އަަމިއްލަ އިހުތިޔާރަށް މައްސަލަ ބެލުމުގެ ބާރު އޮތް ނަމަވެސް, މާލޭގައި މަރުވާ މީހުންގެ ކަށުކަމާކެމީގެ ކަންކަން ކުރަމުން އަންނަ އާސަހަރާގެ މިސްކިތާއި ހިނަވާގެ މަރާމާތު ކުރަން ހަވާލުކުރި ކޮންޓްރެކްޓުގެ މަސައްކަތް ނުނިންމައި 3.9 މިލިއަން ރުފިޔާ ކޮންޓްރެކްޓަރަށް ދިން މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ބަލަމުން ނުދާ ކަމަށް ބުނެފި އެވެ.
މި ކޮންޓްރެކްޓު ބާތިލުކުރި މައްސަލަ ބަލާތޯ ސުވާލު ކުރުމުން އޭސީސީގެ މީޑިއާ އޮފިޝަލް ވިދާޅުވީ އެ މައްސަލަ އެ ކޮމިޝަނަށް އަދި ހުށަހަޅާފައި ނުވާ ކަމަށެވެ.
އެ މައްސަލަ ހުށަހަޅާފައި ނުވާތީ އޭސީސީން މިހެން ބުނި ނަމަވެސް އެ ކޮމިޝަނުގެ ގާނޫނުގެ 21 ވަނަ މާއްދާގައި ބަޔާންކޮށްފައިވާ މަސްއޫލިއްޔަތުތަކުގެ ދަށުން މި މައްސަލަ އެ ކޮމިޝަނަށް ބެލޭނެ އެވެ.
titledesc
އާސަހަރާ މިސްކިތުގެ މަރާމާތަށް އެ ސަރަހައްދު ބަންދުކޮށް މަސައްކަތް ފެށީ މިދިޔަ މެއި މަހު އެވެ. އެއިރު ސިޓީ ކައުންސިލުން ބުނި ގޮތުގައި ދެ މަސް ފަހުން މަރާމާތުގެ މަސައްކަތް ނިމިގެން ހިދުމަތް ދެވެން ފެށޭނެ އެވެ.
އެކަމަކު މިއަދާ ހަމައަށް އެ ސަހަރައްދު ރޫޅާލުމުގެ މަސައްކަތާއި ކޮންކްރީޓު ތަނބުތަކެއް ޖެހުމުގެ އިތުރަށް އެއްވެސް މަސައްކަތެއް ކުރެވިފައެއް ނެތެވެ.
މި މަސައްކަތަކީ ސިޓީ ކައުންސިލްގެ ޖަލްސާއަކުން ފާސްކޮށްގެން، ކުރިއަށް ގެންދިޔަ މަޝްރޫއެކެވެ. މަޝްރޫއަށް ކައުންސިލުން ފާސްކުރި ބަޖެޓަކީ 4.9 މިލިއަން ރުފިޔާ އެވެ. މިހާރު ކުރެވިފައިވާ މަސައްކަތްތަކަށް، ކޮންޓްރެކްޓަރަށް 3.9 މިލިއަން ރުފިޔާ ވަނީ ކޮންޓްރެކްޓަރަށް ދީފަ އެވެ.
އެ މަޝްރޫއުގެ އިދާރީ އަދި ފަންނީ މަސައްކަތްތަކުގައި އުޅޭ މުވައްޒަފުން ސިޓީ ކައުންސިލުގެ ޖަލްސާގައި މައުލޫމާތު ދިން ގޮތުގައި، ކޮންޓްރެކްޓަރަށް މަސައްކަތް ހަވާލުކުރި ފަހުން މިސްކިތުގެ ޑިޒައިނާއި އާސަހަރާގެ ކުރެހުމަށް ވެސް ބަދަލުތަކެއް ގެންނަން ބޭނުންވެގެން އެ ކަން ކުރިއަށް ގެންދިޔަ އެވެ.
މަޝްރޫއު ގެންދިޔަ ކައުންސިލްގެ ބިއުރޯ މުވައްޒަފުން ބުނި ގޮތުގައި މަސައްކަތް މަޑުޖެހިގެން ދިޔުމަށް ދިމާވި އެންމެ ބޮޑު ސަބަބަކީ އެއީ އެވެ.
އޭނާ ގަބޫލު ކުރާ ގޮތުގައި ފަހުން ގެނައި ބަދަލުތަކާއެކު އޮތް ކުރެހުންތަކަށް ބެލުމުން، ނިމިފައި ވަނީ 45 ޕަސެންޓެވެ. ނަމަވެސް ކޮންޓްރެކްޓަރާ ހަވާލުކުރި އެއްބަސްވުމުގައިވާ މަސައްކަތުގެ 75 ޕަސެންޓް ނިމިފައިވާ ކަމަށް އޭނާ ބުންޏެވެ.
