ފޮރިން މިނިސްޓްރީގެ ސްޓޭޓް މިނިސްޓަރުކަމަށް އައްޔަންކުރިތާ ތިން ދުވަސްތެރޭ މަގާމުން ވަކިކުރި ސިވިލް ސާވިސް ކޮމިޝަން (ސީއެސްސީ) ގެ ކުރީގެ ރައީސް މުހައްމަދު ފަހުމީ ހަސަން، ވަކި ކުރެއްވީ ރައީސް ޑރ. މުހައްމަދު މުއިއްޒު ނަމަވެސް ވަކި ސަބަބެއް ބަޔާން ނުކުރައްވާ ކަމަށް ރައީސް އޮފީހުން ބުނެފި އެވެ.
ފޮރިން މިނިސްޓްރީގެ ސްޓޭޓް މިނިސްޓަރުގެ މަގާމަށް ފަހުމީ އައްޔަންކުރީ މި މަހުގެ 20 ވަނަ ދުވަހު އެވެ. ފަހުމީ ސީއެސްސީގެ ރައީސްކަމުން ވަކިކުރީ އެ މަގާމުގައި ހުންނަވަނިކޮށް ފެންމަތިވި ޖިންސީ ފުރައްސާރައިގެ މައްސަލައަކާ ގުޅިގެންނެވެ.
އާ ސަރުކާރުން އޭނާއަށް ދިން މަގާމާއެކު އެ މައްސަލައާ ގުޅުވާ ގިނަ ބައެއްގެ ފާޑުކިޔުން ފަހުމީ އަދި ރައީސް މުއިއްޒުއަށް އަމާޒުވި އެވެ. އެ ފާޑުކިޔުންތަކާއެކު، މި މަހު 24 ގައި ރައީސް ވަނީ ފަހުމީ މަގާމުން ވަކިކުރައްވާފަ އެވެ. އެކަަން ކުރެއްވީ ގާނޫނުން ރައީސަށް ލިބިދޭ ބާރުގެ ދަށުން ކަން، ރައީސް އޮފީހުގެ ސްޓްރެޓެޖިކް ކޮމިޔުނިކޭޝަން މިނިސްޓަރު އިބްރާހިމް ހަލީލު ވަނީ "އަދަދު" އަށް ކަށަވަރުކޮށްދީފަ އެވެ.
"ފަހުމީ ވަކިކުރެއްވި އިރުގަ ވަކި ސަބަބެއް ބަޔާންކޮށްފައެއް ނެތް، ގާނޫނު އަސާސީގެ ދަށުން ރައީސުލްޖުމްހުރިއްޔާގެ މަސައްކަތްޕުޅު ހިންގެވުމަށް ހަމަ ބޭފުޅުން އައްޔަންކުރެއްވުމާ ވަކިކުރެއްވުމަށް އޮންނަ ބާރުގެ ދަށުން އައްޔަންކުރެވި ވަކިކުރެވިގެން ދިޔައީ،" ހަލީލު ވިދާޅުވި އެވެ.
ފަހުމީއަށް މަގާމު ދިންކަން އިއުލާނުކޮށް ރައީސް އޮފީހުގެ އޮފިޝަލް އެކްސް އެކައުންޓުން ކުރި ޕޯސްޓަށް އާންމުން ވަނީ ރައީސް މުއިއްޒު އަށާއި އެމަނިކުފާނުގެ ސަރުކާރަށް އަމާޒުކޮށް ފާޑުކިޔާފަ އެވެ. އަދި, މިއީ އަންހެނުންގެ ހައްގުތައް ރައްކާތެރިކުރުމުގެ ވައުދާއެކު އައި ސަރުކާރަކުން ކޮށްގެންވާނެ ކަމެއް ނޫން ކަމަށް ވެސް ގިނަ ބަޔަކު އެދުވަހު ބުންޏެވެ.
"އަޅުގަނޑަށް އެނގޭ ގޮތުން ރައީސް މުއިއްޒު ވިދާޅުވީ މަގާމުތަކަށް އައްޔަނުކުރާނީ އެންމެ ގާބިލު މީހުން ކަމަށް. މިއީތޯ އަޅުގަނޑުމެންނަށް ލިބޭ ބަދަލަކީ؟ މަސައްކަތުގެ މާހައުލުގައި އަންހެނުންނަށް ޖިންސީ ފުރައްސާކުރާ މީހެއް؟ މިކަން ބަލައެއް ނުގަނެވޭނެ," އެކްސްގައި އަންހެނަކު ބުނެފައިވެ އެވެ.
ބައެއް ފަރާތްތަކުން ވަނީ ފަހުމީ އައްޔަން ކުރުމަކީ ސަރުކާރުން ގަސްތުގައި ކޮށްފައިވާ ކަމެއް ކަމަށް ބުނެ ފަހުމީއަކީ "ދައުލަތަށް ބަލަދު އަރާ" މީހެއްގެ ގޮތުގައި ސިފަކޮށްފަ އެވެ.
