އިންތިހާބީ ރައީސް ޑރ. މުހައްމަދު މުއިއްޒު ހުވާ ކުރައްވަން މި މަހު 17 ގައި ބާއްވާ ރަސްމިއްޔާތަށް އެކި ގައުމުތަކަށް ދިން ދައުވަތުގެ ތެރެއިން، ދައުވަތު ގަބޫލުކުރެއްވީ އަވަށްޓެރި ސްރީ ލަންކާގެ ރައީސް ރަނިލް ވިކްރަމަސިންހު އެކަނިކަން އެނގިއްޖެ އެވެ.
އާ ރައީސް ހުވާކުރެއްވުމުގެ ރަސްމިއްޔާތުގެ މައުލޫމާތު އިނގިލައްވާ ސަރުކާރުގެ އިސް އޮފިޝަލަކު "އަދަދު" އަށް ވިދާޅުވީ، ރަސްމިއްޔާތުގައި ބައިވެރިވެވަޑައިގަންނަވާނެކަން އެންގެވި ހަމައެކަނި ލީޑަރަކީ ރަނިލް ކަމަށެވެ. އަދި އެ ދައުވަތަށް ބައެއް ގައުމުތަކުން މިހާތަނަށް ޖަވާބެއް ދީފައި ނުވާ ކަމަށްވެސް އެ އޮފިޝަލު ވިދާޅުވި އެވެ.
އަވަށްޓެރި ގައުމުތަކުގެ ވެރިންގެ ތެރެއިން އިންޑިއާގެ ޕްރައިމް މިނިސްޓަރު ނަރެންދުރަ މޯދީ، މުއިއްޒު ހުވާ ކުރެއްވުމުގެ ރަސްމިއްޔާތަށް ވަޑައިނުގަންނަވާނެ އެވެ. އިންޑިއާގެ ބައެއް ނޫސްތަކުން ބުނާ ގޮތުން އެ ރަސްމިއްޔާތު އޮންނަ ދުވަހު، އިންޑިއާއިން ރިޔާސަތު ބަަލަހައްޓާ ޖީ20 ގެ ސަމިޓެއްގެ ރިޔާސަތު މޯދީ ބަލަހައްޓަވާނެ އެވެ.
ޕީއެންސީ ކޯލިޝަނުން ގާތް ގުޅުމެއް ބާއްވާ ޗައިނާއަށްވެސް ރަސްމިއްޔާތުގެ ދައުވަތު ދީފައިވާއިރު، އެ ގައުމުންވެސް އަދި ޖަވާބެއް ލިބިފައެއް ނުވެ އެވެ.
އިންތިހާބީ ރައީސް ހުވާކުރައްވާ ރަސްމިއްޔާތު ބާއްވަން ހަމަޖެހިފައިވަނީ ޖުމްހުރީ މައިދާނުގަ އެވެ. މޫސުން ތަން ނުދޭނަމަ މަޖިލިސް އިދާރާގަ އެވެ. މި ރަސްމިއްޔާތުގެ ރަސްމީ ދައުވަތު 3،500 ފަރާތަކަށް ފޮނުވާފައިވާ ކަމަށް މަޖިލިސް އިދާރާއިން ބުނެ އެވެ. އޭގެއިތުރުން 1،000 އާންމުންނަށް ރަސްމިއްޔާތަށް ވަދެވޭނެ އިންތިޒާމު ހަމަޖައްސައިދިނުމަށް މަސައްކަތް ކުރަމުންދާ ކަމަށް އިންތިހާބީ ރައީސްގެ އޮފީހުން ބުނެފައިވެ އެވެ.
މަޖިލީހުގެ ޖަލްސާއެއްގެ ގޮތުގައި ކުރިއަށް ގެންދާ ޑރ. މުއިއްޒު ހުވާ ކުރެއްވުމުގެ ރަސްމިއްޔާތުގެ ހުރިހާ ކަމެއް ކުރުމަށް މަޖިލިސް އިދާރާއިން ވަނީ ސިފައިންގެ ގެ ވެލްފެއާ ކޮމްޕެނީ (ސިވެކް) އާ ހަވާލުކޮށްފަ އެވެ.
ޖުމްލަ 22.9 މިލިއަން ރުފިޔާގެ އަގަކަށް މި ރަސްމިއްޔާތުގެ މަސައްކަތް ހަވާލުކޮށްފައިވާ ސިވެކުން، އެ ސަރަހައްދު ޒީނަތްތެރިކުރުމާއި، ރަސްމިއްޔާތުގެ ކުރިއަށް ގެންދިއުން އަދި ކޭޓަރިންގެ ކަންކަން ވެސް ހަމަޖައްސާނެ އެވެ.
މިހާރު ހުންނެވި ރަައީސް އިބްރާހީމް މުހައްމަދު ސޯލިހު ހުވާކުރައްވަން ގަލޮޅު ދަނޑުގައި ބޭއްވި ރަސްމިއްޔާތުގެ އިވެންޓް މެނޭޖްކުރަން ބަޔަކާ ހަވާލުކުރީ 17 މިލިޔަން ރުފިޔާއަށެވެ.
