މާލެ ހޮސްޕިޓަލްސް ގްރޫޕްގެ ހިންގުމުގެ ހުރިހާ ކަމެއް ބެލެހެއްޓުމަށްޓަކައި އުފައްދަވާފައިވާ ބޯޑުގެ ނަން .ބަދަލުކޮށް އެއީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ހިނގާ ބޯޑެއްގެ ގޮތުގައި އެމަނިކުފާނު މިއަދު ހަމަޖައްސަވައިފި އެވެ.
މިއަދު ރައީސް މުއިއްޒު ނިންމެވީ އެ ބޯޑުގެ ނަން "މާލެ ސިޓީ ގްރޫޕް އޮފް ހޮސްޕިޓަލްސްގެ ގަވަނިން ބޯޑް" އަށް ބަދަލުކުރުމަށެވެ. އެ ބަދަލާ އެކު އެ ބޯޑު އަލުން އެމަނިކުފާނު އެކުލަވައިލައްވާނެ ކަމަށް ރައީސް އޮފީހުން ބުންޏެވެ.
އެ އޮދީހުން ބުނި ގޮތުގައި ބޯޑުގެ މަސައްކަތްތައް އިދާރީ ގޮތުން ހިނގާނީ ހެލްތު މިނިސްޓްރީގައި އެެވެ.
"މިބަދަލާއެކު، މާލެ ސިޓީ ގްރޫޕް އޮފް ހޮސްޕިޓަލްސްގެ ގަވަރނިން ބޯޑަކީ، ރައީސުލްޖުމްހޫރިއްޔާގެ އިރުޝާދުގެ ދަށުން ހިނގާ އަދި އެ މަނިކުފާނަށް ޖަވާބުދާރީވާނެ ތަނެއްގެ ގޮތުގައި ވަނީ ހަމަޖައްސަވާފަ," ރައީސް އޮފީހުން ބުނެފައިވެ އެވެ.
"މާލެ ހޮސްޕިޓަލްސް ބޯޑް އޮފް ޓްރަސްޓީސް" ގެ ނަމަށް އެ ބޯޑުގެ ނަން ފެބްރުއަރީ 16, 2020 ގައި ބަދަލުކުރެއްވީ ކުރީގެ ރައީސް އިބްރާހިމް މުހައްމަދު ސޯލިހު އެވެ. އެ ބަދަލު ގެނައުމުގެ ކުރިން އެ ބޯޑަށް ކިޔަނީ "މާލެ ހޮސްޕިޓަލްސް ގަވަރނިންގ ބޯޑް" އެވެ.
