ރޭ އިރައިކޮޅުގައި، ކުރީގެ ރައީސް އަބްދުﷲ ޔާމީންގެ ގާނޫނީ ވަކީލު ޑރ. މުހައްމަދު ޖަމީލު އަހުމަދާއި އޭނާގެ އާއިލާގެ ބޭފުޅެއް ކަމުގައިވާ މުހައްމަދު މަލީހުގެ ޖަމާލު ފޮނުއްވި މެސެޖުގައި އޮތީ ރެޔަކީ ބޮޑުއެއް ކަމަށާއި ހޭލައި ހުރުމަށެވެ.
މާގިނަ އިރުތަކެއް ނުވެ ޗެނަލް 13 މެދުވެރުކޮށް ޖަމީލު ދިން ހޫނު ހަބަރަކީ 11 އަހަރުގެ ޖަލު ހުކުމެއްގައި ހުންނެވި ޔާމީން ޕީޕީއެމް ދޫކުރައްވައި އާ ޕާޓީއެއް އުފައްދަވާ ވާހަކަ އެވެ.
ފަތިހު ނިދުމުގެ ކުރިން މަލީހު ގިނަ ސުވާލުތަކެއް އޮއްސައިލި އެވެ. އެކްސްއިން ކޮށްފައިވާ ޕޯސްޓުތަކުގައި ޖަވާބު ދޭން ބުނެފައިވަނީ 13 ސުވާލަކަށެވެ.
titledesc
މި ސުވާލުތައް ރައީސް ޑރ. މުއިއްޒާއި ޕީއެންސީގެ ޗެއާޕާސަން އަބްދުއްރަހީމުއާ ކުރުމަށް މަލީހު ވަނީ ޔާމީންގެ ސަޕޯޓަރުންނަށް ގޮވާލައިފަ އެވެ.
މި ސުވާލުތަކަށް ރައީސް މުއިއްޒުގެ ފަރާތުން ވެސް އަދި ސަޕޯޓަރުން ވެސް އަދި އެއްވެސް ޖަވާބެއް ނުލިބެ އެވެ.
ޕީޕީއެމް ދޫކޮށްލައްވަން ނިންމެވުމުގެ ކުރިން ޔާމީން ވަނީ ޕާޓީ ހިންގުމަށް 13 މެމްބަރުންގެ ކޮމިޓީއެއް މިދިޔަ ބުދަ ދުވަހު އުފައްދަވައިފަ އެވެ.
އެ ކޮމިޓީއާމެދު ޕާޓީގެ ލީޑަޝިޕުން ބަޔަކު ހިތްހަމަ ނުޖެހިގެން ކޮމިޓީގައި އިސްކޮށް ހުންނެވި، މުހައްމަދު މަލީހު ޖަމާލުގެ ސުކޫލީ މައްސަލަ ބަލައި، ޕާޓީން އިއްޔެ ވަކިކުރި އެވެ. ޔާމީންގެ ޕީޕީއެމް ދޫކޮށްލައްވައި، އާ ޕާޓީއެއް ވުޖޫދުކުރައްވާ ވާހަކަ އިއުލާނު ކުރެއްވީ މަލީހު ވަކިކުރަން ނިންމި ފަހުންނެވެ.
ޕީޕީއެމްއިން ވަކިވެވަޑައިގެން ކުރީގެ ރައީސް އަބްދުﷲ ޔާމީން އިސްކޮށް ހުންނަވައި ހެއްދެވުމަށް މަސައްކަތް ކުރައްވާ ސިޔާސީ ޕާޓީއަށް ކިޔާނެ ނަމެއް ފާސްވެފައިވާ ކަމަށާއި ޕާޓީ އުފެއްދުމުގެ އަމަލީ މަސައްކަތްތައް މިއަދު ފަށާނެ މަލީހު "އަދަދު" އަށް ވިދާޅުވި އެވެ.
އަލަށް އުފައްދާ ޕާޓީއާ ބެހޭ މައުލޫމާތު "އަދަދު" އާ ހިއްސާ ކުރައްވަމުން މަލީހު ވިދާޅުވީ ޕާޓީއަށް ކިޔާނެ ނަމެއް ފައިނަލް ކުރެވިފައިވާ ކަމަށާއި، އެ ނަން އިއުލާނު ކުރައްވާނީ ރައީސް ޔާމީން ކަމަށެވެ.
ޕާޓީ ހެދުމަށް ބޭނުންވާ ފޯމުތައް ފުރައި، ކުށުގެ ރެކޯޑު ސާފުކުރަން މިއަދު ތައްޔާރު ކުރެވޭނެ ކަމަށް ވެސް އޭނާ ވިދާޅުވި އެވެ.
