އެސްޓީއޯގެ ސަބްސިޑަޔަރީއެއްގެ ގޮތުގައި ހިންގުމުގެ ބަދަލުގައި މިފްކޯއަކީ ކުރިން އޮތް ގޮތަށް ވަކި ކުންފުންޏެއްގެ ގޮތުގައި ހިންގަން ސަރުކާރުން ނިންމައިފި އެވެ.
މިފްކޯ ވަކިކުންފުންޏަަކަށް ބަދަލުކުރާކަން އިއުލާނުކުރެއްވީ މިއަދުގެ ކެބިނެޓް މީޓީން އަށް ފަހު ރައީސް ޑރ. މުހައްމަދު މުއިއްޒު ބޭއްވެވި ނޫސްކޮންފަރެންސްގަ އެވެ.
ކުރީގެ ރައީސް މައުމޫނުގެ ވެރިކަމުގައި މިފްކޯ ފުރަތަމަ އުފެއްދީ ވަކިކުންފުންޏެއްގެ ގޮތުގަ އެވެ. އެކުންފުނީގެ ވިޔަފާރީގައި ގެއްލުން ބޮޑުވެ، ބަނގުރޫޓުވުމާ ގާތަށް ގޮސްފައި ވަނިކޮށް އެކަން ހައްލުކުރުމުގެ ގޮތުން އެސްޓީއޯގެ ސަބްސިޑަޔަރީ އަކަށް ބަދަލުކުރީ ކުރީގެ ރައީސް އަބްދުﷲ ޔާމީނުގެ ވެރިކަމުގަ އެވެ.
މިއަދުގެ ނޫސްވެރިންގެ ބައްދަލުމުގައި ރައީސް މުއިއްޒު ވިދާޅުވީ އެސްޓީއޯގެ ސަބްސިޑަޔަރީއެއްގެ ގޮތުގައި މިފްކޯ އޮތް އޮތުން ނިމުމަކަށް ގެނެސް 100 ޕަސެންޓް ސަރުކާރު ހިއްސާވާ ކުންފުންޏަކަށް ބަދަލުކުރައްވަން ނިންމެވީ މަސްވެރިކަމުގެ ދާއިރާ ހަރުދަނާ ކުރެއްވުމަށް ކަަމަށެވެ.
"އޭގެ ބޭނުމަކީ ކުރިއަށް އޮތް ދުވަސްތަކުގައި މަސްވެރިކަމުގެ ދާއިރާ ހަރުދަނާކޮށް ކުރިއަށް ގެންދިއުމުގައި، މަސްވެރިންނަށް އަޅުގަނޑު ވެފައިވާ ވައުދުތައް ހާސިލުވުމުގައި މަގުފަހިކުރުން،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ދެން ކުރިއަށް ދާނީ އެ ނިންމުމުގެ އިޖުރާއީ މަސައްކަތްތައް ކަމަށެވެ.
މަސްވެރިންގެ ކޯޕަރޭޓިވް އެއް އުފައްދައި އެ ކޯޕަރޭޓިވްގެ ހިއްސާދާރަކަށް މިފްކޯ ހެދުމަކީ މުއިއްޒުގެ ރިޔާސީ ވައުދެކެވެ. އެމަނިކުފާނު މިއަދު ވިދާޅުވި ގޮތުގައި އެ މަސްވެރިންގެ ކޯޕަރޭޓިވްގެ ހިއްސާދާރަކަށް މިފްކޯ ހަދަން މަގުފަހިވާނީ ވެސް ވަކިކުންފުންޏަކަށް ބަދަލުކުރުމުންނެވެ.
