ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް ރާއްޖޭން ހިލޭ ހައްޖަށް ފޮނުވާ މީހުންގެ ތެރެއިން ފުރަތަމަ ބެޗު މި ފެށޭ އަހަރު ފޮނުވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
ހައްޖު ކޯޕަރޭޝަން ހަރުދަނާކޮށް ހައްޖުގެ އަގު ހެޔޮކުރުމުގެ އިތުރުން، ފަސް އަހަރު ތެރޭގައި 1،000 ފަގީރުން ހިލޭ ހައްޖުގެ އަޅުކަމަށް ފޮނުވާނެ ކަމަށް ރައީސް މުއިއްޒު ވައުދުވެވަޑައިގަތީ އޮގަސްޓު 18, ގައި މުލަކުގައި ބޭއްވި ކެމްޕޭން ޖަލްސާއެއްގެ ތެރެއިންނެވެ.
ހައްޖަށް ފޮނުވާ މީހުންގެ އަދަދު ކަނޑައަޅާނީ ކޯޓާ ލިބޭ މިންވަރަކަށް ބަލައި ކަމަށާއި، ކޯޓާ ހަމަޖެހުމުން އަދަދު އިއުލާނުކުރާނެ ކަމަށް ޝަހީމް މިއަދު އެކްސްގައި ވިދާޅުވެފައިވެ އެވެ.
ދާދި ފަހުން "އަދަދު"އަށް ދެއްވި ހާއްސަ އިންޓަވިއުއެއްގައި ޑރ. ޝަހީމް ވިދާޅުވީ ހައްޖަށް މީހުން ފޮނުވުމުގެ ޕްރޮގްރާމަށް ބަދަލުތަކެއް ގެނައުމަށް ހިޔާލުކުރައްވާކަމަށެވެ. ރައީސް ވައުދުވެވަޑައިގަތީ ހަމައެކަނި ފަގީރުން ހައްޖަށް ފޮނުވުމަށް ނަމަވެސް، ގިނަ ދުވަހު ސަރުކާރަށް ހިދުމަތްކޮށް ރިޓަޔާކުރާ މީހުން ވެސް އެ ޕްރޮގްރާމުގެ ދަށުން ހައްޖަށް ފޮނުވާނެ ގޮތަށް ވިސްނަމުން ގެންދާކަމަށް އޭނާ ވިދާޅުވި އެވެ.
"މިސާލަކަށް 40 އަހަރު ނުވަތަ 50 އަހަރު ހިދުމަތްކޮށްފައިވާ މީހަކު ރިޓަޔާކުރާއިރު، އޭގެ ތެރެއިން ބައެއް މީހުންގެ ކިބައިގައި ނޯވޭ ހައްޖަށް ދެވޭނެ ފަދަ ގާބިލްކަމެއް. އަޅުގަނޑުމެން މި ބަލަނީ އެކަން ފަށައިގަތުމަށް. އޭރުން ކުރިއަށް ނޫންތޯ ދާނީ،" ޝަހީމް ވިދާޅުވި އެވެ.
ޝަހީމް ވިދާޅުވީ ހައްޖު ކޯޓާ އިތުރުކުރުމަށް އެދި ވެސް ކަމާބެހޭ ފަރާތްތަކާ އެކު މަޝްވަރާ ކުރަން ފަށާފައިވާކަމަށެވެ.
ފަގީރުން ހިލޭ ހައްޖަށް ގެންދާއިރު، ފޯރުންތެރިކަން ދަށް މީހުންނަށް، ބަހާލައިގެން ހައްޖުގެ އަގު ދެއްކޭނެ ގޮތް ހަދާނެ ކަމަށް ރައީސް މީގެކުރިން ވިދާޅުވެފައިވެ އެވެ.
