ނެޝަނަލް ސެކިއުރިޓީ އެޑުވައިޒަރުގެ ނަމުގައި ރައީސް ޑރ. މުހައްމަދު މުއިއްޒު، މިނިސްޓަރު ފެންވަރުގެ މަގާމެއް އުފައްދަވައި އެ މަގާމަށް ކުރީގެ ޑެޕިއުޓީ ޕޮލިސް ކޮމިޝަނަރު، އިބްރާހިމް ލަތީފް އައްޔަންކުރައްވައިފި އެވެ.
އެޑްވައިޒަރަކަށް އައްޔަން ކުރައްވައި މިރޭ ފަތްކޮޅު ހަވާލުކުރެއްވި، އިބްރާހިމް ލަތީފުއަކީ މީގެ ކުރިން ފުލުހުންގެ މުއައްސަސާއާއި ސިފައިންގެ ތެރޭގައި ވެސް އިސް މަގާމުތައް ފުރުއްވާފައިވާ ބޭފުޅެކެވެ.
ސިފައިންގެ ހިތުމަތާ އިބްރާހިމް ލަތީފު ގުޅިވަޑައިގެންނެވީ 1984 ވަނަ އަހަރު ލާންސް ކޯޕުރަލްއެއްގެ ގޮތުގަ އެވެ. ސިފައިންގެ ތެރޭގައި އުޅުއްވި ދުވަސްވަރު ސެކިއުރިޓީ ޑިވިޝަންގެ ކޮމާންޑިން އޮފިސަރުގެ މަގާމު ފުރުއްވައިފައިވެ އެވެ.
އޭގެފަހުން ފުލުހުންނާއި ސިފައިން ދެ މުއައްސަސާއެއްގެ ގޮތުގައި ހިންގަން ފެށުމާއެކު ފުލުހުންގެ އިދަރާއަށް ބަދަލުވެވަޑައިގެން، ފުލުހުންގެ ހެޑް އޮފް ކުރިމިނަލް އިންވެސްޓިގޭޝަންގެ މަގާމާއި ފުލުހުންގެ ޑެޕިއުޓީ ކޮމިޝަނަރުގެ މަގާމު ފުރުއްވައިފަ އެވެ. ފުލުހުންގެ އިދާރައިގައި 23 އަހަރު ހިދުމަތް ކުރެއްވުމަށްފަހު ލަތީފު ރިޓަޔާ ކުރެއްވީ 2007 ވަނަ އަހަރު އެވެ.
ރާއްޖޭގެ ފުލުހުންގެ ހިދުމަތުން ރިޓަޔާ ކުރެއްވުމަށްފަހު އިބްރާހިމް ލަތީފު ވަނީ ވެސްޓާން އޮސްޓުރޭލިއާ ޕޮލިސްގެ ސީނިއާ އެޑްވައިޒަރެއްގެ މަގާމު ވެސް އަދާ ކުރައްވައިފަ އެވެ.
