ނިމިގެން ދިޔަ ރިޔާސީ އިންތިހާބު, ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ކާމިޔާބު ކުރެއްވުމަށްޓަކައި އެންމެ ބޮޑަށް ވިއްކެވީ އިންޑިއާ ސިފައިން ބޭރުކުރުމުގެ ވާހަކަ އާއި 11 އަހަރުގެ ޖަލު ހުކުމެއްގައި ހުންނެވި ޕީޕީއެމްގެ ރައީސް އަބްދުﷲ ޔާމީން މިނިވަން ކުރާނެ ކަމުގެ ވާހަކަ އެވެ. -- އެ ބޭފުޅުންގެ ބަހުން ނަމަ އެއީ "ހަރާމް" ހުކުމެކެވެ.
ދިވެހިރާއްޖޭގެ އެންމެ މަތީ ތަހުތުގައި މުއިއްޒު އިށީނދެވަޑައިގަތުމުގެ ވަގުތު މި ވަނީ ކައިރިވެފަ އެވެ. އަންނަ ހުކުރު ދުވަހުގެ ހަވީރު ޖުމްހޫރީ މައިދާނުގައި ބާއްވާ ހައިބަތު ބޮޑު ރަސްމިއްޔާތުގައި އަށް ވަނަ ރައީސުލްޖުމްހޫރިއްޔާގެ ހުވާ އުމުރުން 45 އަހަރުގެ މުއިއްޒު ކުރައްވާނެ އެވެ.
އެ ހާއްސަ ރައްމިއްޔާތަށް، އަދި ޕީޕީއެމް/ޕީއެންސީގެ މެމްބަރުންނަށް ވަކިން ހާއްސަވާ އެ ރަސްމިއްޔާތައް މިވަގުތު ރަށުބަންދުގައި ހުންނެވި ކުރީގެ ރައީސް އަބްދުﷲ ޔާމީނަށް ދައުވަތު ފޮނުއްވާނެ އެވެ. އެކަން ރައްޔިތުންގެ މަޖިލީހުގެ އިދާރާއިން ކަށަވަރުކޮށް ދިނެވެ. ނަމަވެސް އެ މަނިކުފާނަށް އެ ޖަލްސާގައި ބައިވެރިވެވަޑައިގެންނެވޭނެތޯ ސުވާލު އުފެދެ އެވެ.
ގާނޫނު އޮތް ގޮތް
ދިވެހިރާއްޖޭގެ ޖަލުތަކާއި ޕެރޯލްގެ ގާނޫނުގެ 62 ވަނަ މާއްދާގައި ވަނީ ސިޔާސީ ޕާޓީއަކުން ހިންގާ ހަރަކާތްތަކުގައި ބައިވެރިވުމުގެ ހައްގު، ހުކުމެއް ތަންފީޒުކުރުމަށްޓަކައި ޖަލުގައި ބަންދުކުރެވިފައި ހުންނަ މުއްދަތުގައި ލިބިގެން ނުވާ ކަމަށެވެ.
titledesc
ޔާމީން ގޭބަންދަށް ބަދަލުކޮށް، އަދި ފަހުން އިތުރު ލުއިތަކެއް ދީފައި ވިޔަސް، އެ ލުއިތަކުން ސިޔާސީ ހަރަކާތް ނުހިންގޭ ގޮތަށް "ބަނދެވިފައި" ވަނީ އެ މަނިކުފާނުގެ ވެރިކަމުގައި، އޭރުގެ އިދިކޮޅު ސިޔާސީ ލީޑަރުން މައިތިރިކުރަން ޕެރޯލްގެ ގާނޫނަށް ގެނައި މި އިސްލާހުންނެވެ.
