އެމްޑީޕީގެ ދެވަނަ ވެރިކަން ވޯޓުން ބަލިކުރުމަށް ޕީޕީއެމް/ޕީއެންސީން ކުރި ކެމްޕޭނުގައި އިދިކޮޅު ލީޑަރަކަށް ހުންނެވި ކުރީގެ ރައީސް އަބްދުالله ޔާމީނަށް މިހާރު މިއޮތް ރައީސް ޑރ. މުހައްމަދު މުއިއްޒުގެ ސަރުކާރުން އަނިޔާ ދީފާނެ ކަމުގެ ބިރު އޮތް ކަމަށާއި ޔާމީން މިނިވަން ކުރަން އެއްވެސް މަޝްވަރާއެއް މިހާތަނަށް ސަރުކާރުން ކޮށްފައި ނުވާ ކަމަށް އެ މަނިކުފާނުގެ ގާނޫނީ ވަކީލު ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
ޕީޕީއެމް އިން ވަކިވެވަޑައިގެން ޔާމީން އިސްކޮށް ހުންނަވައި އާ ސިޔާސީ ޕާޓީއެއް އުފެއްދެވުމަށް ނިންމެވިކަން ރޭ ވަނީ ފަށްޓަވައިފަ އެވެ. ޔާމީން ޕީޕީއެމް ދޫކޮށްލެއްވީ އާ ރައީސް މުއިއްޒު ހުވާކުރެއްވިތާ ބަރާބަރު ހަފުތާއެއް ފަހުންނެވެ.
މައިގަނޑު ސަބަބެއްގެ ގޮތުގައި އޮތީ ޕީޕީއެމްގެ ލީޑާޝިޕުން އެމަނިކުފާނުގެ މަޝްވަރާ ނުހޯދައި އެކަހެރިކޮށްލުމެވެ.
"އަދަދު" ނޫހުގެ މިރޭގެ "އެތެރެފުށް" ޕްރޮގްރާމްގައި ޖަމީލު ވަނީ ޑރ. މުއިއްޒުގެ ވެރިކަން އައީ ޔާމީނަށް ލިބެމުންދިޔަ އަނިޔާތަކުން މިނިވަން ކޮށްދޭނެ ކަމުގެ ވައުދާއެކު ކަން ހަނދާން ކޮށްދެއްވައިފަ އެވެ. އަމިއްލަ ވެރިކަމެއްގައި ޔާމީނަށް އަނިޔާކޮށްފާނެ ކަމުގެ އުންމީދު ނުކުރައްވާ ކަމަށް ވިދާޅުވި ނަމަވެސް އެފަދަ ހާލަތެއް މިވަގުުތު އޮތްތޯ އެހުމުން ޖަމީލު ދެއްވީ ސީރިއަސް ޖަވާބެކެވެ.
"އަޅުގަނޑު ގަބޫލުކުރާނީ ރައީސް ޔާމީންއާ މެދު ޕާޓީން އަމަލުކުރި ގޮތުން ވެސް އެއީ އަނިޔާއެއް ކަމަށް, އައި ހަމައެއާ އެކީގައި އަޅުގަނޑު ގަބޫލުކުރަނީ [މި ސަރުކާރުން] ރައީސް ޔާމީނަށް އަނިޔާ ކުރުމުގެ ބިރު ވަރަށް ބޮޑަށް އޮތް ކަމަށް," ޖަމީލު, ކަންބޮޑުވުމާ އެކު ވިދާޅުވި އެވެ.
ޔާމީނަކީ މައުސޫމް ބޭފުޅެއް ކަމަށް މިހާރު ޖަމީލު ގަބޫލު ކުރައްވަ އެވެ. ނަމަވެސް ކުރިން ޔާމީނަށް އެންމެ ބޮޑަށް ފާޑުވިދާޅުވި އެއް ބޭފުޅަކީ ޖަމީލެވެ. ޖަމީލުގެ ފާޑުކިޔުން އޭރު ޔާމީނަށް އަމާޒުކުރީ، ނައިބު ރައީސްގެ މަގާމުން ދުރުކުރުމަށް ފަހު އެވެ.
