އިންޑިއާއިން ރާއްޖެއަށް ކަނޑައަޅާފައި ހުންނަ ސަފީރު މުނޫ މަހާވަރު ރާއްޖޭގެ ފޮރިން މިނިސްޓަރު މޫސާ ޒަމީރުއާ މިއަދު ބައްދަލުކުރައްވައިފި އެވެ.
އިންޑިއާގެ ސަފީރު އެކްސްގައި ލިޔުއްވި ޕޯސްޓެއްފައި ވިދާޅުވީ މި ބައްދަލުވުމުގައި އިންޑިޔާއާއި ރާއްޖެއާ ދެގައުމުގެ ދެމެދުގައި އޮތް ހާއްސަ ގުޅުން އިތުރަށް ބަދަހިކުރުމާ ގުޅޭގޮތުން ވަރަށް އުފެއްދުންތެރި މަޝްވަރާތަކެއް ކުރެވުނު ކަމަށެވެ.
މި ބައްދަލުވުމާ ގުޅޭ ތަފްސީލު މިނިސްޓްރީން ހާމައެއް ނުކުރެ އެވެ.
ރާއްޖޭގެ އާ ސަރުކާރު އުފެދުމާއެކު އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރު މިނިސްޓަރު މޫސާ ޒަމީރާ ގާތުން މަސައްކަތް ކުރައްވަން އުއްމީދުކުރައްވާ ކަމަށް ވިދާޅުވެ ޓްވީޓުވެސް ކުރި އެވެ.
ރައީސް ޑރ. މުހައްމަދު މުއިއްޒު މަގާމުގެ ހުވާ ކުރައްވައި އާ ސަރުކާރު އެކުލަވައިލި އިރު، އިންޑިއާއާމެދު އާ ސަރުކާރުން ކަންބޮޑުވާ ބޮޑު މައްސަލައެއް އެބަ އޮތެވެ. އެއީ ރާއްޖޭގައި އިންޑިއާ ސިފައިން ތިބޭ މައްސަލަ އެވެ.
ރާއްޖޭގައި ތިބި އިންޑިއާ ސިފައިން އަނބުރާ އެގައުމަށް ފޮނުވައިލުމަކީ ރައީސް މުއިއްޒުގެ ރިޔާސީ ވައުދެކެވެ. ވެރިކަމާ ހަވާލުވެ ވަޑައިގެން އިންޑިއާގެ މިނިސްޓަރު ކިރެން ރިޖިޖޫއާ ބައްދަލު ކުރައްވައި، އެ ގައުމުގެ ސިފައިން ރާއްޖެއިން ބޭލުމަށްވެސް ރައީސް މުހައްމަދު މުއިއްޒު ވަނީ އެދިވަޑައިގަންފަ އެވެ.
އެ މައްސަލަ އޮމާންކޮށް ގެންދިއުމަށް ތައްޔާރަށް ތިބި ކަމަށާއި ރައްޔިތުންގެ ނިންމުމަށް އިންޑިއާ ސަރުކާރުން އިހުތިރާމު ކުރާނެ ކަމަށްވެސް އިންޑިއާ ސަރުކާރުން ވަނީ ބުނެފަ އެވެ.