މަޖިލީހުން ހިންގި މުއާމަލާތްތައް
ޖަލުތަކާއި ޕެރޯލްގެ ގާނޫނުގެ 62 ވަނަ މާއްދާ އެހެން އޮތުމާއެކު، މުއިއްޒު ހުވާ ކުރެއްވުމުގެ ރަސްމިއްޔާތަށް ޔާމީނަށް ދައުވަތު ދޭނީތޯ ނިންމިމުމުގެ ކުރިން ރައްޔިތުންގެ މަޖިލީހުގެ އިދާރާއިން ކަރެކްޝަނަލް ސާވިސްގެ ލަފައެއް ހޯދިކަން ވަނީ "އަދަދު" ނޫހަށް އެނގިފަ އެވެ. ސަބަބަކީ، އެމަނިކުފާނަށް ދީފައިވާ ލުއިތަކުގެ ތެރޭގައި ސިޔާސީ ހަރަކާތްތައް ހިންގުމާއި ބައިވެރިވުން ނުހިމެނޭތީ އެވެ.
އެމަނިކުފާނަށް ދިން ލުއިތައް ނަގާނެ ކަމަށް އިންޒާރު ދިނީ ވެސް ޕީޕީއެމްގެ އޮފީހުގައި ސިޔާސީ ހަރަކާތްތައް ހިންގަން ފެށުމުންނެވެ.
ރައްޔިތުންގެ މަޖިލީހުގެ ސިޓީއާ ގުޅިގެން ކަރެކްޝަނަލް ސާވިސްއިން ދިން ޖަވާބުގައި ދެ މާނައެއް ކުރެވެ އެވެ. ސާފުސީދާ ޖަވާބެއް ދިނުމުގެ ބަދަލުގައި އެ އިދާރާއިން ހިފަހައްޓާފައިވަނީ އިގުރާރުގެ ލިޔުމުގައި ބުނެފައިވާ ގޮތެވެ.
މާލޭ ސަރަހައްދުގައި ހަރަކާތްތެރިވެވޭ ގޮތަށް ލުއި ދިނުމަށް އެކުލަވާލި އިގުރާރުގެ ދަށުން ޔާމީންއަށް ހުއްދަ ދީފައި ވަނީ ޑޮކްޓަރީ ފަރުވާގެ އެކިއެކި ބޭނުންތަކަށާއި ކަސްރަތު ކުރުމުގެ އެކިއެކި ބޭނުންތަކުގެ އިތުރުން މުހިންމު އެކި ބޭނުންތަކަށް މާލެ ސަރަހައްދުގެ ކޮންމެ ތަނަކަށް ވެސް ކަރެކްޝަންސްއަށް އެންގުމަށް ފަހު ދިއުމަށެވެ. އަދި މުހިންމު ކަންކަމުގައި ބައްދަލު ކުރަން ބޭނުންވާ މީހުންނާއި ކަރެކްޝަންސްއަށް އެންގުމަކާ ނުލައި ބައްދަލު ކުރުމުގެ ހުއްދަ ދީފައިވެ އެވެ.
ހުވާކުރުމުގެ ރަސްމިއްޔާތަށް ޔާމީން ވަޑައިގަތުމަށް ދައުވަތު ދެއްވައި އެ ދައުވަތު ގަބޫލު ކުރައްވައިފި ނަމަ، ކަރެކްޝަނަލް ސާވިސްއިން އިތުރު ހުރަހެއް ކުރިމަތިކޮށްފާނެތޯ މިއީ އުފެދޭ ސުވާލެކެވެ. ނަމަވެސް ބައެއް ވަކީލުން ވިދާޅުވާ ގޮތުގައި ހުވާކުރެއްވުމުގެ ރަސްމިއްޔާތަށް ޔާމީނަށް ވަަޑައިގެންނެވޭނީ ކަސްރަތަކަށްވާ ހަރަކާތެއް ނަމަ އެވެ.
މުއިއްޒު ހުވާކުރެއްވުމުގެ ރަސްމިއްޔާތަކީ ގައުމީ ހަފުލާއެކެވެ. އެ ހަފުލާގައި ބައިވެރިވުމަށް ހުއްދަ އަށް އެދެންޖެހޭނެ އެވެ. އަދި ކަރެކްޝަނަލް ސާވިސްއިން ހާއްސަ ހުއްދައެއް ޔާމީނަށް ދޭންޖެހޭނެ އެވެ.
