ހިމާޔަތްކޮށްފައިވާ ގާދޫގައި ޓްރާންސިޓް ބަނދަރެއް ގާއިމުކުރާތީ ތިމާވެށި ރައްކާތެރިކުރުމަށް ވަކާލާތުކުރާ ޖަމިއްޔާއެއް ކަމަށްވާ އީކޯކެއާ މޯލްޑިވްސްއިން ކަންބޮޑުވުން ފާޅުކޮށްފި އެވެ.
އީކޯކެއާއިން ކުރި ޓްވީޓެއްގައި ބުނީ، އެރަށަކީ ވެލާ/ކަހަނބު ބިސްއަޅަން އަރާ ރަށެއް ކަމަށްވުމުން ބަންކަރިން ފެސިލިޓީއަކާއި ޓްރާންސިޓް ބަނދަރެއް ތަރައްގީ ކުރުމަށް ނިންމާފައިވާތީ ކަންބޮޑުވާ ކަމަށެވެ.
ހުވަދު އަތޮޅާއި އާއި ލާމު އަތޮޅު ދެމެދުގައި ހުވަދޫ ކަނޑަކީ ގިނަ އަދަދެެއްގެ އާގު ބޯޓުތައް ދަތުރުކުރާ ވަން އެންޑް ހާފް ޑިގްރީ ޗެނަލެވެ. އެ ޗެނަލުން ދަތުރުކުރާ އާގު ބޯޓުފަހަރަށް ތެޔޮ އެޅޭ ގޮތަށާއި އެހެން ބައެއް ހިދުމަތް ދެވޭ ގޮތަށް ގާދޫ ތަރައްގީ ކޮށް، އެ ރަށާއި ފޮނަދުއާ ދެމެދު އޮތް ފަޅުގައި ރިސޯޓެއް ތަރައްގީކުރުމަކީ އިންތިހާބީ ރައީސް ޑރ. މުހައްމަދު މުއިއްޒުގެ ވައުދެކެވެ.
އިކޯކެއާއިން ބުނެފައިވާ ގޮތުގައި އެ ރަށަކީ ރާއްޖޭގައި އެންމެ ގިނައިން ވެލާ ބިސް އެޅުމަށް އަރާ ރަށެވެ. އަދި, އެއީ އެކި ދިރުންތަކުން ވަރަށް މުއްސަނދި ސަރަހައްދެއް ކަމަށް ވެސް އެ ޖަމިއްޔާއިން ބުނެފައިވެ އެވެ. މި ދިރުންތައް ނެތިދާނެ ކަމުގެ ކަންބޮޑުވުން އެ ޖަމިއްޔާގެ އެބަ އޮތެވެ.
"ގާދޫއަކީ ޓްރާންސްޝިޕްމަންޓް ބަނދަރަކާއި ބަންކަރިން ފެސިލިޓީ ހިމެނޭ ތަނަކަށް ހަދައިދޭނަން. ފޮނަދު އާއި ގާދޫއާ ދޭތެރޭ އޮތް ޖާގައިގައި ހިއްކައިގެން ރިސޯޓެއް ގާއިމް ކޮށްދޭނަން. އަދި މިރަށާއި ރިސޯޓާއި, ރިސޯޓާއި ގާދޫ އާއި ކޯޒްވޭއަކުން ގުޅާލާނަން," ކެމްޕޭނުގެ ފުރަތަމަ ބުރުގައި ފޮނަދޫގައި ބޭއްވި ޖަލްސާގައި މުއިއްޒު ވިދާޅުވި އެވެ.
ގާދޫ އަކީ ކުރިން މީހުން ދިރިއުޅުނު ރަށެކެވެ. އެ ރަށުގެ މީހުން ލ. ފޮނަދު އަށް ބަދަލުކުރީ 2016 ގަ އެވެ. ގާދޫގެ ދެކުނު ފަރާތާއި ހުޅަނގު ފަރާތުގެ ގޮނޑުދޮށަކީ ވެލާ، ކަހަނބު ބިސްއަޅާ، ވިހާ އާލާވާ ކަމަށް ޒަމާނުންސުރެ ފާހަގަކޮށްލެވޭ ސަރަހައްދެކެވެ.
ރަށުގެ ވަށައިގެންވާ މޫދުވިނަ ސަރަހައްދުން ހަ ބާވަތެއްގެ މޫދު ވިނައާއި، 91 ބާވަތެއްގެ ފަރުމަސް ފެނިފައިވާ ކަމަށް ރެކޯޑުކުރެވިފައިވެ އެވެ. މި ހިތްގައިމު ރަށުގައި މީރު ފެން ކުޅިއެއް ވެސް އޮވެ އެވެ.
