ގިނަ ޕާޓީ އެކުލެވޭ ސިޔާސީ ނިޒާމު ރާއްޖެއަށް ތައާރަފުވި ފަހުން އޮމާންކަމާއެކު ވެރިކަން ބަދަލު މިވަނީ މިފަހަރު އެކަނި ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ޖުމްހޫރީ ދުވަހުގެ މުނާސަބާގައި ދެއްވި ހިތާބެއްގައި ރައީސް ސިފަކުރެއްވި ގޮތުގައި ޕާޓީ ނިޒާމު ރާއްޖެއަށް ތައާރަފުކުރި ފަހުން މި ފަހަރު ފިޔަވައި އެހެން ފަހަރުތަކުގައި ވެރިކަން ބަދަލުވެފައި ވަނީ ހަމަ އެކަނި ވޯޓަކުން ނޫނެވެ. އެމަނިކުފާނު ވިދާޅުވި ގޮތުގައި މީގެ ކުރިން އެކަން ހިނގާފައި އޮތީ "ވޯޓުން ނުވިއްޔާ ކޯޓުން ނުވަތަ މަގުމަތިން"ނެވެ.
"ގިނަ ޕާޓީ އެކުލެވޭ ސިޔާސީ ނިޒާމަށް ރާއްޖެ ބަދަލުވި ފަހުން އޮމާންކަމާއެކު ވެރިކަން ބަދަލުވުމުގެ މަރުހަލާ ހިނގަމުން މިދަނީ ހަމައެކަނި މިފަހަރު. މީގެކުރިން އެކަން ހިނގާފައި އޮތީ ވޯޓުން ނުވިއްޔާ، ކޯޓުން ނުވަތަ މަގުމަތިން،" ރައީސް ވިދާޅުވި އެވެ.
އެމަނިކުފާނު އެ އިޝާރާތްކުރެއްވީ ގިނަ ޕާޓީ ބައިވެރިވި ފުރަތަމަ އިންތިހާބު ކާމިޔާބުކުރެއްވި ފުރަތަމަ ރައީސް މުހައްމަދު ނަޝީދުގެ ވެރިކަން 2012 ވަނަ އަހަރު ބަދަލުވި ގޮތާއި 2013 ވަނަ އަހަރުގެ ރިޔާސީ އިިންތިހާބުގެ ފުރަތަަމަ ބުރު ސުޕްރީމް ކޯޓުން ބާތިލުކޮށް ދެވަނަ ފަހަރަށް ވޯޓުލުން ކުރިއަށް ގެންދަން ޖެހުނު ޖެހުމަށެވެ.
އެމްޑީޕީގެ ފުރަތަމަ ސަރުކާރު 2012 ވަނަ އަަހަރު ވެއްޓުނީ އޭރުގެ އިދިކޮޅު ފަރާތްތަކުން ކުރި މުޒާހަރާތަކަށް ފަހު ސިފައިންނާއި ފުލުހުން ހިންގި މިއުޓީނީއަކާ ގުޅިގެން ރައީސް މުހައްމަދު ނަޝީދު އިސްތިއުފާ ދެއްވުމުންނެވެ.
ދެހާސް ތޭރަ ވަނަ އަހަރުގެ ފުރަތަމަ ބުުރު ނިމުނު އިރު ދެވަނަ ބުރަށް ވަޑައިގެންނެވީ އެމްޑީޕީގެ ކެންޑިޑޭޓް މުހައްމަދު ނަަޝީދާއި ޕީޕީއެމްގެ ކެންޑިޑޭޓް އަބްދުﷲ ޔާމީނެވެ. އެ ނަތީޖާއާ އެކު އިންތިހާބު ބާތިލުކޮށްދޭން އެދި ސުޕްރީމް ކޯޓަށް މައްސަލަ ހުށަހެޅުއްވީ ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމެވެ.
ސުޕްރީމް ކޯޓުން ކަނޑައެޅި ގައިޑްލައިނަކާ އެކު ފުރަތަަމަ ބުރު ދެވަނަ ފަހަރަށް ބޭއްވުމުން ވެސް ދެވަނަ ބުރަށް ވަޑައިގެންނެވީ ހަމަ އެ ދެކެންޑިޑޭޓުންނެވެ. އެ ފަހަރު ދެވަަމނަ ބުރުގެ ވޯޓުލައި ނަތީޖާ ސާފުކޮށް ނިމުނު އިރު ވެރިކަން ބަދަލުވާ ތާރީހުގެ ގޮތުގައި ކުރިން އޮތް، ނޮވެމްބަރު 11 އޮތީ ފަހަނައަޅައި ގޮސްފަ އެވެ. އެެހެންވެ އިންތިހާބުވި ރައީސް ހުވާ ކުރެއްވުމާ ދެމެދު މިފަހަރުހެން އިންތިގާލީ މަރުހަލާއެއް ނާދެ އެވެ.
މި ފަހަރު ވެރިކަން އޮމާންކަމާ އެކު ބަދަލުވާކަން ފާހަގަކުރައްވައި ރައީސް ސޯލިހު ވިދާޅުވީ ކުރިއަށް އޮތްތަނުގައި ވެސް ރާއްޖޭގައި އޮންނަ ރިޔާސީ އިންތިހާބުތަކާ، ވެރިކަން ބަދަލުވެގެން ދިއުން މިގޮތުގައި ހިނގަމުން ދާތަން ދިވެހިރައްޔިތުން ދެކޭ ހިތްވާނެ ކަމަށެވެ.
"މި ހޯދުނު ކާމިޔާބީތަށް ހިފަހައްޓާ، ދަމަހައްޓާ ގައުމުގައި އެކަން އަށަގެންނެވުމަކީ ދެން އަންނަ ހުރިހާ ސަރުކާރުތަކާ ވެރިންގެ މަސްއޫލިއްޔަތެއް. ސަރުކާރުތަށް ބަދަލުވާނެ، ވެރިން އައިސް ގޮސްވާނެ. ގާއިމުވެ، ދާއިމުވެ، ދެމިއޮންނާނީ ގައުމާ ރައްޔިތުން،" ރައީސް ވިދާޅުވި އެވެ.
