ކޮޕް-28 ގެ ހަވާސާގައި އިންޑިއާގެެ ބޮޑުވަޒީރު ނަރެންދުރަ މޯދީއާ އެކު ބޭއްވި މަޝްވަރާ ބައްދަލުވުމުގައި ދެ ގައުމުގެ މެދުގައި އެކުލަވާލަން އެއްބަސްވި ކޮމިޓީން އިންޑިއާ ސިފައިން އަނބުރާ ފޮނުވާލުމާ ގުޅޭ މަސައްކަތްތަކެއް ނުކުރާނެ ކަމަށް ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހިމް ހަލީލް ވިދާޅުވެފައިވީ ނަމަވެސް އެ ވާހަކަތައް ރައީސް ޑރ. މުހައްމަދު މުއިއްޒު ދޮގުކުރައްވައިފި އެވެ.
ރާއްޖޭގައި ގާއިމުވެގެން ތިބި އިންޑިއާގެ ހުރިހާ ސިފައިން ބޭލުމަކީ ރައީސް މުއިއްޒުގެ މުޅި ރިޔާސީ ކެމްޕޭން ބިނާވި އެމަނިކުފާނު އެންމެ މުހިންމު ވައުދެވެ. ކޮޕް-28 ގެ ހަވާސާގައި މޯދީ އާއެކު ބޭއްވެވި ބައްދަލުވުމުގައި އެފަދަ މަޝްވަރާތަކެއް ކުރިކަން ދެ ގައުމުގެ ސަރުކާރުން ވެސް ހާމަކޮށްފައި ނުވެ އެވެ. އެފަދަ އެއްވެސް ވާހަކައެއް މީޑިއާއަށް ވެސް ތިލަވެފައި ނުވެ އެވެ.
އެ ބައްދަލުވުމުގައި ދެ ދެ ގައުމުގެ ގުޅުން ބަދަހި ކުރަން މަތީ ފަންތީގެ ކޮމިޓީއެއް އުފައްދަން މަޝްވަރާ ކުރި ކަމަށް ރިޕޯޓުކުރި އެވެ.
""މިހާރުވެސް ދެ ގައުމުގެ ދޭތެރޭގަ މަތީ ލެވެލްގަ ހިނގަމުންދާ މަޝްވަރާއެއް އެއީ، އެހެންވީމަ ދެ ގައުމުގެ އެންމެ އިސް ވެރިން ބައްދަލުކޮށްލާ އިރު އަލަށް ފެށޭ ކަންތައްތަކާ ބެހޭގޮތުން ކަންނޭނގެ ބޮޑަށް އިސްކަންދެއްވާނީ ދެއްތޯ," އެ ކޮމިޓީއާ ގުޅޭގޮތުން "އަދަދު" ނޫހުން ސުވާލު ކުރުމުން ހަލީލް ވިދާޅުވެފައިވެ އެވެ.
ރާއްޖޭން ބޭރަށް ކުރެއްވި ފުރަތަމަ ދަތުރުފުޅު ނިންމަވާލެއްވުމަށް ފަހު އެނބުރި ވަޑައިގެން ނޫސްވެރިންނާ ބައްދަލުކުރައްވައި ރައީސްއާ އެ ކޮމިޓީއާ ގުޅޭގޮތުން "އަދަދު" ނޫހުން ކުރި ސުވާލަށް ޖަވާބު ދެއްވަމުން އެމަނިކުފާނު ވަނީ ހަލީލް ހިއްސާކުރީ ދޮގު މައުލޫމާތުތަކެއް ކަމަށް ވިދާޅުވެފަ އެވެ.
"ރައީސް އޮފީހަކުން ނުދެއްވާނެ ތި މައުލޫމާތެއް. އަޅުގަނޑު މި ދަންނަވަނީ ތެދު މައުލޫމާތު," އެ ކޮމިޓީއާ ގުޅޭގޮތުން ރައީސް ވިދާޅުވި އެވެ.
އަދި, އެފަދަ ކޮމިޓީއެއް އެކުލަވާލެއްވުމަށް ހުށަހެޅުއްވީ އެމަނިކުފާނު ކަމަށާއި އެކަން ވަގުތުން މޯދީ ގަބޫލުކުރެއްވި ކަމަށް ރައީސް މުއިއްޒު ވިދާޅުވި އެވެ.
ރައީސް އޮފީހުން އެ މައުލޫމާތު "އަދަދު" އާ ހިއްސާކުރީ އެ ކޮމިއުނިކޭޝަންސް އޮފީސް ހިންގެވުމާ ހުންނެވި ހަލީލެވެ. އެ މައުލޫމާތު ރަނގަޅު ކުރުމަށް ދަންނަވާނެ ކަމަށް ވެސް ރައީސް މުއިއްޒު ވިދާޅުވި އެވެ.
ކޮޕް 28 ސަމިޓުގެ ހަވާސާގައި ބޮޑުވަޒީރު މޯދީއާ އެކު ބޭއްވެވި ބައްދަލުވުމުގައި އިންޑިއާގެ ސިފައިން ބޭލުމަށް އެމަނިކުފާނު ދިވެހި ރައްޔިތުންގެ ނަމުގައި އެދިފައިވާ ކަމެއް ހާމަކޮށްފައި ނުވެ އެވެ. ސިފައިންނާ ގުޅޭ އެއްވެސް ވާހަކައެއް ރައީސް އޮފީހުން ހާމަކުރި ހަބަރުތަކުގައި ވެސް އަދި އެކްސްގައި ކުރި ޕޯސްޓުތަކުގައި ބަޔާންކޮށްފައި ނުވެ އެވެ.
އަދި, އިންޑިއާގެ އިދާރާތަކާއި މޯދީ ކުރެއްވި ޓްވީޓުތަކުގައި ވެސް އެކަން ފާހަގަކޮށްފައި ނުވެ އެވެ.
