަމަށެވެ. ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެމަނިކުފާނު ވިދާޅުވީ ފްލެޓާއި ގޯތީގެ ކަންތައް ކުރިއަށް ގެންދަވާނީ އޭރު ވައުދުވެވަޑައިގެންނެވި ގޮތަށް ކަމަށެވެ. އޭރު ގެޒެޓް ކުރި ލިސްޓްތަކުގައި ހިމެނޭ މީހުންގެ ތެރެއިން ލިއުމެއް ނުލިބި ހުރި މީހުންނަށް ވެސް ފްލެޓާއި ގޯތި ލިބޭނެ ކަމަށް ވެސް އެމަނިކުފާނު ވިދާޅުވި އެވެ.
"ރަސްމީކޮށް ގެެޒެޓްކޮށްފައި އޮވެއްޖެއްޔާ އެމީހާއަށް އެއޮތީ [ފްލެޓް ނުވަތަ ގޯތި] ލިބިފައި. އަދި ލިޔުން ނުލިބިވެސް ހުރެދާނެ ބައެއް ފަރާތްތަކަށް، ރަޖިސްޓްރީ ނުހެދި ވެސް ހުރެދާނެ. އެއީ އަދި އެހެން ކަމެއް، އެެހެންވީމާ ފައިނަލް ލިސްޓެއް ގެޒެޓްކުރެވިފައި އޮވެއްޖެއްޔާ އެއޮތީ ސަރުކާރުގެ ނިންމުމެއް. ދެން ސަރުކާރުގެ ނިންމުމެއް އޮވެއްޖެއްޔާ ލިބޭނެ،" ރައީސް ވިދާޅުވި އެވެ.
އެކަމުގައި އިސްތިސްނާ ވާނީ އެމަނިކުފާނު ވިދާޅުވި ގޮތުގައި މަކަރެއް ހަދައިގެން ދޮގު މައުލޫމާތެއް ހުށަހަަޅައިގެން ލިސްޓެއްގައި ހިމެނުނު މީހުންނެވެ. އެފަދަ މައްސަލަތައް ނިންމާނީ އެންޓި ކޮރަޕްޝަން ކޮމިޝަން ފަދަ އިދާރާތަކުން ކަމަށް ވެސް ރައީސް ވިދާޅުވި އެވެ.
އެހެން ނަމަވެސް ފްލެޓެެއް ނުވަތަ ގޯއްޗެއް ލިބޭނެ ކަމަށް މީހަކު ލިސްޓްކުރުމުގައި އަމަލުކޮށްފައިވާ ގޮތާ ބެހޭ ގޮތުން މައްސަލައެއް ޖައްސައިފި ނަމަ ކަމާ ބެހޭ އިދާރާއަކުން ބެލުމަކީ މުޅިން އެހެން ކަމެއް ކަމަށް ވެސް އެމަނިކުފާނު ވިދާޅުވި އެވެ.
"މިސާލަކަށް ވަކިން އެހެން ފަރާތަކުން މައްސަލަ ޖައްސަނީ މީހަކު ނުގަވައިދުން [ފްލެޓެއް ނުވަތަ ގޯއްޗެއް] ހޯދާފައި އޮތްތޯ ބަލަން. އެއީކީ އެއް މިކަމާ ގުޅޭ ކަމެއް ނޫން، މިސާލަކަށް މީހަކު އޮތީ މަކަރު ހަދައިގެން އޮޅުވާލައިގެން، ނުބައި މައުލޫމާތެއް ފޯޖްކޮށްގެން ލައިގެން ޕޮއިންޓް ހަމަކޮށްގެން ލިބިފައި، އެއީ ވަކި ކޭސްއެއް،" ރައީސް ވިދާޅުވި އެވެ.
އެފަދަ މައްސަލަތައް އޭސީސީ ނުވަތަ އެހެން މުއައްސަސާއަކުން ވެސް ބަލައިފާނެ ކަމަށާއި އެފަދަ ކަމެއް ކޮށްފައި އޮތް މީހަކަށް ޝަރުއީ ހުކުމެއް އައިސްދާނެ ކަމަށް ވެސް އެމަނިކުފާނު ވިދާޅުވި އެވެ.
