އާ ސަރުކާރުން ރެއާ ދުވާލު ކުރާނެ ކަމަކީ ހެޔޮ ނަތީޖާތައް ނެރެ، ތަފާތު ދައްކުވައިދިނުން ކަމަށް އިންތިހާބީ ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރިޔާސީ އިންތިހާބުގައި ޕީއެންސީގެ ރިޔާސީ ކެންޑިޑޭޓްގެ ހައިސިއްޔަތުން ވެވަޑައިގެންނެވި ވައުދުތަކާއި ކުރެއްވި ތަގުރީރުތައް ފޮތެއްގެ ސިފައިގައި ނެރުމާއި ފުރަތަމަ 100 ދުވަހުގެ ޕްލޭން އިފްތިތާހުކުރަން ދަރުބާރުގޭގައި މިރޭ ބޭއްވި ހަފުލާގައި މުއިއްޒު ވިދާޅުވީ އެމަނިކުފާނާއި، ސަރުކާރާ ހަވާލުވާ އެމަނިކުފާނުގެ ޓީމުން ކުރަން އުޅެނީ ގައުމީ ދީނީ އަދި ގައުމީ މަސައްކަތެއް ކަަމަށެވެ. އެ މަސައްކަތުގައި ސަރުކާރުގެ މަގާމު ތަކަށް ވަޑައިގަންނަވާ ހުރިހާ ބޭފުޅުން އިހުލާސްތެރިވާން ޖެހޭނެ ކަމަށް ވެސް އެމަނިކުފާނު ވިދާޅުވި އެވެ.
"އަޅުގަނޑުމެން މިއުޅެނީ ގައުމަށް ހެޔޮ ގޮތްތަކެއް ހޯދައިދޭން، ނަތީޖާއެއް ނެރެދޭން. ނަތީޖާތަކެއް ނެރެދޭން. ރެއާ ދުވާލު އަޅުގަނޑުމެން ކުރާނެ މަސައްކަތަކަށް ވާނީ ނަތީޖާ ނެރުން، ތަފާތު ދައްކުވައިދިނުން،" މުއިއްޒު ވިދާޅުވި އެވެ.
"ވައުދުތައް ފޮތެއްގެ ގޮތުގައި ނެރުން ގޯސް ކަމަށް ބައެއް ބޭފުޅުން ދެންނެވި"
މުއިއްޒު ވިދާޅުވި ގޮތުގައި ރިޔާސީ އިންތިހާބުގެ ވައުދުތައް ފޮތެއްގެ ސިފައިގައި ނެރުނީ ހާމަކަން ބޮޑު ގޮތެއްގައި މަސައްކަތް ކުރައްވަން ކަމަށާއި ވައުދުތައް ފުއްދާ މިންވަރު ބަލަން ރައްޔިތުންނަށް ފަސޭހަކޮށްދެއްވަން ކަމަށެވެ. އެގޮތަށް ފޮތެއް ނެރުމަކީ ގޯސް ކަމެއް ކަމަށް ބައެއް ބޭފުޅުން ދެންނެވި ކަމަށް، ސަމާސާ ރާގެއްގައި އެމަނިކުފާނު ވިދާޅުވި އެވެ.
"އަޅުގަނޑަށް ބައެއް ބޭފުޅުން ދެންނެވި ތިއީ ވަރަށް ގޯސް ކަމެކޭ ތިޔަ ކުރީ، ވަރަށް ނުރައްކާތެރި ކަމެކޭ. ދެން ތި ފޮތް ނެރެގެން، ނޯންނާނޭ ފިލޭނެ އެއްގޮތް ވެސް،" މުއިއްޒު ވިދާޅުވި އެވެ.
ރިޔާސީ އިންތިހާބުގެ ކެމްޕެއިނުގެ ހަނދާން އާކުރައްވަމުން އެމަނިކުފާނު ވިދާޅުވީ ރިޔާސީ އިންތިހާބަށް ނުކުމެވަޑައިގެންނެވީ ކެމްޕެއިންކޮށް ރައްޔިތުންގެ ވޯޓު ލިބިވަޑައިގެންނެވުމުން "ފިލާކަށް ނޫން" ކަމަށެވެ.
ރިޔާސީ ދައުރުގެ ފުރަތަމަ 100 ދުވަހު އިސްކަންދީގެން ކުރާނެ މަސައްކަތްތަކުގެ ޕްލޭން މިރޭގެ ހަފުލާގައި އާއްމުކުރި އެވެ. މުއިއްޒު ވިދާޅުވި ގޮތުގައި އެ ޕްލޭންގައި ފުރަތަމަ 14 ހަފުތާ ތެރޭގައި ކުރާނެ ކަންތައްތަކެއް ހިމަނާފައި އެވަނީ ހަމަ އެކަނި އެ މަސައްކަތްތައް ކުރާކަށް ނޫނެވެ. އެމަނިކުފާނުގެ ސަރުކާރުން އެއަށް ވުރެ މާ އިތުރަށް ވެސް މަސައްކަތްކުރާނެ ކަމަށް ވިދާޅުވި އެވެ.
ރާއްޖޭގެ ރައީސްކަމާ މުއިއްޒު ހަވާލުވެވަޑައިގަންނަވާނީ އަންނަ ހުކުރު ދުވަހު ހަވީރު އެވެ.
