ރާއްޖޭގައި ތިބި އިންޑިއާ ސިފައިންގެ ތަފުސީލު އިންތިގާލީ އޮފީހަށް އަދި ނުލިބޭ ކަމަށް އެ އޮފީހުގެ ތަރުޖަމާނު މުހައްމަދު ފިރުޒުލް މިއަދު ވިދާޅުވެއްޖެ އެވެ.
މ.ދިމްޔާތުގައި މިއަދު ބޭއްވި ނޫސްވެރިންގެ ބައްދަލުވުމުގައި "އަދަދު"އިން ކުރި ސުވާލަކަށް ޖަވާބު ދެއްވަމުން ފިރުޒުލް ވިދާޅުވީ އިންޑިއާ ސިފައިން ރާއްޖޭގައި ތިބިކަމާ މެދު ޝައްކެއް ނެތް ކަމަށާއި އެހެން ނަމަވެސް ތިބި އަދަދާ މެދު އެކަށީގެެންވާ މައުލޫމާތެއް ލިބިފައި ނުވާ ކަމަށެވެ. އޭނާ ވިދާޅުވި ގޮތުގައި އިންޑިއާ އާ ގުޅޭ ގޮތުން ކުރިއްސުރެ އޮތީ މައިގަނޑު ދެ ކަންބޮޑުވުމެއް ކަމަށެވެ. އެއީ ރާއްޖެ އާއި އިންޑިއާ އާ ދެމެދު ސޮއިކޮށްފައިވާ އެއްބަސްވުންތަކާ ގުޅޭ ކަންބޮޑުވުމާއި ސިފައިން ތިބުމާ ގުޅޭ ކަންބޮޑުވުމެވެ.
"އިންޑިއާ ސިފައިން ތިބިކަމާ ދޭތެރޭ އެއްވެސް ޝައްކެތް ނެތް މިންވަރަށް މައުލޫމާތު ލިބިފައިވޭ. ސަރުކާރުން ވެސް އެކަން ކޮންފޯމްކޮށްދީފައިވޭ އަދި އިންޑިއާ ސަފީރާއި އިންތިހާބީ ރައީސުލްޖުމްހޫރިއްޔާ ބޭއްވެވި ބައްދަލު ކުރެއްވި ބައްދަލުވުމުގައި، އިންޑިއާ ސަފީރު ވެސް އެކަން ފާހަގަކުރައްވާފައި ވޭ. އެހެން ނަމަވެސް ޖުމުލަ ތިބި އަދަދަކާ ގުޅޭ ގޮތުން އަދި އަޅުގަނޑުމެންނަށް އެންމެ އެކަށީގެންވާ ފުރިހަމަ މައުލޫމާތެއް މިހައިތަނަށް އަދި ލިބިފައެއް ނުވޭ،" ފިރުޒުލް ވިދާޅުވި އެވެ.
އޭނާ ވިދާޅުވި ގޮތުގައި އިންޑިއާ އާ އެކު ރާއްޖޭން ސޮއިކޮށްފައިވާ އެއްބަސްވުންތަކާ ބެހޭ ގޮތުން މައުލޫމާތު ހޯދަން މުއައްސަސާތަކާ އެކު ކުރި މަސައްކަތުގައި އެއްބާރުލުން ލިބުނީ ބައެއް މުއައްސަސާތަކުންނެވެ. ބައެއް މުއައްސަސާތަކުން އެކަށީގެންވާ މައުލޫމާތެއް ލިބިފައި ނުވާ ކަމަށް ވެސް އޭނާ ވިދާޅުވި އެވެ.
އިންޑިއާ ސިފައިންނާއި އެއްބަސްވުންތަކާބެހޭ ގޮތުން އެކަށީގެންވާ މައުލޫމާތު އަދި ނުލިބޭ ކަމަށް ވިދާޅުވި ނަމަވެސް ފިރުޒުލް ވިދާޅުވި ގޮތުގައި އެ ދެކަންތަކުގައި ހުރި ކަންބޮޑުވުންތަކާ ގުޅޭ މަސައްކަތްތަކެއް މިހާރު ވެސް ކުރިއަށް އެބަ ދެ އެވެ. އެގޮތުން ކުރާ މަސައްކަތަކީ އޭނާ ވިދާޅުވި ގޮތުގައި ހައްލުތައް ހޯދަން ކުރާ މަޝްވަރާތަކެކެވެ.
އިންޑިއާ ސިފައިންގެ ތަފުސީލު ނުލިބޭ ކަމަށް ފިރުޒުލު ވިދާޅުވިޔަސް، އެ މައުލޫމާތު އެމްއެންޑީއެފުން ނުވަތަ ޑިފެންސް މިނިސްޓްރީން ނުދިން ކަމަކަށް ސާފުކޮށް ވިދާޅެއް ނުވެ އެވެ.
