މި މަހު 17 ގައި ވެރިކަމާ ހަވާލުވެވަޑައިގެންނެވި ރައީސް ޑރ. މުހައްމަދު މުއިއްޒު، ރިޔާސީ ގަނޑުވަރު ، މުލިއާގެއަށް ބަދަލުވެވަޑައިގަތުމުގެ ކުރިން، އެ ގަނޑުވަރުގައި މިހާރު ކުރިއަށް ގެންދަނީ އެ ގޭގައި އާ ވަސީލަތްތަކެއް ގާއިމުކުރުމުގެ މަސައްކަތް ކަމަށް ރައީސް އޮފީހުން ބުނެފި އެވެ.
"އަދަދު" އަށް މައުލޫމާތު ދެއްވަމުން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ވިދާޅުވީ އެ މަސައްކަތް ކުރިއަށް ގެންދަނީ ސިފައިންގެ ބެލުމުގެ ދަށުން ކަމަށާއި މައިގަނޑު ގޮތެއްގައި ކުރަނީ އިތުރު ވަސީލަތްތަކެއް ގާއިމުކުރުމުގެ މަސައްކަތް ކަމަށެވެ.
"އާ ފެސިލިޓީސް ގާއިމުކުރުމުގެ މަސައްކަތް ކުރެވެމުން އެބަދޭ، ދެން ގިނަ ދުވަސްވެފަ ހުރި ތަންތަނުގަ ކުޑަކޮށް އާބާތުރަ ފިލުވާލުމުގެ މަސައްކަތް ކުރަމުން އެބަދޭ" އޭނާ ވިދާޅުވި އެވެ.
އެ މަސައްކަތްތަކަށް ހިނގާ ޖުމްލަ ހަރަދުގެ ތަފުސީލު ހާމަކުރެވޭނީ މަސައްކަތްތައް ނިމުމުން ކަމަށާއި މަސައްކަތް ނިމި ރައީސަށް މުލީއާގެއަށް ބަދަލުވެވޭނެ ސީދާ ތާރީހެއް އަދި ނޭނގޭ ކަމަށް ވެސް ހަލީލު ވިދާޅުވި އެވެ. މީގެ ކުރިން އަޑު ފެތުރިފައިވާ ތާރީހަކީ އަންނަ މަހުގެ 15 އެވެ.
ހުވާކުރެއްވުމުގެ ހަފުލާއަށްފަހު ރައީސް މުއިއްޒު އެމަނިކުފާނުގެ އާއިލާއާއެކު - ފޮޓޯ: ރައީސް އޮފީސް
މައުލޫމާތު ލިބިފައިވާ ގޮތުގައި މުލިއާގޭގައި ކުރިއަށް ދަނީ އިތުރު ދެ ކޮޓަރި ހެދުމުގެ މަސައްކަތެވެ. އެއީ ރައީސް މުއިއްޒު އާއި އަނބިކަނބަލުން އަދި ތިން ބޭފުޅުން ބަދަލުވުމަށެވެ.
ކުރީގެ ރައީސް އިބްރާހިމް މުހައްމަދު ސޯލިހު މުލީއާގެ ދޫކުރައްވާ ބަދަލުވެވަޑައިގެންނެވީ މި މަހުގެ 10 ގަ އެވެ. އެމަނިކުފާނާއި އަނބިކަނބަލުން ފަޒްނާ އަހްމަދު މުލިއާގެއަށް ދިރިއުޅުން ބަދަލުކުރެއްވީ ނޮވެމްބަރު 30, 2018 ގަ އެވެ.
