ރާއްޖޭގެ އާ ސަރުކާރު އުފެދުމާއެކު އާ ފޮރިން މިނިސްޓަރު މޫސާ ޒަމީރާ ގާތުން މަސައްކަތް ކުރައްވަން އުއްމީދުކުރައްވާ ކަމަށް އިންޑިއާގެ އެކްސްޓާނަލް އެފެއާޒު މިނިސްޓަރު ޖައިޝަންކަރު މިއަދު ވިދާޅުވެއްޖެ އެވެ.
ޒަމީރަށް މަރުހަބާ ވިދާޅުވެ، އެކްސްގައި ލިއުއްވި ލިއުއްވުމެއްގައި ޖައިޝަންކަރު ވިދާޅުވީ ގާތުން މަސައްކަތް ކުރެއްވަން އުއްމީދުކުރައްވާ ކަމަށެވެ. ޖައިޝަންކަރުގެ އެ ލިއުއްވުމަށް ޖަވާބު ދެއްވަމުން ޒަމީރު ވިދާޅުވީ ދެ ގައުމުގެ މަސްލަހަތު އޮތް ކަންކަމާއި ކަންބޮޑުވުން ހުރި ކަންކަމުގައި ގުޅިގެން މަސައްކަތް ކުރައްވަން ހުންނެވި ކަމަށެވެ.
އޭނާ ވިދާޅުވި ގޮތުގައި އިންޑިއާ އާ އެކުގައި އޮތް ޒަމާންވީ ގުޅުން އިތުރަށް ކުރިއަރުވާނީ ވިސްނަން ޖެހޭ ކަންކަމާ ވިސްނައި ގެންނަން ޖެހޭ ބަދަލުތައް ގެނައުމާއެކު ދެގައުމުގެ ރައްޔިތުންގެ ލާބައަށް ކަމަށެވެ.
ރައީސް ޑރ. މުހައްމަދު މުއިއްޒު ރައީސްކަމުގެ ހުވާ ކުރައްވައި އިއްޔެ އާ ސަރުކާރެއް އެކުލަވައިލި އިރު، އިންޑިއާއާމެދު އާ ސަރުކާރުން ކަންބޮޑުވާ ބޮޑު މައްސަލައެއް އެބަ އޮތެވެ. އެއީ ރާއްޖޭގައި އިންޑިއާ ސިފައިން ތިބޭ މައްސަލަ އެވެ.
ރާއްޖޭގައި ތިބި އިންޑިއާ ސިފައިން އަނބުރާ އެގައުމަށް ފޮނުވައިލުމަކީ ރައީސް މުއިއްޒުގެ ރިޔާސީ ވައުދެކެވެ. އެ މަސައްކަތް ފުރަތަމަ ދުވަހު ކުރައްވާނެ ކަމަށް ވަނީ ވިދާޅުވެފަ އެވެ.
ރައީސްކަމުގެ ހުވާކުރެއްވުމަށް ފަހު އިއްޔެ ކުރެއްވި ތަގުރީރުގައި މުއިއްޒު ވިދާޅުވީ ދިވެހި ދައުލަތުގެ މިނިވަންކަމުގެ "ރަތް ރޮނގު" ދަމާނީ ފަލަކޮށް ކަމަށާއި ބޭރުގެ އެއްވެސް ގައުމެއްގެ ސިފައިން ނެތް ފަސްގަނޑަކަށް ހައްދަވާނެ ކަމަށެވެ.
