އާ ސަރުކާރުގެ އިސް މަގާމަކަށް ވަޑައިގަތުމަށްޓަކައި، އިސްލާމިކް އޮގަނައިޒޭޝަން ފޯ ކަލްޗަރަލް އެންޑް ސިވިލައިޒޭޝަން (އައިއޯސީސީ)ގެ ރައީސްގެ މަގާމުން ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އިސްތިއުފާ ދެއްވައިފި އެވެ.
އިންތިހާބީ ރައީސް ޑރ. މުހައްމަދު މުއިއްޒުގެ ރިޔާސީ ކެމްޕޭނުގައި ވެސް ހަރަކާތްތެރެވި ޝަހީމް އެކަން އިއުލާން ކުރެއްވީ އައިއޯސީސީގެ ފޮތް "އިސްލާމީ ނަޒަރިއްޔާތު" ނެރުމަށް ރޭ އެވިޑު ކޮލެޖުގައި ބޭއްވި ރަސްމިއްޔާތުގަ އެވެ.
އަދަދު ނޫހަށް އެނގިފައިވާ ގޮތުގައި ޝަހީމް އައްޔަން ކުރައްވަނީ އާ ރައީސް ޑރ. މުހައްމަދު މުއިއްޒުގެ ސަރުކާރުގެ އިސްލާމިކް މިނިސްޓަރުގެ މަގާމަށެވެ.
ޕީޕީއެމް/ޕީއެންސީގެ ކޯލިޝަނުގެ ފުރަތަމަ ވެރިކަމުގައި ޝަހީމް ވަނީ އިސްލާމިކް މިނިސްޓަރުކަން ކުރައްވައިފަ އެވެ. އަދި ކުރީގެ ރައީސް އަބްދުﷲ ޔާމީނު ދެ ވަނަ ދައުރަކަށް ވާދަކުރެއްވިއިރު، އެ މަނިކުފާނުގެ ރަނިންމޭޓަކީ ވެސް ޝަހީމެވެ.
އޭގެ އިތުރުން, ރައީސް ޑރ. މުހައްމަދު ވަހީދު ހަސަން މަނިކުގެ ކެބިނެޓުގައި ވެސް ޝަހީމް ވަނީ އިސްލާމިކް މިނިސްޓަރުގެ މަގާމު ފުރުއްވާފަ އެވެ.
ޝަހީމު ވަނީ އިސްލާމިކް ޔުނިވަސީޓީގެ ޗާންސެލަރު ކަމާއި ވައިސް ޗާންސެލަރުކަން އަދި އިސްލާމިކް އޯގަނައިޒޭޝަން އޮފް ކޯޕަރޭޝަން (އޯއައިސީ) ގެ އެޑްވައިޒަރުގެ މަގާމުވެސް އަދާކުރައްވާފަ އެވެ.
އިސްލާމިކް ޝަރީއާގެ ރޮނގުން ޝަހީމް ޑިގްރީ ހާސިލުކުރެއްވީ މަދީނާގެ އިސްލާމިކް ޔުނިވާސިޓީންނެވެ. އަދި, އިސްލާމިކް ރިވީލްޑް ނޮލެޖު އެންޑް ހިއުމަން ސައިންސަސް (ފިގުހު އެންޑް އުސޫލުލްފިގުހު) ގެ ދާއިރާއިން އޭނާ ވަނީ މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން ޕީއެޗްޑީ ހާސިލުކުރައްވާފަ އެވެ.
