ގައުމު ބިނާ ކުރުމުގައި އުމުރާނީ ތަރައްގީ އާއި އިންސާނީ ވަސީލަތްތައް ކުރިއެރުވުމަށް އެއްވަރަކަށް އިސްކަން ދެއްވާނެ ކަމަށް ވެރިކަމާ ދާދި ދެންމެއަކު ހަވާލުވެވަޑައިގެންނެވި ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ
އެމަނިކުފާނު ވަނީ މިއަދު ހަވީރު ޖުމްހޫރީ މައިދާނުގައި ބޭއްވި ރައްޔިތުންގެ މަޖިލީހުގެ ޖަލްސާގައި ވެރިކަމުގެ ހުވާ ކުރައްވައި އެ މަގާމާ ހަވާލުވެވަޑައިގަނެފަ އެވެ. ހުވާ ކުރެއްވުމަށް ފަހު ތަގުރީރު ކުރައްވަމުން އެމަނިކުފާނު ވަނީ ދިވެހިންގެ އުންމީދުތައް ހާސިލުކޮށްދީ ކަންބޮޑުވުންތައް ހައްލު ކޮށްދިނުމުގެ ވިންދު ހިތުގައި ޖަހަމުންދާ ކަމަށް ވިދާޅުވެފަ އެވެ.
"މިއަދަކީ ވަރަށް ތާރީހީ ދުވަހެއް. މިއަދަކީ ވަރަށް އުންމީދީ ވަގުތެއް. މި މައިދާނަކީ ނަސްރާއި ކާމިޔާބީގެ މައިދާނެއް. އިރާދަކުރެއްވިއްޔާ މިއަދަކީ ޒަމާންތަކަކަށް ފަހު ދިވެހީން ދިވެހީންގެ ރާއްޖެއަށް އަލުން އެނބުރި ދިޔުމުގެ ހާއްސަ ދަތުރުގެ ރިޔާ ކޮށާލި ދުވަސް," ރައީސް ވިދާޅުވި އެވެ.
އޭގެ އިތުރުން, ދައުލަތެއްގެ ސަލާމަތާއި ދުނިޔޭގައި ގަދާރާއި އާރާބަރު ނެގެހެއްޓުމަށްޓަކައި ދެ ބާވަތެއްގެ ބިނާ ކުރުމެއް ބިނާ ކުރަން ޖެހޭ ކަމަށާއި އެއީ އުމުރާނީ ބިނާ ކުރުމާއި އިންސާނީ ބިނާ ކުރުން ކަމަށް އެމަނިކުފާނު ވިދާޅުވި އެވެ.
"ގެދޮރާއި, ދިފާއީ ބުރުޒުތަކާއި, މަގުތަކާއި, ފާލަންތަކާއި އޮފީސްތައް ބިނާ ކުރުން ހެޔޮ ވިސްނުން ހުރި ސިކުނޑިތަކެއް ލިބިފައިވާ އަހުލާގު ރަނގަޅު މުޖުތަމައުއެއް ބިނާ ކުރުން. ގައުމުގެ ފަސްގަނޑު ބިނާ ކުރުމާއި ގައުމުގެ ސިކުނޑިތައް ބިނާ ކުރުން. މި ފެށުނު ރިޔާސީ ދައުރުގެ ސިޔާސަތަކަށް ވާނީ މި ދެ ބާވަތުގެ ބިނާ ކުރުން ވަޒަން ހަމަކޮށް ކުރިއަށްގެންދިޔުން. އިލްމާއި ހުނަރު, އަހްލާގާއި ދީން. އުޅުންތެރިކަމާއި މަސައްކަތްތެރިކަން," ރައީސް ވިދާޅުވި އެވެ.
ރާއްޖޭގެ ބިނާވެއްޓަށް އިންގިލާބީ ބަދަލުތަކެއް ގެނައުމަށް މަސައްކަތް ކުރައްވާނެ ކަމަށް ވެސް އެމަނިކުފާނު ވިދާޅުވި އެވެ.
