ސްޓެލްކޯގެ މެނޭޖިން ޑިރެކްޓަރުގެ މަގާމަށް ހުސެން ފަހުމީ އަދި އާސަންދަ ކުންފުނީގެ މެނޭޖިން ޑިރެކްޓަރުގެ މަގާމަށް އާމިނަތު ޒީނިޔާ އައްޔަންކޮށްފި އެވެ.
ސަރުކާރު ހިއްސާވާ ކުންފުނިތައް ބަލަހައްޓާ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ބޯޑު މެމްބަރުން ހަމަނުވެ އޮތުމާ ގުޅިގެން އެ ކުންފުނިތަކަށް ވެރިން އައްޔަނުކުރެވިފައި ނުވެ އެވެ. ނަމަވެސް, ރައީސް ޑރ. މުހައްމަދު މުއިއްޒު ވަނީ އެ ބޯޑަށް މިހާރު މެމްބަރުން އައްޔަނުކޮށް ކުންފުނިތަކުގެ މެނޭޖިން ޑިރެކްޓަރުންގެ މަގާމަށް އައްޔަނުކުރައްވަން ބޭނުންވާ 22 ބޭފުޅެއްގެ ނަން ޕީސީބީ އަށް ފޮނުވައި އެ މަސައްކަތް ވަނީ ފައްޓަވާފަ އެވެ.
ޕީސީބީ އަށް ފޮނުވި ނަންތަކުގެ ތެރެއިން ސްޓެލްކޯގެ މެނޭޖިން ޑިރެކްޓަރުގެ މަގާމަށް ، އެކުންފުނީގެ ޖެނެލް މެނޭޖަރުގެ ޒިންމާ އަދާކުރައްވަމުން ގެންދެވި މ. ފަތަހަ ހުސައިން ފަހުމީ ވަނީ މިހާރު އައްޔަނުކޮށްފަ އެވެ. އޭނާ މިއަދު އެކްސްގައި ކުރެއްވި ޕޯސްޓެއްގައި ވަނީ، އޭނާއަށް މަގާމު ލިބިވަޑައިގަތްކަން ރަސްމީކޮށް މިއަދު އަންގާފައިވާ ކަމަށް ވިދާޅުވެފަ އެވެ. ނަމަވެސް ޕީސީބީން އަދި އެކަމުގެ މައުލޫމާތު ހިއްސާއެއް ނުކުރެ އެވެ.
ފަހުމީ ވަނީ 25 އަހަރު ސްޓެލްކޯއަށް ހިދުމަތް ކޮށްދެއްވާފަ އެވެ. 1 ފެބްރުއަރީ 1998 ވަނަ އަހަރު އެކައުންޓް އެސިސްޓެންޓް ޓްރެއިނީއެއްގެ ގޮތުގައި ސްޓެލްކޯ އާއި ގުޅިވަޑައިގެން އޭނާ ވަނީ ފާއިތުވި އަހަރުތަކުގައި އެކުންފުނީގެ ތަފާތު ސެކްޝަންތަކުގައި އެތައް ހިދުމަތެއް ކޮށްދެއްވާފަ އެވެ. މަގާމަށް އައްޔަނުކުރުމުގެ ކުރިން ހުންނެވީ ކުންފުނީގެ ޖެނެލް މެނޭޖަރު ކަމުގަ އެވެ.
ފަހުމީ އަކީ އިނގިރޭސި ވިލާތުން މާސްޓާސް އޮފް އެކައުންޓިން އާއި ފައިނޭންޝިއަލް ސާވިސަސް އިން އެމްބީއޭހާސިލުކުރައްވައިގެން ހުންނެވި ބޭފުޅެކެވެ.
އާސަންދަ ކުންފުނިން މައުލޫމާތު ދޭގޮތުގައި ޕީސީބީން މިހާރު ވަނީ އެކުންފުނީގެ މެނޭޖިން ޑިރެކްޓަރުގެ މަގާމަށް އެކުންފުނީގައި އެންމެ ގިނަދުވަސްވީ އެއް މުވައްޒަފު ކަމަށްވާ އާމިނަތު ޒީނިޔާ އައްޔަނުކޮށްފަ އެވެ. އެ މަގާމަށް އައްޔަނުކުރި އިރު އޭނާ އަދާކުރަމުންދިޔައީ އެ ކުންފުނީގެ ޖެނެރަލް މެނޭޖަރުގެ މަގާމެވެ.
އާސަންދަ ސްކީމް ހިންގެވުމަށް ތަފާތު އެތައް މަސައްކަތްތަކެއް ކުރައްވާފައިވާ ޒީނިޔާ ވަނީ އާސަންދަ ކުންފުނީގެ މެޑިކަލް ޑިޕާޓްމަންޓާއި އެވެއަނެސް ޑިޕާޓްމަންޓާއި ކަސްޓަމާ ސާވިސް ސެކްޝަނާއި ޕަބްލިކް ރިލޭޝަންގެ އިތުރުން ބިޒްނަސް ޑިވެލޮޕްމަންޓް ސެކްޝަންގެ މަސައްކަތްތައްވެސް ބަލަހައްޓަވާފައެވެ. އާސަންދަ ކުންފުންޏާއި ގުޅުމުގެ ކުރިން، އޭނާ ވަނީ ޑިޕާޓްމަންޓް އޮފް ޑްރަގް ޕްރިވެންޝަން އެންޑް ރިހަބިލިޓޭޝަންގެ ޑިރެކްޓާ ޖެނެރަލް ކަމުގެ މަގާމުވެސް އަދާކުރައްވާފައެވެ. އަދި ހެލްތު މިނިސްޓްރީގެ ސެންޓާ ފޯ ކޮމިއުނިޓީ ހެލްތް އެންޑް ޑިޒީޒް ކޮންޓްރޯލް ޑިޕާޓްމަންޓްގައި، ޕަބްލިކް ހެލްތް ޕްރޮގްރާމްގެ ކޯޑިނޭޓަރުގެ މަގާމާއި އަދި ނަރުހެއްގެ ގޮތުގައި ސެންޓްރަލް ހޮސްޕިޓަލާއި އިންދިރާ ގާންދީ މެމޯރިއަލް ހޮސްޕިޓަލްގައިވެސް އޭނާ މަސައްކަތް ކުރެއްވިއެވެ.
ޒީނިޔާ ވަނީ އޮސްޓްރޭލިއާގެ ޔުނިވަސިޓީ އޮފް ވޮލޮންގޮންގްއިން މެންޓަލް ހެލްތު ނާސިން އިން މާސްޓާސް އާއި ޔުނިވަސިޓީ އޮފް ވެސްޓް އޮފް އިންގްލޭންޑް، ބްރިސްޓޯލްއިން މާސްޓާ އޮފް ސައިންސް އިން ޕަބްލިކް ހެލްތުވެސް ހާސިލު ކުރައްވާފަ އެވެ.