ސީއެސްސީގެ ރައީސްގެ މަގާމުން ފަހުމީ ވަކިކުކުރުން
ފަހުމީގެ މައްސަލައެއް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ބަލަން ފެށީ ޖޫން 4, 2012 ގައި އޭނާއާ ގުޅޭގޮތުން ސީއެސްސީގެ އަންހެން މުވައްޒަފަކު ހުށަހެޅި ޖިންސީ ފުރައްސާރައިގެ މައްސަލައަކާ ގުޅިގެންނެވެ. އެ މައްސަލައިގެ ޖިނާއީ ތަހުގީގެއް ފުލުހުންގެ އިދާރާއިން ވެސް ކުރި އެވެ.
އެ މައްސަލަ ހުށަހެޅި އަންހެން މުވައްޒަފާއި ފަހުމީގެ ބަސް ވެސް ޖޫން 11, 2012 ގައި އޮތް ކޮމިޓީ ބައްދަލުވުމުގައި ނަގާފައިވެ އެވެ. އޭގެ އިތުރުން, ސީއެސްސީގެ އެހެން މެމްބަރުންނާއި މައްސަލަ ހުށަހެޅި އަންހެން މުވައްޒަފުގެ ލިޔުމުގައި ފާހަގަކޮށްފައިވާ އެހެން މީހުންނާއި ވެސް ކޮމިޓީން ބައްދަލުކޮށްފައިވެ އެވެ.
އެއަށްފަހު ޖޫން 26, 2012 ގައި އޮތް ކޮމިޓީ ބައްދަލުވުމުގައި މައްސަލައާ މެދު ކޮމިޓީގެ މެމްބަރުންނަށް ފެނިވަޑައިގަންނަވާ ގޮތާ މެދު ވޯޓަށް އަހާފައި ވެ އެވެ.
ރައްޔިތުންގެ މަޖިލީހުގެ ތަޅުމަށް އެ ކޮމިޓީ ރިޕޯޓު ހުށަހަޅުއްވަމުން މުގައްރިރުގެ މަގާމުގައި ހުންނެވި ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދު (ކުއްޓި ނަޝީދު) ހާމަކުރެއްވި ގޮތުގައި ފަހުމީ އެފަދަ އަމަލެއް ކުރެއްވި ކަން ކޮމިޓީގެ ހޯދުންތަކުން ސާބިތުވާކަމަށް ކޮމިޓީގައި ތިއްބެވި 10 މެމްބަރުންގެ ތެރެއިން ހަތް މެމްބަރަކު ވޯޓު ދެއްވި ކަމަށެވެ.
އެއާއެކު އޭނާ މަގާމުން ވަކިކުރުމަށް ފަސް މެމްބަރަކު ތާއީދު ކުރެއްވިއިރު ޖިނާއީ ތަހުގީގު ނިމެންދެން ފިޔަވަޅު ނާޅައި ލަސްކުރުމަށް ވެސް ފަސް މެމްބަރަކު ވޯޓު ދެއްވި އެވެ. ވޯޓު އެއްވަރުވުމުން މުގައްރިރު ނަޝީދު ވޯޓު ދެއްވީ ފަހުމީ މަގާމުން ވަކިކުރުމަށެވެ.
މި ރިޕޯޓު މަޖިލީހަށް ހުށަހެޅީ ނޮވެމްބަރު 20, 2012 ގަ އެވެ. އެ ދުވަހު ނެގި ވޯޓުގައި މަޖިލީހަށް ހާޒިރުވެ ތިއްބެވި 74 މެމްބަރުންގެ ތެރެއިން 38 މެމްބަރުން އޭނާ މަގާމުން ވަކިކުރަން ވޯޓު ދިނެވެ. އޭނާ މަގާމުން ވަކިކުރުމާ ދެކޮޅަށް ވޯޓު ދެއްވީ 32 މެމްބަރުންނެވެ. އަދި ދެ މެމްބަރަކު ވަކި ކޮޅަކަށް ވޯޓު ދެއްވާފައި ނުވެ އެވެ.
ފަހުމީ މަގާމުން ވަކިކުރީ ދުސްތޫރީ އުސޫލުތަކުގެ ބޭރުން ކަމަށާއި, ގާނޫނު އަސާސީގެ ބޭރުން ކަމަށް ބުނެ އޭނާ ރައްޔިތުންގެ މަޖިލީހާ ދެކޮޅަށް ސުޕްރީމް ކޯޓަށް ޑިސެމްބަރު 11, 2012 ގައި މައްސަލައެއް ހުށަހެޅި އެވެ. އަދި, އެ މައްސަލަ ސުޕްރީމް ކޯޓުން އޭނާއާ އެއްކޮޅަށް މާޗު 14, 2013 ގައި ނިންމާފައި ވެ އެވެ. ހަތް ފަނޑިޔާރުގެ ބެންޗުން ތަފާތުވީ ހަމައެކަނި މިހާރު އުއްތަމަ ފަނޑިޔާރަކަށް ހުންނެވި ފަނޑިޔާރު މުއުތަސިމް އަދުނާނުގެ ރައުޔެވެ.
