ޕީޕީއެމްގެ އޮފީހުގައި ރޭ ކުރިއަށްދިޔައީ "އާދަޔާ ހިލާފު ނޫސްވެެރިންގެ ބައްދަލުވުމެކެވެ. އެ ޕާޓީގެ ހިންގުމާ ހަވާލުވުމަށް، ޕޯޑިއަމުގެ ފަހަތުގައި ރުކުރުވައިލައިގެން ތިބީ ކުރީގެ ރައީސް އަބްދުﷲ ޔާމީނު އެކުލަވައިލެއްވި 13 މެންބަރުންގެ ސްޓިއަރިން ކޮމިޓީ ، "ޔާމީނު ކޮމިޓީ" އެވެ.
އެ ކޮމިޓީގައި އިސްކޮށް ތިއްބެވީ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލާއި ކުރީގެ ކޮޮމިޝަނާ ޖެނެރަލް އޮފް ކަސްޓަމްސް އައްބާސް އާދިލު ރިޒާ އެވެ. ޕީޕީއެމްގެ ލީޑަޝިޕްގެ އެއްވެސް ބޭފުޅަކު އެތަނުގައި ނެތް އިރު، އެ ބޭފުޅުން ޕާޓީ ތަމްސީލުކުރައްވާ ހައިސިއްޔަތު ސާފުކުރުމަށް ކުރި ސުވާލަށް މަލީހު ސީދާ ޖަވާބެއް ނުދެއްވި އެވެ.
ނޫސްވެރިންގެ ބައްދަލުވުން ކުރިއަށް ގެންދަނީ ކުރީގެ ރައީސް އަބްދުﷲ ޔާމީނު ނެންގެވި ސްޓިއަރިން ކޮމިޓީއަކުން، ޔާމީނުގެ ފަރާތުން ކަމަށް ވިދާޅުވެ އައްބާސް ދެއްކެވި ވާހަކައިން އެންމެ ބޮޑަށް ސުވާލު އުފެދުނީ އުފެދުނީއްސުރެ ކޯލިޝަނެއްގެ ގޮތުގައި އޮތް ޕީޕީއެމް/ޕީއެންސީގެ ގުޅުން މިހާރު އޮތް ގޮތާ މެދުގަ އެވެ.
މަލީހާއި އައްބާސް ވެސް އެންމެ ބޮޑަށް ފާހަގަކުރެއްވި ނުކުތާއަކީ ޕީޕީއެމްގެ މެމްބަރުން އެހެން ދިމާލަކަށް ނުގޮސް ޕާޓީގައި ދެމިތިބުމުގެ މުހިއްމުކަމެވެ.
"އަޅުގަނޑުމެންގެ އެދުމަކީ، ޕީޕީއެމްގެ މެންބަރުން ތިއްބަވަން ޖެހޭނީ ޕީޕީއެމްގަ، ޕީޕީއެމް ޕީއެންސީގެ ކޯލިޝަންގައި އޮތްކަމުގަ ވީނަމަވެސް، ޕީޕީއެމްގެ އާންމު އެއްވެސް މެންބަރަކު އެހެން ޕާޓީއެއް، އެއީ ޕީއެންސީ ކަމުގައި ވީނަމަވެސް، އެހެން ޕާޓީއަކަށް ދިއުމަކީ އަޅުގަނޑުމެން ޕާޓީގެ ރައީސް ޔާމީން އެދިވަޑައިގަންނަވާ ގޮތެއް ނޫން" މަލީހު ވިދާޅުުވި އެވެ.
ޕީޕީއެމް އަކީ އެންމެ ބޮޑު ޕާޓީ ކަމަށް ވިދާޅުވެ، ޕީއެންސީގެ "ސައިޒް" ވެސް މެމްބަރުންނަށް އޭނާ ހަނދާންކޮށްދެއްވި އވެ. ވިދާޅުވީ ރައީސް ޑރ. މުހައްމަދު މުއިއްޒު އިންތިހާބުވީ އެންމެ 3،500 މެންބަރުންނާ އެކު ކަމަށްވެސް ވިދާޅުވެފަ އެވެ.
މި ހިސާބަށް ނޫސްވެރިންގެ ބައްދަލުވުން ދިޔައިރު، ސާފުވީ ކަމަކީ، ރައީސް މުއިއްޒުއާ ޔާމީނާ ދޭތެރޭ އެތަކެއް މައްސަލައެއް ޖެހިފައިވާ ކަމެވެ. ދެ ރައީސުންގެ ގުޅުމާ ބެހޭގޮތުން "އަދަދު" އިން ސުވާލުކުރުމުން މަލީހު ވިދާޅުވީ އެ ސުވާލަށް ޖަވާބުދެއްވަން ބޭނުން ނުވާ ކަމަށެވެ.
