ކުރީގެ ރައީސް އަބްދުﷲ ޔާމީން ޕީޕީއެމް ދޫކޮށްލައްވައި، އާ ސިޔާސީ ޕާޓީއެއް އުފެއްދެވުމުގެ މަސައްކަތް ފެށްޓެވުމުން، ޕީޕީއެމްގެ ދެ ނައިބު ރައީސުން ޔާމީންއާއެކު ވަޑައިގަތުމުގެ ބަދަލުގައި، އެ ޕާޓީ އިސްވެ އޮވެ ގެނައި ރައީސް ޑރ. މުހައްމަދު މުއިއްޒުގެ ވެރިކަން ދެމެހެއްޓުމަށް ތެދުވެވަޑައިގެންފި އެވެ.
ޕީޕީއެމްގެ ދެ ނައިބު ލީޑަރުންގެ ގޮތުގައި ތިއްބެވީ މި ސަރުކާރުގެ ޑިފެންސް މިނިސްޓަރު ޣައްސާން މައުމޫނާއި ފިޝާރީޒު މިނިސްޓަރު އަހުމަދު ޝިޔާމްއެވެ.
ނިމިގެންދިޔަ ރިޔާސީ އިންތިހާބުގެ ކާމިޔާބީއަށް ފަހު ޔާމީނާއި ރައީސް މުއިއްޒުގެ ގުޅުން ކެނޑި، ބޮޑުވަމުން ދިޔަ މައްސަލަ ހައްލު ނުކުރެވި، ބުރާސްފަތި ދުވަހުގެ ރޭ ޔާމީން ޕީޕީއެމްއިން ވަކިވެވަޑައިގެން، އާ ޕާޓީއެއް އުފައްދަވާކަން އިއުލާނު ކުރެއްވި އެވެ. ނަމަވެސް ޕީޕީއެމްގެ މިހާރުގެ ލީޑަޝިޕްގެ ބައެއް ބޭފުޅުންގެ ތާއިދު އޮތީ ރައީސް ޑރ. މުއިއްޒާއެކު ކުރިއަށް ވަޑައިގަތުމަށްކަން ގެންދަވަނީ ހާމަކުރައްވަމުންނެވެ.
ޕީޕީއެމް/ޕީއެންސީއިން ބޭއްވި ޖަލްސާއެއްގައި ޣައްސާން އާއި ޔާމީންގެ ދަރިކަލުން ޒެއިން އަދި އަބްދުއްރަހީމް. -- ފޮޓޯ: މުހައްމަދު ޝާބިން/ އަދަދު
"ޕީޕީއެމް އޮތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒާއެކު. ރައީސް މުއިއްޒުގެ ސަރުކާރުގެ ހިމާޔަތުގައި އަތާއި އަތް ގުޅުވައިގެން މިތިބި ސަފުތަކުގައި ކެރުމާއި އިހުލާސްތެރިކަމާއި އެކު ސާބިތުވެ ހުރި ގައުމަށް ހެޔޮ އެދޭ އެންމެހައި ލޮބުވެތި ދިވެހިން ރައީސް މުއިއްޒުއާ އެއްކޮށް ކުރިޔަށް ވަޑައިގަތުމަށް ގޮވާލަން،" ރައްޔިތުންގެ މަޖިލީހުގެ ތ. ގުރައިދޫ ދާއިރާގެ މެމްބަރުކަން ކުރިން ކުރެއްވި ޣައްސާން އޭނާގެ އެކްސް އެކައުންޓުން ކުރެއްވި ޕޯސްޓެއްގައި ވިދާޅުވި އެވެ.
ކުރީގެ ރައީސް މައުމޫން އަބްދުލްގައްޔޫމުގެ އެންމެ ހަގު ދަރިކަލުން ޣައްސާނަކީ، ޕީޕީއެމްގެ ފުރަތަމަ ވެރިކަމުގައި ޕާޓީތެރޭގައި އުފެދުނު ހިޔާލު ތަފާތުވުންތަކުގައި ބައްޕާފުޅު ޕާޓީ ދޫކޮށްލެއްވުމުން ވެސް، އޭރުގެ ރައީސް ޔާމީންއާއެކު ހުންނެވި ބޭފުޅެކެވެ. ބައްޕާފުޅު ޖަލުގައި ބަންދު ކުރެއްވުމުން ވެސް، އޭނާ ހުންނެވީ ޔާމީންއާއެކު އެވެ. އެ ދުވަސްވަރު ޣައްސާނަށް ވަރަށް ބޮޑަށް ފާޑުކިޔަމުން ދިޔަ އެވެ.
ޕީޕީއެމްގެ ނައިބު ރައީސްއަކަށް ހުންނެވި މިހާރުގެ ފިޝަރީޒު މިނިސްޓަރު ޝިޔާމްއަކީ ޔާމީނުގެ ވެރިކަމުގައި އެ މަނިކުފާނާ ވަރަށް އަރިސް ބޭފުޅެކެވެ. ނަމަވެސް، ޔާމީނާއެކު ވަޑައިގަތުމުގެ ބަދަލުގައި ޝިޔާމަށް ފެނިވަޑައިގަންނަވަނީ އުއްމީދަކީ ރައީސް މުއިއްޒު ކަމެވެ.
