ރާއްޖޭގައި ތިބި އިންޑިއާ ސިފައިންގެ އަދަދު އަދިވެސް ސާފުކޮށް ދަންނަވަން ނޭނގޭ ކަމަށާއި އެކި އޮފީސްތަކުން އެކަމުގައި ހިއްސާކޮށްފައިވާ މައުލޫމާތުތަކުގައި ފުށުއެރުންތަކެއް ހުރި ކަމަށް ރައީސް ޑރ. މުހައްމަަދު މުއިއްޒު ހާމަކުރައްވައިފި އެވެ.
އިންޑިއާ ސިފައިން ރާއްޖެއިން ބޭލުމަކީ އެމަނިކުފާނުގެ ރިޔާސީ އެންމެ ބޮޑު ވައުދެވެ. އަދި, މުޅި ކެމްޕޭން ބިނާ ކުރެއްވީ އެކަމުގެ މައްޗަށެވެ. މިއަދު ރައީސް އޮފީހުގައި ކެބިނެޓު ބައްދަލުވުމުގެ ނިންމުންތައް ހާމަކުރަން ބޭއްވި ނޫސްވެރިންގެ ބައްދަލުވުމުގައި އެންމެ ގިނަައިން އަމާޒުވީ ވެސް އިންޑިއާ ސިފައިންގެ އަދަދާ ގުޅޭ ސުވާލެވެ.
އެންމެ ފުރަތަމަ އެކަމާ ގުޅޭގޮތުން ޖަވާބު ދެއްވަން ދެކޮޅު ހެއްދެވުމަށް ފަހު ތަކުރާރުކޮށް އެ ސުވާލު އަމާޒުވުމާ ގުޅިގެން ރައީސް މުއިއްޒު ވަނީ އެކަމާ ގުޅޭ ކަންކަން ކުރުމަށް ފޮރިން މިނިސްޓްރީ އާއި ޑިފެންސް މިނިސްޓްރީ އަދި ރައީސް އޮފީސް ހިމެނޭ ކޮމިޓީއަކުން ހިނގަމުންދާކަން ހާމަކުރައްވާފަ އެވެ.
"ލިބުނު ލިޔުންތަކުން އެކި ފަހަރު އެކި އަދަދު ހުރީ އައިސްފައި, 77 އިން 89 އަށް އެބަދޭ, އެވެސް ސާފެއް ނޫން. އަދިވެސް ހުރިހާ މައުލޫމާތެއް ސާފެއް ނޫން. އެއަށްވުރެ އިތުރު ވެސް ވެދާނެ," މިއަދުގެ ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވި އެވެ.
ރައީސް މުއިއްޒު ސަރުކާރާ ހަވާލުވެވަޑައިގަތުމަށް ފަހު އެއް ދުވަސް ފަހުން އެމަނިކުފާނުގެ ރަސްމީ އޮފީހުން ހާމަކުރީ ރާއްޖޭގައި ތިބީ އިންޑިއާގެ 77 ސިފައިން ކަމަށެވެ.
އެއަށްފަހު އެމަނިކުފާނު މިފަހުން ތުރުކީއަށް ކުރެއްވި ދަތުރުފުޅު ނިންމަވާލެއްވުމަށް ފަހު ރާއްޖެ ވަޑައިގެން ނޫސްވެރިން އެ ސުވާލު އަމާޒުކުރެއްވުމުން ވިދާޅުވީ ފަހުން ބައްލަވާލެއްވުމަށް ފަހު އަދަދެއް ވިދާޅުވާނެ ކަމަށެވެ.
އެމަނިކުފާނު ފަހުން ބައްލަވާލެއްވުމަށް ފަހު މިއަދު ވެސް ވަކި އަދަދެއް ސާފުކޮށް ނުދަންނަވަ އެވެ. ވިދާޅުވީ އަދަދު އަދި ސާފު ނުވާ ކަމަށެވެ. މިއަދު ވެސް ވިދާޅުވީ އެ އަދަދު ފަހަރެއްގައި އިތުރުވެސް ވެދާނެ ކަމަށެވެ.