ޔާމީންގެ މައްޗަށް ކޮށްފައި ވަނީ ހައްގު ނޫން ދައުވާތަކެއް ކަމަށް ޖަމީލު ތަކުރާރުކޮށް މިރޭ ވިދާޅުވި އެވެ. އެގޮތުން, ދައުވާތައް ކުރުމުގެ އަސާސް ވެސް މިހާރު ނެތްކަން ވެސް ފާހަގަ ކުރެއްވި އެވެ.
އެއީ, އެމްއެމްޕީއާރުސީގެ މައްސަލަ އެންމެ ފުރަތަމަ އަމާޒު ކުރެވުނީ ކުރީގެ ނައިބު ރައީސް އަދީބާއި އަބްދުالله ޒިޔާތަށް ކަމަށާއި އެ މީހުން މައާފު ދީފައިވާތީ ރައީސުލްޖުމްހޫރިއްޔާގެ ހައިސިއްޔަތުން ޔާމީނުގެ ދައުވާތަކާ ގުޅޭ ގޮތުން ރައީސް މުއިއްޒުއަށް ކޮށްދެވޭނެ ކަންކަން ހުންނާނެ ކަމަށް ވެސް ޖަމީލު ވިދާޅުވި އެވެ.
"މި އުޅެނީ ކޮރަޕްޝަންގެ ފައިސާ ހޯދަން ކޮންމެހެން ކޮށްގެން އުޅޭ ކަމެއް ނޫނޭ. މިއީ ޕޮލިޓިކަލީ މޯޓިވޭޓެޑް ޗާޖެއް (ދައުވާ) އެކޭ. އެހެންކަމަށް ވަންޏާ އަޅުގަނޑު ގަބޫލުކުރަނީ އަލަށް އަންނަ ރައީސުލްޖުމްހޫރިއްޔާގެ ބަންޑާރަ ނައިބުގެ ޒިންމާއެއް އެބައޮތޭ މިހެން ހުރި ކަންކަމަށް ހައްލު ހޯދުމަށް," އެ ޕްރޮގްރާމްގައި ޖަމީލު ވިދާޅުވި އެވެ.
އެފަދަ ކަމެއް ކުރުމަށް ސަރުކާރުން އެއްވެސް މަޝްވަރާއެއް ކޮށްފައިވޭތޯ އެހުމުން ޖަމީލު ވަނީ އޭނާ އެކަމަށް އުންމީދު ވެސް ނުކުރައްވާ ކަމަށް ވިދާޅުވެފަ އެވެ.
އެއްވެސް މަޝްވަރާއެއް ނުކުރޭ. އަދި, އަޅުގަނޑުމެން އުންމީދެއް ވެސް ނުކުރަން އެފަދަ ކަމެއް [މިނިވަން] ކޮށްދެއްވާނެ ކަމަށް,
ޔާމީން މިނިވަން ކުރުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. އަދި, ފުރަތަމަ ދުވަހުން ފެށިގެން އެމަނިކުފާނު ކުރައްވާނެ ކަމެއް ކަމަށް ވިދާޅުވި އެވެ. ނަމަވެސް, އެގޮތަށް އަމަލުކުރައްވަމުން ނުދާކަން ޖަމީލުގެ އިންޓަވިއުއިން ވަނީ ހާމަވެފަ އެވެ.
ވެރިކަމާ ހަވާލުވެވަޑައިގަތުމަށްފަހު ރައީސް މުއިއްޒު, ޔާމީން ގުޅުއްވުމުން ފޯނު ނުނަންގަވާ ކަމަށް ވެސް ޖަމީލު ވިދާޅުވި އެވެ. އެހެންކަމުން ސަރުކާރު އެކުލަވާލުމުގައި ޔާމީންގެ މަޝްވަރާއެއް ނުހިމެނެ އެވެ.
