ރާއްޖޭގައި ތިބި އިންޑިއާ ސިފައިންގެ އަދަދާއި ރާއްޖޭގައި ބަހައްޓާފައިވާ ރާޑަރުތައް ކޮންޓްރޯލްކުރާ ފަރާތްތަކުގެ މައުލޫމާތު، ސަރުކާރުގެ އިދާރާތަކުން އިންތިގާލީ ކޮމިޓީތަކަށް ދީފައި ނުވާ ކަމަށް އިންތިގާލީ ތަރުޖަމާނު މުހައްމަދު ފިރުޒުލް އިއްޔެ ވިދާޅުވި އެވެ.
އިންތިހާބީ ރައީސްގެ އޮފީހުން ބޭއްވި ނޫސްވެރިންގެ ބައްދަލުވުމެއްގައި މި ދެ ކަމުގެ ތަފުސީލަށް އެދި ނޫސްވެރިން ތަކުރާރުކޮށް ސުވާލުކުރުމުންވެސް ފިރުޒުލް ވަނީ ތަފުސީލު ލިބިފައިނުވާތީ ދެވެން ނެތް ކަމަށް ވިދާޅުވެފަ އެވެ. އަދި، އިންތިހާބީ ރައީސް ޑރ. މުހައްމަދު މުއިއްޒު ހުވާ ކުރެއްވުމުގެ ކުރިން އެ ސުވާލު އަމާޒުކުރަން ޖެހޭނީ މިހާރު އޮތް ސަރުކާރާ ކަމަށް ވެސް އޭނާ ވިދާޅުވި އެވެ.
"އިންޑިއާ ސިފައިންގެ އަދަދާ ބެހޭގޮތުން އަޅުގަނޑު އިއްޔެވެސް ފާހަގަކުރީ އެކަށީގެންވާ މައުލޫމާތެއް އަދި އަޅުގަނޑުމެންނަށް ޔަގީންކުރެވޭ މިންވަރަކަށް ލިބިފައެއް ނުވެއޭ،" އޭނާ ވިދާޅުވި އެވެ.
އެ ސުވާލަށް ތަކުރާރުކޮށް ޖަވާބުދެއްވަމުންވެސް ފިރުޒުލް ވިދާޅުވީ އެ ފަދައިންނެވެ. ނަމަވެސް އެއްބާރުލުން ނުދޭ އިދާރާއެއްގެ ނަމެއް ވިދާޅުވެއް ނުވެ އެވެ. ތަކުރާރުކޮށް ވިދާޅުވީ އެ މައުލޫމާތު ނުލިބޭ ކަމަށެވެ.
ރާޑަރުތަކާ ގުޅޭ ގޮތުން ޖަވާބު ދެއްވަމުން ފިރުޒުލް ވިދާޅުވީ "އެކަންކަމާ ގުޅޭ ގޮތުން އަޅުގަނޑުމެންނަށް އެކަށީގެންވާ މައުލޫމާތެއް ލިބިފާ ނުވާ" ކަމަށެވެ.
ފިރުޒުލް މިހެން ވިދާޅުވި އިރު، ރިޔާސީ އިންތިހާބަށްފަހު އިންތިގާލީ ކޮމިޓީތައް އެކުލަވާލާ މަސައްކަތްތައް ފެށިތާ މިހާރު މަސްދުވަސް ވެއްޖެ އެވެ. އެ މަސައްކަތުގެ ތެރެއިން އެއްކުރި މައުލޫމާތުތަކުގެ ތަފުސީލުތައް ފިރުޒުލް އެކި ނޫސްވެރިންގެ ބައްދަލުވުންތަކުގައި ވަނީ ހާމަކުރައްވާފަ އެވެ.
އެގޮތުން، ސަރުކާރު ހިއްސާވާ ކުންފުނިތަކުގެ ތެރެއިން އެކި ކުންފުނިތަކުގެ ހިންގުމުގައި ހުރި މައްސަލަތަކާއި ކޮރަޕްޝަންގެ މައްސަލަތަކުގެ ތަފުސީލުތައް ވެސް އިންތިގާލީ ކޮމިޓީތަކުން ހޯދާ އާއްމުކޮށްފައިވެ އެވެ.
މުހިއްމު ބައެއް ހަބަރު
ދުވަހުގެ ފޮޓޯ
އޭއެފްސީ ކަޕްގައި މާޒިޔާ އާއި އޮޑިޝާ ބައްދަލުކުރި މެޗުގެ ތެރެއިން -- ފިޓޯ: އަބްދުﷲ އިޔާން/އަދަދު
