ވައްކަމާއި ކޮރަޕްޝަނަށް މިއަދު އުފެދުނު އާ ސަރުކާރުން ހަރު އަޑުން ނޫނެކޭ ބުނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް ކަމުގެ ހުވާ ކުރެއްވުމަށް ފަހު ދެއްވި ތަގުރީރުގައި ރައީސް މުއިއްޒު ވިދާޅުވީ ކޮރަޕްޝަނަށް އެމަނިކުފާނު އެއްވެސް ޖާގައެއް ނުދެއްވާނެ ކަމަށެވެ. މި އުފެދުނު އާ ސަރުކާރުގައި އެ ކަންކަމަށް ފިޔަވަޅު އަޅުއްވާނެ ކަމަށް ވެސް އެމަނިކުފާނު ވިދާޅުވި އެވެ.
އާ ސަރުކާރުގެ ދެ ފުށް ފެންނާނެ ކަމަށް ރައީސް މުއިއްޒު ވިދާޅުވި އެވެ. ފޮރުވާނެ، ސިއްރުކުރާނެ އެއްވެސް ކަމެއް ނޯންނާނެކަމަށްވެސް ރައީސް މުއިއްޒު ވިދާޅުވި އެވެެ.
މުއިއްޒުގެ ވާހަކަފުޅުގައި ރިޔާސީ އިންތިހާބުގެ ކެމްޕެއިންގައި ވެފައިވާ ވައުދުތައް ފުއްދާނެ ކަމަށާއި ހީލަތްތެރި ނުވާނެ ކަމަށް ވެސް ވިދާޅުވި އެވެ.
ރިޔާސީ އިންތިހާބުގެ ކެމްޕެއިނުގައި މުއިއްޒު ވަނީ އެމަނިކުފާނުގެ ވެރިކަމެއްގައި ކޮރަޕްޝަންގެ އަމަލެއް ހިންގާކަން ފާހަގަވެއްޖެނަމަ، އަމިއްލަ އިސްނެންގެވުމަށް މައްސަލަ ބަލައި ފިޔަވަޅު އަޅުއްވާނެ ކަމަށް ވިދާޅުވެފަ އެވެ.
އަދި, ސަރުކާރުގެ މަގާމުތަކަށް ހޮވާނީ އިހްލާސްތެރިކަމާ އެކު މަސައްކަތް ކުރައްވާނެ ބޭފުޅުންކަން ފާހަގަކުރައްވައި މަގާމްތަކަށް ހޮވާ ބޭފުޅުން ވާނީ ރައްޔިތުން ފަހުރުވެރިވާނެ ފަދަ ބަޔަކަށް ކަމަށް ރައީސް މުއިއްޒު ވިދާޅުވި އެވެ. އެމަނިކުފާނުގެ ޓީމުގައި ހިމެނިވަޑައިގަންނަވާނީ ޖަވާބުދާރީ ދެވޭނެ ފަދަ ބޭފުޅުން ކަމަށް ވިދާޅުވި އެވެ.
