އާ ރައީސް ޑރ. މުހައްމަދު މުއިއްޒު ހުވާކުރައްވުމަށް މި މަހުގެ 17 ވަނަ ދުވަހު ބާއްވާ ރަސްމިއްޔާތަށް އިންޑިއާގެ ބޮޑުވަޒީރު ނަރެންދުރަ މޯދީ ވަޑައިނުގަންނަވާނެކަން އެނގިއްޖެ އެވެ.
އިންޑިއާގެ ބައެއް ނޫސްތަކުން ރިޕޯޓުކޮށްފައިވާ ގޮތުގައި މުއިއްޒުގެ ހުވާކުރެއްވުމުމުގެ ރަސްމިއްޔާތަށް އިންޑިއާއިން ވަޑައިގަންނަވާނެ ބޭފުޅަކު އަދި ނުނިންމަ އެވެ.
"އަދަދު" ނޫހަށް އެނގިފައިވާ ގޮތުގައި މުއިއްޒު ހުވާކުރެއްވުމުގެ ރަސްމިއްޔާތަށް ދައުލަތުގެ ވެރިޔަކު ވަޑައިގަންނަވަނީ އެންމެ ގައުމަކުންނެވެ.
"އިންޑިއާއިން އަދި ވަކި ޖަވާބެއް ނާންގާ. އެހެންވެ، [ހުވާކުރެއްވުމަށް މިހާ މުއްދަތު ގާތްވެފައިވާއިރު] މޯދީ ވަޑައިގަންނަވާނެ ކަމަށް ނުބެލެވޭ،" ނަން ނުޖެހުމަށް ޝަރުތުކޮށް އޮފިޝަލަކު ވިދާޅުވި އެވެ.
މޯދީ ރާއްޖެ ވަޑައިނުގަންނަވާ މައިގަނޑު ސަބަބަކީ ނޮވެމްބަރު 17 ވަނަ ދުވަހު، ޖީ20ގެ ވޮއިސް އޮފް ގްލޯބަލް ސަމިޓު ބޭއްވުމަށް ނިންމާފައި އޮތުމެވެ. ޖީ20ގެ ރިޔާސަތު މިހާރު ބަލަހައްޓަމުން އަންނަނީ އިންޑިއާއިންނެވެ.
ނޮވެމްބަރު 17 ވަނަ ދުވަހު ވޮއިސް އޮފް ގްލޯބަލް ސަމިޓު ކުރިއަށް ދާނެކަން އިންޑިއާގެ އެކްސްޓާނަލް މިނިސްޓަރު ޑރ. އެސް ޖައިޝަންކަރު އިއްޔެ ދެއްކެވި ވާހަކަފުޅެއްގައި ވެސް ވިދާޅުވެފައިވެ އެވެ.
މުއިއްޒު ހުވާކުރެއްވުމުގެ ރަސްމިއްޔާތަށް މޯދީއަށް ދައުވަތު އަރުވާނެކަން ފުރަތަމަ އިއުލާންކުރެއްވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. އެއަށް ފަހު އިންތިހާބީ ރައީސްގެ އޮފީހުން ވަނީ އެ ރަސްމިއްޔާތަށް އިންޑިއާއަށް ދައުވަތު ދީފައިވާކަން ކަށަވަރުކޮށްދެއްވާފަ އެވެ.
ނަމަވެސް އެ އޮފީހުން ބުނީ ދައުވަތު ދިނީ އަވަށްޓެރި ގައުމުތަކުގެ ވެރިންނަށް ދިން ދައުވަތުގައި ކަމަށާއި އެއީ ވަކި މޯދީ އަށް ދިން ހާއްސަ ދައުވަތެއް ނޫން ކަމަށެވެ.
ރިޔާސީ އިންތިހާބަށް ފަހު މުއިއްޒު ފުރަތަމަ ފަހަރަށް ރައްޔިތުންނާ ވާހަކަ ދައްކަވަމުން ވެސް ދެއްވި ޔަގީންކަމަކީ ރާއްޖޭގައި ގާއިމުވެ ތިބި އިންޑިއާ ސިފައިން ފޮނުވައިލާނެ ކަމެވެ. އެއަށްފަހު އެކި މީޑިއާތަކަށް ދެއްވި އިންޓަވިއުތަކުގައިވެސް މުއިއްޒު ވަނީ އެ ވައުދު ތަކުރާރުކުރައްވައިފަ އެވެ.
ޕީޕީއެމް/ޕީއެންސީގެ ފުރަތަމަ ސަރުކާރު އަދި ކުރީގެ ރައީސް އަބްދުﷲ ޔާމީނުގެ ވެރިކަމުގައި އަވައްޓެރި އިންޑިއާއާ އޮތް ގުޅުން ވަރަށް ބޮޑު ހީނަރުވެގެން ދިޔަ އެވެ. އެ ވެރިކަމުގައި ގާތް ގުޅުމެއް ބޭއްވީ، އިންޑިއާއާ ވާދަވެރި ޗައިނާއާ އެވެ. އުމްރާނީ ތަރައްގީގެ ގިނަ މަޝްރޫއުތައް ވެސް ހިންގީ ޗައިނާގެ މާލީ އެހީ އާއި ލޯނު މެދުވެރިކޮށެވެ.
މި ސަރުކާރުގައި އިންޑިއާގެ ލޯނު އެހީ މެދުވެރިކޮށް ގިނަ މަޝްރޫއުތައް ރޭވިއިރު، ރާއްޖޭގައި ގާއިމުވެ ތިބި އިންޑިއާ ސިފައިން ފޮނުވާލުމަށް ގޮވާލައި އިދިކޮޅު ފަރާތްތަކުން "އިންޑިއާ އައުޓް" ކެމްޕެއިން ހަރަކާތެއް ވެސް ހިންގި އެވެ.
