ހުކުރު ދުވަހު ހަވީރު ބާއްވާ އިންތިހާބީ ރައީސް ޑރ. މުހައްމަދު މުއިއްޒު ހުވާ ކުރެއްވުމުގެ ރަސްމިއްޔާތަށް އިންޑިއާއަށް ދިން ދައުވަތު ގަބޫލުކުރި ނަމަވެސް، ބޮޑުވަޒީރު ނަރެންދުރަ މޯދީގެ ބަދަލުގައި ވަޑައިގަންނަވާނީ އާތު ސައިންސް މިނިސްޓަރު ކިރަން ރިޖުޖު ކަން އެނގިއްޖެ އެވެ.
ރައްޔިތުންގެ މަޖިލީހުން އިންޑިއާއަށް ދީފައިވާ ދައުވަތާ ގުޅިގެން "އަދަދު" އަށް މައުލޫމާތު ދެއްވަމުން ރާއްޖޭގައި ހުންނަ އިންޑިއާގެ ހައިކޮމިޝަނުގެ އިސް އޮފިޝަލަކު ވިދާޅުވީ، މުއިއްޒު ހުވާ ކުރައްވާ ރަސްމިއްޔާތަށް ސައިންސް މިނިސްޓަރު ވަޑައިގަންނަވަނީ ބޮޑުވަޒީރުގެ ހާއްސަ މަންދޫބެއްގެ ގޮތުގައި ކަމަށެވެ.
އިންޑިއާއާ ދެކޮޅަށް ގިނަ ހަރަކާތްތަކެއް ހިންގި ޕީއެންސީ ކޯލިޝަނުން އިންތިހާބު ކާމިޔާބުވުމާއެކު، އިންތިހާބީ ރައީސް ހުވާ ކުރައްވާ ރަސްމިއްޔާތަށް އިންޑިއާގެ ބޮޑުވަޒީރު މޯދީއަށް ދައުވަތު ދޭނެކަން ފުރަތަމަ އިއުލާނުކުރެއްވީ ރައްޔިތުން މަޖިލީހުގެ ކުރީގެ ރައީސް މުހައްމަދު ނަޝީދެވެ.
ނަމަވެސް އިންތިހާބީ އޮފީހުން ވަނީ ދައުވަތު އެރުވީ ގައުމުތަކަށް ކަމަށާއި ވަކި ފަރާތަކަށް ނޫން ކަމަށް ބުނެފަ އެވެ.
މޯދީއަށް ވަޑައިނުގަނެވޭ މައިގަނޑު ސަބަބަކީ 17 ގައި އޮންނަ ޖީ20ގެ ވޮއިސް އޮފް ގްލޯބަލް ސަމިޓެވެ. ޖީ20ގެ ރިޔާސަތު މިހާރު ބަލަހައްޓަމުން އަންނަނީ އިންޑިއާއިންނެވެ.
ނޮވެމްބަރު 17 ވަނަ ދުވަހު ވޮއިސް އޮފް ގްލޯބަލް ސަމިޓު ކުރިއަށް ދާނެކަން އިންޑިއާގެ އެކްސްޓާނަލް މިނިސްޓަރު ޑރ. އެސް ޖައިޝަންކަރު އިއްޔެ ދެއްކެވި ވާހަކަފުޅެއްގައި ވެސް ވިދާޅުވެފައިވެ އެވެ.
"އަދަދު" ނޫހަށް އެނގިފައިވާ ގޮތުގައި މުއިއްޒު ހުވާކުރެއްވުމުގެ ރަސްމިއްޔާތަށް ދައުލަތުގެ ވެރިޔަކު ވަޑައިގަންނަވަނީ އެންމެ ގައުމަކުންނެވެ.
ރިޔާސީ އިންތިހާބަށް ފަހު މުއިއްޒު ފުރަތަމަ ފަހަރަށް ރައްޔިތުންނާ ވާހަކަ ދައްކަވަމުން ވެސް ދެއްވި ޔަގީންކަމަކީ ރާއްޖޭގައި ގާއިމުވެ ތިބި އިންޑިއާ ސިފައިން ފޮނުވައިލާނެ ކަމެވެ. އެއަށްފަހު އެކި މީޑިއާތަކަށް ދެއްވި އިންޓަވިއުތަކުގައިވެސް މުއިއްޒު ވަނީ އެ ވައުދު ތަކުރާރުކުރައްވައިފަ އެވެ.
ޕީޕީއެމް/ޕީއެންސީގެ ފުރަތަމަ ސަރުކާރު އަދި ކުރީގެ ރައީސް އަބްދުﷲ ޔާމީނުގެ ވެރިކަމުގައި އަވައްޓެރި އިންޑިއާއާ އޮތް ގުޅުން ވަރަށް ބޮޑު ހީނަރުވެގެން ދިޔަ އެވެ. އެ ވެރިކަމުގައި ގާތް ގުޅުމެއް ބޭއްވީ، އިންޑިއާއާ ވާދަވެރި ޗައިނާއާ އެވެ. އުމްރާނީ ތަރައްގީގެ ގިނަ މަޝްރޫއުތައް ވެސް ހިންގީ ޗައިނާގެ މާލީ އެހީ އާއި ލޯނު މެދުވެރިކޮށެވެ.
މި ސަރުކާރުގައި އިންޑިއާގެ ލޯނު އެހީ މެދުވެރިކޮށް ގިނަ މަޝްރޫއުތައް ރޭވިއިރު، ރާއްޖޭގައި ގާއިމުވެ ތިބި އިންޑިއާ ސިފައިން ފޮނުވާލުމަށް ގޮވާލައި އިދިކޮޅު ފަރާތްތަކުން "އިންޑިއާ އައުޓް" ކެމްޕެއިން ހަރަކާތެއް ވެސް ހިންގި އެވެ. ނަމަވެސް، އިންތިހާބުވުމަށްފަހު މުއިއްޒު ވަނީ އިންޑިއާ ސިފައިން ބޭލުމަކީ މަގުމަތިން ކުރެވޭނެ ކަމެއް ނޫން ކަމަށް ވިދާޅުވެ އަމިއްލަ ހަރަކާތައް ފާޑުވިދާޅުވެފަ އެވެ.
