ކުންފުނިތަކުގެ ވެރިން ނެތް ހާލަތެއް މެދުވެރިވެއްޖެ ނަމަ ބޮޑެތި މާލީ އަދި ވިޔަފާރީގެ މުއާމަލާތްތައް ނުހިންގުމަށް ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ)ން އަންގައިފި އެވެ.
ޕީސީބީން ނެރުނު ބަޔާނެއްގައި ބުނީ، ސަރުކާރު ހިއްސާވާ ކުންފުނިތަކުގެ ބޯޑުތަކުގައި ހިމެނޭ އެގްޒެކްޓިވް މެންބަރުން ނެތް ހާލަތެއްގައި އަމަލުކުރަން ޖެހޭ ގޮތް ސާފުކުރުމަށް ބައެެއް ކުންފުނިތަކުން އެ ބޯޑަށް ގުޅަމުން އަންނަ ކަމަށެވެ.
ޕީސީބީން ބުނީ ކުންފުނީގެ މެނޭޖިން ޑިރެކްޓަރު، ޑެޕިއުޓީ މެނޭޖިން ޑިރެކްޓަރު ނުވަތަ ސީއީއޯ ނެތް ހާލަތެއްގައި ކުންފުނީގެ ހިންގުން ހަވާލުވާނީ އެގްޒެކްޓިވް ބޯޑުގެ މެންބަރަކަށް ކަަމަށެވެ.
އެގްޒެކްޓިވް މެންބަރެއް ވެސް ނެތް ހާލަތުގައި އަމަލުކުރަންވީ ގޮތް:
- ޑިރެކްޓަރުންގެ ބޯޑުގައި ނުހިމެނޭ ކުންފުނީގެ މެނޭޖްމެންޓުގެ އެންމެ އިސް ފަރާތަކާ ހިންގުން ހަވާލުކުރުން
- ކުންފުނީގެ ބޯޑަށް އެގްޒެކްޓިވް މެންބަރަކު އައްޔަންކުރުމާ ދެމެދު، ދުވަހުން ދުވަހަށް ހިންގަން ޖެހޭ މުއާމަލާތްތައް ފިޔަވައި ބޮޑެތި މާލީ ނުވަތަ ވިޔަފާރީގެ މުއާމަލާތްތައް ނުހިންގުން
- ކުންފުނި ހިންގުން ވަގުތީ ގޮތުން ހަވާލުކުރާ ފަރާތުގެ މަގާމާއި އީމެއިލް އަދި ގުޅޭނެ ނަންބަރު ޕީސީބީއާ ހަވާލުކުރުން
މާދަމާ އިންތިހާބީ ރައީސް ހުވާކުރައްވާ އިރު، މިވަގުތު ސަރުކާރުގެ ބައެއް ކުންފުނިތަކުގެ ސިޔާސީ މަގާމުތަކުގައި ތިއްބެވި ބައެއް ބޭފުޅުން އަންނަނީ އިސްތިއުފާ ދެއްވަމުންނެވެ.