މިނިސްޓަރުކަމުގެ ހުވައަށް ފަހު މަގާމުގެ ފަތްކޮޅު ރައީސް ޑރ. މުހައްމަދު މުއިއްޒު، އެ މަނިކުފާނުގެ ފިޝަރީޒު މިނިސްޓަރު ޝިޔާމްއާ ހަވާލު ކުރައްވަނީ. -- ފޮޓޯ: ރައީސް އޮފީސް
"ރައީސް ޑރ.މުއިއްޒަކީ މިއަދު ދިވެހީންގެ އެންމެބޮޑު އުންމީދު"
ރިޔާސީ އިންތިހާބު ރައީސް ޑރ. މުހައްމަދު މުއިއްޒަށް ކާމިޔާބު ވެގެން ދިޔައީ ވަރަށް ބުރަ މަސައްކަތުން ކަމަށާއި، މި ސަރުކާރަކީ ރައްޔިތުންގެ ވަރަށް ބުރަ މަސައްކަތުގެ ފޮނި ނަތީޖާ ކަމަށް، ކުރިން ނައިފަރު ދާއިރާގެ މެމްބަރަކަށް ހުންނެވި ޝިޔާމް ވިދާޅުވި އެވެ.
"ވެރިކަން ބަދަލުވުމާއިއެކު ދިވެހިންނަށް ހިތްހަމަޖެހުމުގެ ނޭވާއެއް ލެވުނެވެ. ރައީސް ޑރ. މުއިއްޒުގެ އާސަރުކާރުން ކުރައްވަންހުރި ކަންކަން ލައްކަ ބައިވަރެވެ. އެހުރިހާ ވައުދުފުޅުތަކެއް އެހުރީ ބަހުން ބަހަށް އަދި އަކުރުން އަކުރަށް ދެލިކުރެވި 953 ގަނޑުގެ ބޯފޮތެއްގައި ޝާއިއު ކުރެވިފަ އެވެ. އެއީ ރައްޔިތުންނަށް ވެވަޑައިގެންނެވި ވަޢުދުފުޅުތަކަށް ފުރަގަސް ނުދެއްވާނެކަމުގެ ދަލީލެކެވެ. ދެފުށްފެންނަ ވެރިކަމެއް ރައްޔިތުންނަށް ކޮށްދެއްވާނެ ކަމުގެ ޔަގީންކަމެކެވެ. ރައީސް ޑރ. މުއިއްޒަކީ މިއަދު ދިވެހީންގެ އެންމެބޮޑު އުންމީދެވެ،" އޭނާ ވިދާޅުވި އެވެ.
ޑރ. މުހައްމަދު މުއިއްޒު ވެރިކަމަށް އިންތިހާބު ކުރައްވަން ރައްޔިތުން ބޭނުންވި ސަބަބުތައް ވެސް ޝިޔާމް ކިޔައިދެއްވި އެވެ. އެއީ އަޅުވެތިކަމަށް ދާން ބޭނުން ނުވާތީ އާއި، އިސްލާމްދީން މަތިވެރިކުރުމަށާއި، ގައުމު ދަރަނިން ސަލާމަތްކުރަން ބޭނުންވާތީ އާއި ސުލްހަވެރި އަމާންވެއްޓެއް ގާއިމުކުރަން ބޭނުންވާތީ ކަމަށް ފާހަގަ ކުރެއްވި އެވެ.
ރައީސް ޔާމީނަށް ދިން ލުއިތަކާއެކު ޕީޕީއެމްގެ އޮފީހުގައި ބޭއްވި ދެ ވަނަ ޖަލްސާގައި ޔާމީންގެ އަރިހުގައި ޝިޔާމް. -- ފޮޓޯ: އަބްދުﷲ އިޔާން/ އަދަދު
"ތަރައްގީއާ ތަމައްދުން ބޭނުންވާތީއެވެ. އުފާފާގަތި ފުދުންތެރި ދިރިއުޅުމަކަށެވެ. ދިވެހީންގެރާއްޖެ ދިވެހީންނަށް ހޯދައިދޭށެވެ. މިހުރިހާ ކަމެއް ކުރައްވަން އެމަނިކުފާނަށް ވަގުތު ބޭނުންފުޅުވެއެވެ. ހުރިހާ ބޭފުޅުންގެ އެހީތެރިކަން ބޭނުންފުޅުވެއެވެ. ހާއްސަކޮށް ޕީޕީއެމް-ޕީއެންސީގެ ލޮބުވެތި މެންބަރުންގެ އެއްބާރުލެއްވުމާ އެހީތެރިކަން އިންތިހާއަށް ބޭނުންފުޅުވެއެވެ،" ޝިޔާމް ވިދާޅުވި އެވެ.
"އަޅުގަނޑު އެދެނީ އިހުނެކޭ އެއްގޮތައް ހުރިހާ ބޭފުޅުންގެ އެހީތެރިކަމާ އެއްބާރުލެއްވުމާ ހެޔޮ ދުއާއަށެވެ،"
ޔާމީންގެ އިސްވެ ހުންނަވައިގެން އުފައްދަވާ ޕާޓީ އުފެއްދުމުގެ ހުއްދައަށް އާދީއްތަ ދުވަހު އިލެކްޝަންސް ކޮމިޝަނަށް ހުށަހަޅުއްވާނެ ކަމަށް ޔާމީނަށް ތާއިދު ކުރައްވާ ކުރީގެ މިނިސްޓަރު މުހައްމަދު މަލީހު ވިދާޅުވި އެވެ.
