މިއަދުގެ މިހާތަނަށް ވެރިކަން ކުރާ، ޕީއެންސީން 10،000 އާ ގާތްކުރާ އަދަދަކަށް މެންބަރުންގެ ފޯމު އިލެކްޝަންސް ކޮމިޝަނަށް ހުށަހަޅާފައިވާ ކަމަށް އެ ޕާޓީގެ ރެޖިސްޓުރާ، މުހައްމަދު އަފޫ ހާމިދު ވިދާޅުވެއްޖެ އެވެ.
ޕީއެންސީއަށް މެންބަރުން އިތުރުވަމުންދާ މިންވަރާ ގުޅޭގޮތުން "އަދަދު" އިން ކުރި ސުވާލަކަށް ޖަވާބު ދެއްވަމުން އަފޫ ހާމިދު ވިދާޅުވީ ޕީއެންސީއަށް ވެރިކަން ހޯދައިދިނުމަށްފަހު ރައްޔިތުން އަންނަނީ ގިނަ އަދަދުތަކުން އެ ޕާޓީއާ ގުޅެމުން ކަމަށެވެ.
"ރައްޔިތުން އަމިއްލައަށް ބޭނުންވެގެން ހަމަ ގުޅެމުން ދަނީ، ކޮންމެ ދުވަހަކު ވެސް ވަރަށް ބައިވަރު ފޯމު ލިބެމުން ދަނީ، އަޅުގަނޑުމެން ވަރަށް ބުރަކޮށް ޕްރޮސެސިންގެ މަސައްކަތް ކުރަމުން މިދަނީ،"
އޭނާ ވިދާޅުވީ މިހާރު ޕުރޮރެސިންގައި ހުރި ފޯމުތަކުގެ އަދަދު ވެސް 6000 އަށްވުރެ އިތުރު ވާނެ ކަމަށެވެ. އިލެކްޝަންސް ކޮމިޝަނަށް ހުށަހެޅި ފޯމުތަކާއި ޕުރޮސެސިންގައި ހުރި ފޯމުތައް އެއްކޮށްލުމުން ޕީއެންސީގެ މެންބަރުންގެ އަދަދު 18،000 އަށް އަރާނެ ކަމަށް އަފޫ ހާމިިދު ވިދާޅުވި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމުގެ ހުވާ ކުރެއްވިއިރު، އެމަނިކުފާނު ވެސް ނިސްބަތްވެލައްވާ ޕާޓީ، ޕީއެންސީ މެންބަރުންގެ އަދަދަކީ 3159 އެވެ. ރިޔާސީ ކެމްޕޭނުގެ ތެރޭގައި ރައީސް މުއިއްޒު ވަނީ ވެރިކަން ލިބިވަޑައިގަތުމާއެކު ޕީއެންސީ އޭގެ ޒާތުގައި ވަރުގަދަ ޕާޓީއަކަށް ވާނެ ކަމަށް ވިދާޅުވެފަ އެވެ.
ޕީއެންސީގެ މެންބަރުން އެތައް ގުނައަކުން އިތުރުވަމުންދާއިރު، އެޕާޓީގެ ކޯލިޝަން ޕާޓުނަރު، ޕީޕީއެމްގެ ކުރީގެ ލީޑަރު، އަދި ކުރީގެ ރައީސް އަބްދުﷲ ޔާމީން އަބްދުއްގައްޔޫމް ވަނީ ޕީއެންސީ/ޕީޕީއެމްގެ ލީޑަރުޝިޕާ މެދު ހިޔާލުތަފާތުވުން އުފެދި ޕާޓީން ވަކިވެވަޑައިގެން، އައު މޯލްޑިވްސް ނެޝަނަލް ފްރަންޓުގެ ނަމުގައި އައު ސިޔާސީ ޕާޓީއެއް އުފެއްދުމުގެ ދަތުރު ފަށައިފަ އެވެ.
ރައީސް ޔާމީން ޕީޕީއެމުން ވަކިވެވަޑައިގަތުމުގެ ކުރިން ވަނީ ޕީއެންސީއަށް ޕީޕީއެމް މެންބަރުން ބަދަލު ވާން ނުޖެހޭ ކަމަށާއި، އަސްލު ޕާޓީއަކީ ޕީޕީއެމް ކަމަށް ތަކުރާރުކޮށް ވިދާޅުވެފަ އެވެ. ނަމަވެސް ޕީޕީއެމުގެ އޮފީސް ދޫކޮށް ޕީއެންސީން ވަނީ މެންބަރުން އިތުރު ކުރުމުގެ މަސައްކަތަށް އައު އޮފީހެއް ވެސް ގާއިމުކޮށްފަ އެވެ. ރައީސް ޔާމީން ޕީޕީއެމުން ވަކިވެވަޑައިގެންނެވީ އެއަށްފަހު އެވެ.
ރައީސް ޔާމީންގެ އިސް ގާނޫނީ ވަކީލު، ޑރ. ޖަމީލު "އަދަދު" ގެ އެތެރެފުށް ޕުރޮގުރާމުގައި ވާހަކަދައްކަވަމުން ވެސް ވަނީ ޕީއެންސީއަށް މެންބަރުން އިތުރު ކުރުމާ ގުޅޭގޮތުން ވާހަކަދައްކަވައި، ޕީއެންސީގެ ލީޑަރުޝިޕަށް ސީރިރަސް ތުހުމަތެއް ކުރައްވައިފަ އެވެ. އޭނާ ވިދާޅުވީ ޕީއެންސީން މަސައްކަތް ކުރަމުން ގެންދަނީ ރައްޔިތުންގެ މަޖިލިސް އިންތިހާބު ކުރިމަތިވުމުގެ ކުރިން ޕީޕީއެމް އެއްކޮށް ހުސްކޮށްލުމަށް ކަމަށެވެ.
ނަމަވެސް ޕީއެންސީގެ ވެރިން އެކަން ދޮގު ކުރައްވަ އެވެ. އެ ބޭފުޅުން ވިދާޅުވަމުން ގެންދަވަނީ ޕީޕީއެމުން އެއްވެސް މެންބަރަކު ޕީއެންސީއަށް ބަދަލު ކުރުމަށް ލީޑަރުޝިޕުން މަސައްކަތް ނުކުރާ ކަމަށާއި، ޕާޓީ ބަދަލު ކުރާ ފަރާތްތަކުން އެކަން ކުރައްވަނީ އަމިއްލައަށް ބޭނުންވެގެން ކަމަށެވެ.