"ތި ސުވާލަށް އަޅުގަނޑު މިރޭ އެއްވެސް ކޮމެންޓެއް ނެތް" މަލީހު ބޭނުންކުރެއްވީ މި އިބާރާތެވެ. ދެ ރައީސުންގެ ގުޅުމާމެދު އިތުރަށް ސުވާލުއުފައްދަން އިތުރު ސަބަބެއް ދެއްވީ މަލީހުގެ މި ކުރު ޖަވާބުންނެވެ.
ޕީއެންސީއިން މިހާރު ވަނީ ވަކިން އޮފީހެއް ގާއިމުކޮށްފަ އެވެ. ކާނިވަލު ސަރަހައްދުގައި ހެދި މި އޮފީހުން ކުރާ މައިގަނޑު މަސައްކަތަކީ، ރައީސް މުއިއްޒުގެ އެދިލެއްވުމަށް އެ ޕާޓީއަށް 10،000 މެންބަރުން ހަމަކުރުމެވެ.
ހީނާ އިސްތިއުފާއެއް ނުދޭ، ތޮލާލް އުޒުރުވެރިއެއް ވެސް ނުވޭ
ޕީޕީއެމްގެ އޮފީހުގައި ރޭ ބޭއްވި އެ ބައްދަލުވުން އޮންނަކަން އެޕާޓީން މީޑިއާއާ މުވާސަލާތުކުރާ ރަސްމީ ޗެނަލްތަކުން ނުވެސް އަންގަ އެވެ. ނޫސްވެރިންނަށް މައުލޫމާތުދޭން އެޕާޓީން ގާއިމްކޮށްފައިވާ ވަޓްސްއެޕް ގްރޫޕުގައި އެ ބައްދަލުވުމާ ބެހޭ މައުލޫމާތު ހިއްސާއެއް ވެސް ނުކުރެ އެވެ.
ޕީޕީއެެމްގެ ތަރުޖަމާނު ހީނާ ވަލީދު މަގާމުން އިސްތިއުފާދެއްވާފައިވާ ކަމަށާއި ސެކްރެޓަރީ ޖެނެރަލް މުހައްމަތު ތޮލާލު އުޒުރުވެރިވެވަޑައިގަންނަވާކަން އަންގާފައިވާ ކަމަށް ނޫސްވެރިންގެ ބައްދަލުވުމުގައި އައްބާސް ވިދާޅުވި އެވެ. އެހެން ނަމަވެސް ތޮލާލް އެކަން ދޮގު ކުރެއްވި އެވެ.
ތޮލާލް "އަދަދު" އަށް ވިދާޅުވީ ޕާޓީ ދުވަހުން ދުވަހަށް ހިންގުމުގެ ޒިންމާތައް އުފުއްލަވަން އުޒުވެރިވެވަޑައިގަންނަވާ ކަން ރައީސް ޔާމީނަށް އަންގަވާފައި ނުވާނެ ކަމަށެވެ.=
"އަޅުގަނޑު އުޒުރުވެރިއެއް ނުވަން. ޕާޓީގެ އެސްޖީކަން ނުކުރެވޭނެ ކަމަށް އަޅުގަނޑު ނުބުނަން. އެސްޖީގެ ހައިއްޔަތުން ކުރަން ވިދާޅުވި ކަމެއް ނޯންނާނެ ނުކޮށްފައެއް ވެސް. އެހެންވީމާ ކަނޑައެޅިގެން ދޮގު ވާހަކަތަކެއް އެ ދައްކަނީ،" ތޮލާސް ވިދާޅުވި އެވެ.
ޕީޕީއެމްގެ ތަރުމާނުކަމުން ހީނާ ވަލީދު އިސްތިއުފާދެއްވި ކަމަށް އައްބާސް ވިދާޅުވި ނަމަވެސް އެއީ ވެސް ދޮގެއް ކަމަށް ތޮލާލް ވިދާޅުވި އެވެ. ޕީޕީއެމުން މީޑިއާއަށް މައުލޫމާތު ދޭ ވަޓްސްއެޕް ގްރޫޕްގައި ނޫސްވެރިއަކު ސުވާލުކުމުން ހީނާ ވެސް ވިދާޅުވީ އިސްތިއުފާ ނުދެއްވާ ކަމަށެވެ.
ޕީޕީއެމްގައި އެންމެ އިސް ބޭފުޅުންގެ ގޮތުގައި މަސައްކަތް ކުރައްވަން (ގާނޫނީ ހުރަހެއް ނެތި) މިހާރު ތިއްބެވީ ޑިފެންސް މިނިސްޓަރު މުހައްމަދު ޣައްސާން މައުމޫނާއި ފިޝަރީޒް މިނިސްޓަރު އަހުމަދު ޝިޔާމެވެ.
ތޮލާލް ވިދާޅުވި ގޮތުގައި މިރޭގެ ނޫސްވެރިންގެ ބައްދަލުވުމަކީ އެ ދެބޭފުޅުންނަށް ވެސް ނާންގައި ބޭއްވި ބައްދަލުވުމެކެވެ.
